Национальный художественный галерей (Йошкар-Ола)
| Национальный художественный галерей | |
|---|---|
| руш. Национальная художественная галерея | |
 | |
| Негӹцӹм пиштӹмӹ | 2007 и 4 ноябрь |
| Вӓрлӓнӹмӓш | |
| Адрес |
 Россий: Йошкар-Ола, Ленинский проспект, 24 |
| Директор | Бурнашева Елена Эдуардовна |
| Сайт | rmii.ru/afisha_gal |
 |
|
 Медиафайлы на РУВИКИ.Медиа | |
Национальный художественный галерей (руш. Национальная художественная галерея) — Йошкар-Олашты Республиканский изобразительный искусствывлӓн музейӹш пырышы структуран подразделени. 2007-шӹ ин 4 ноябрьын пачылтын. Мары Элӹштӹшӹ художниквлӓн картинвлӓштӹн соок ылшы экспозициштӹ гӹц пасна галерейӹштӹ Российӹштӹшӹ дӓ вескид сӓндӓлӹквлӓштӹшӹ музейвлӓн сакой коллекциштӹн, тенгеок пасна коллекцивлӓн выставкывлӓштӹ соок эртӓт.
Истори
Галерей 2007-шӹ ин 4-шӹ ноябрьын «Жепӹн цӹрежӹ» выставка доно пачылтын, тӹштӹ республикӹштӹшӹ кого музейвлӓн коллекциштӹ гӹц Мары Элӹн культура пайдажым анжыктымы. Пачмашым Халыкын икышын ылмы кечӹжӹлӓн дӓ Мары Эл Республикӹн кечӹжӹлӓн келӹштӓрӹмӹ.
2007-шӹ ин галерейӹштӹ «Музей. Сем. Тетявлӓ» Россий кӱкшӹцӓн пуры кымылым анжыктышы проект эртен. Мероприятим тылык тетявлӓлӓн келӹштӓрӹмӹ.
2008-шӹ и мычашты галерейӹштӹ Музейвлӓн Международный кӓнгӓшӹштӹн Российӹштӹшӹ комитетшӹн Президиумжын кымдаэмдӹмӹ заседанижӹ эртен.
2010-шы ин шошым галерейӹштӹ «Руш музей: виртуальный филиал» информационно тымдышы центр пӓшӓм ӹштӓш тӹнгӓлӹн.
2011-шӹ ин шӹжӹм «Халан портретшӹ: вашталтшы Йошкар-Ола — Йыл кымдемӹн жемчуг пӹрцӹжӹ» творческий акцим эртӓрӹмӹ. Москва, Пермский край дӓ Йыл кымдемӹштӹшӹ федеральный округын республикӹвлӓжӹ гӹц 24 профессиональный художник участвуен. Участниквлӓ Йошкар-Олан формируялтшы архитектуран цӹрежӹм пӓлемденӹт. Проектӹн лӓктӹшӹжӹ семӹнь техеньок лӹмӓн выставка дӓ 100 утла перегӓлтшӹ единицӹлӓн фондым пайдарымаш лин.
Тӹ инок Национальный художественный галерей базеш сакой социальный дӓ физический возможностян тетя дон сӓмӹрӹквлӓлӓн Ресурсан центр пачылтын, тӹдӹ Кугижӓншӹ Руш музейӹн программывлӓжӹм мӹндӹрнӹ ылмы формат доно шӹмлӓш палша.
Галерей кӧргӹштӹ руш-швейцар художник Александр Бенуа ди Стеттон персональный выставкыжы, Калининградыштышы янтарь музейӹн фондшы гӹц «Балтикӹн шӧртньӹжӹ» выставка, Зураб Церетелин персональный выставкыжы, Сальвадор Далин произведенивлӓжӹн выставкыжы эртенӹт.
Здани
Галерей здани хала покшалны Оболенский-Ноготков площадьышты вӓрлӓнен, тӹдӹм Царевококшайскын пӹтӓришӹ воеводыжы лӹмеш манмы, тӹдӹлӓн тишток имниӓн памятникӹм шагалтымы. 2007-шӹ ин Возрождени жепӓш архитектуран стиль доно стройымы. Зданин пасна айыртемжӹ семӹнь цӓшӓн башня ылеш. Цӓшӹн кӱшӹл шалахай лыкыштыжы пачылтшы капкашты Йымын Ӓвӓн иконжы лӓктеш, а вара ӱл шалахай лыкышты тӹдӹн образшы доно изи осёл кеӓ, тӹдӹ мары мӱлӓндӹш Йымын Ӓвӓжӹ толмыжым символ семӹнь анжыкта. Изи осёл вургымла ӱл капкаш пыра. Капка чӱчӹлтеш, а вургымла кӱшӹл лыкышты угӹц Пӹлгомыштышы Кугижӓ Ӹдӹрӹн пуры согоньым пушы образшы лӓктеш.
Галерейӹн экспозици залвлӓшкӹжӹ сигнализацин, климат-контрольын, пожарым йӧртӹмӓшӹн дӓ сотемдӓрӹмӓшӹн кӹзӹтшӹ жепӓш система шӹндӓлтӹн.
Экспозицивлӓ
Галерейӹштӹ «Мары цӹре» лӹмӓн соок ылшы экспозици анжыкталтеш. Экспозицин Республиканский изобразительный искусствывлӓн музейӹн фондшы гӹц мары тӹр, украшени, халык выргем, картинвлӓ анжыкталтыт (классика дӓ этнофутуризм)[1][2].
Примечани
- ↑ «Марий Тÿс» - «Марийский колорит». Республиканский музей изобразительных искусств. Тергӹмӹ кечӹ: 20 августын 2025. Архивируйымы 11 апрельӹн 2016 года.
- ↑ Марийский колорит. МариМедиа. Тергӹмӹ кечӹ: 20 августын 2025. Архивировано из оригинала 14 майын 2016 года.
Ссылкывлӓ
- Афиша галереи. Сайт Республиканского музея изобразительных искусств.
- Галерея. Сайт Республиканского музея изобразительных искусств.
