Мары Эл Республикӹштӹшӹ Т. Евсеев лӹмӓн халык музей

Ирӹкӓн энциклопеди Википеди гӹц материал
Gerb-icon.png

Россий Федерацин культура министерствыжы

Arrow-Right.png
Gerb-big.png
Россий Федерацин культура министерствыжы
Мары Эл Республикӹштӹшӹ Т. Евсеев лӹмӓн халык музей
руш. Национальный музей Республики Марий Эл имени Т. Евсеева
Музейӹн тӹнг зданижӹ
Музейӹн тӹнг зданижӹ
Негӹцӹм пиштӹмӹ 1920
Негӹцӹм пиштӹшӹ Тимофей Евсеевич Евсеев
Вӓрлӓнӹмӓш
Адрес  Россий, Йошкар-Ола, 153-шы Советский ӧлицӓ
Иштӹ анжаш толшывлӓ 130 тӹжем
Директор Ирина Якаева[1]
Сайт fumus.ru
Логотип РУВИКИ.Медиа Медиафайлы на РУВИКИ.Медиа

Мары Эл Республикӹштӹшӹ Т. Евсеев лӹмӓн халык музей (ГБУК РМЭ «НМ РМЭ») — регионыштышы краеведени музей, Мары Эл Республикӹштӹ Йошкар-Ола халашты вӓрлӓнӓ. 1920 ин 3 апрельӹн пачылтын, Мары Элӹштӹ ик сек тошты музей ылеш. Музейлӓн негӹцӹм пиштӹшӹвлӓ логӹц иктӹжӹ, директор, ученый-этнограф, фольклорист, краевед, тымдышы Тимофей Евсеев лӹмеш лӹмдӹмӹ. Российӹштӹ «Национальный» статусым нӓлшӹ пӹтӓришӹ музей[2].

Истори

1920 ин 4 мартын Краснококшайск уездӹн халык образовани отделӹн коллегижӹ Краснококшайскышты ӹрдӹ музейӹм пачмы гишӓн пынзалтышым лыктын. Тӹ инок 3 апрельӹн музей Советский ӧлицӓштӹ 32-шы №-ӓн пӧртӹштӹ (Суворовын пӧртшӹ) анжалаш толшывлӓлӓн пачылтын. 1921 ин 17 октябрьын Мары автономный областьын халык образованин коллегижӹ уездный музей гӹц областной краеведени музейӹм ӹштӓш пынзалтышым лыктын. Вуйлатышеш Мары педагогический техникумышты мары йӹлмӹм дӓ этнографим тымдышы Фёдор Егоровым шагалтымы[3].

НМ РМЭ-н Истори дӓ археологи музейӹн зданижӹ

.

Музейӹм педтехникум зданиэш вӓрӓнгденӹт. 1922 ин кугижӓншӹ финанс палшыкым пуаш отказен, дӓ музейӹм чӱчӹнӹт. Музейӹштӹшӹ цилӓ экспонатым Мары педтехникумын этнографи отделӹш перегӓш пуэнӹт. 1924 ин 5 декабрьын музей угӹц пӓшӓлӓш тӹнгӓлӹн. Ӹшке зданижӹ ылдеӓт, музей тамахань жепеш Марпедтехникумын этнографи отделеништӹжок кодын.

Мары автономи областьын тымдышывлӓн съездӹн кӓнгӓшӹжӹ доно музейӹш тымдышы Тимофей Евсеевич Евсеевӹм колтенӹт, тӹдӹ марынвлӓ лошты этнографи материалым погаш тӹнгӓлӹн.

1925 ин музей Ӹрдӹ мары музей маналташ тӹнгӓлӹн. 1927 и тӹнгӓлтӹшӹн музейӹм пасна изирӓк кӱ зданиш ваштенӹт. 1930 ин музей ик этажан кӱ здаништӹ вӓрлӓнен. Выставка залвлӓ кым кӹдежӹм йӓшненӹт.

1932 ин июньын музейӹм питӹрӹмӹ церкӹ зданиш ваштенӹт, тӹштӹ кӹтӹк жепӓн ик выставкым эртӓрен кердӹнӹт. 1934 ин церкӹ зданим цилӓге тӧрлӹмӹкӹ, музейӹн истори ӓкшӹм лӱктӓлӓш йӧнӹм ӹштӹмӹ, картин галерейлӓн этажым йӧндӓрӹмӹ.

Музей Москваштышы Халыкым шӹмлӹмӹ ӹрдӹ музей, Вяткыштышы краеведени музей дӓ Финляндиштӹшӹ Хельсинки этнографи музей доно кӹлӹм кычен.

1934 и февраль гӹц Тимофей Евсеев музей директор семӹнь пӓшӓлӓш тӹнгӓлӹн. Мары АО-м Мары АССР-ӹш вашталтымы гишӓн музей Мары АССР-ӹн просвещенинин Халык комиссариатын подчинеништӹжӹ лин. 1937 ин музейӹм у зданиш ваштымы. 1939 и 20 январь гӹц музейӹм пыжен вашталтымы паштек пӧрттӱ, истори, социализмӹм чангымаш отделвлӓ доно пачылтын.

1941 и гӹц 1946 и якте музей жепеш чӱчмӹ ылын, а фондвлӓм Мары АССР-ӹн Ронга районыш нӓнгенӹт, тӹштӹ нӹнӹ колхозын изи кӱ помещеништӹ перегӓлтӹнӹт.

1946 ин Мары научно-краеведческий музей маналташ тӹнгӓлӹн дӓ Мары АССР-ӹн Министрвлӓн кӓнгӓш сагашы культурно-просветительский учрежденивлӓ шотышты Управленилӓн подчиняйӓлтӓш тӹнгӓлӹн. Тынӓмок музейлӓн кӹзӹтшӹ кок этажан зданим пумы.

Ти инок археолог П. Н. Старостин дӓ наука шотышты директорын вашталтышыжы Борис Бабушкин археологи доно пӹтӓришӹ научный экспозицим ӹштенӹт, 1969 ин «Мары АССР-ӹн пӧрттӱжӹ» экспозицим ӹштӹмӹ. Научный пӓшӓн авторжы — Николай Иванов.

1975 ин Эстон ССР-ӹн Тарту халашты «Мары халык искусство» выставка эртен, тӹштӹ 200 утла экспонат ылын. 1987 ин пӹтӓришӹ гӓнӓ вескид сӓндӓлӹкӹштӹ, Венгр Халык Республикӹн Сомбатхей халашты, «Мары халык искусство» выставкым эртӓрӹмӹ, тӹдӹн экспонатвлӓжӹм Сомбатхей истори музейлӓн подарка семӹнь пумы.

Директор Мария Матукован инициативӹжӹ доно Мары Эл Республикӹн Правительствыжын 1992 и 4 августаш Пынзалтышыжы доно Мары научно-краеведческий музей Мары Эл Республикӹн халык музей маналташ тӹнгӓлӹн, тӹдӹлӓн «национальный» статусым дӓ тӹдӹлӓн негӹцӹм пиштӹшӹ Тимофей Евсеев лӹмӹм пумы[3][4].

Истори дӓ археологи музей зданин фронтоныштыжы музейӹн логотипшӹ

2003 ин музейӹм уэмдӹмӹ.

2015 ин ноябрьын Йошкар-Олан набережныйыштыжы (Эшкинин ӧлицӓ, 10А) музейӹн у структурный подразделенижӹм — Тетя музейно-выставочный центрым — пачмы[5][6].

2017 ин 20 июльын Йошкар-Олаш официальный визит доно Россий Президент сагашы халыквлӓ лоштышы кӹл шотышты Кӓнгӓшӹн заседаништӹжӹ участвуяш толмыкыжы, музейӹштӹ Россий президент Владимир Путин ылын[7].

2018 ин 4 ноябрьын, Халыквлӓн икышын ылмы кечӹн дӓ Мары Эл Республикӹн кечӹжӹн, молнамшы Тетя музейно-выставочный центрын здаништӹжӹ Истори дӓ археологи музейӹм торжественно пачыныт[8].

2020 ин мартын музейӹм ӹштӹмӹлӓн 100 и теммӹ лӹмеш Истори дӓ археологи музейӹн площадкыштыжы музейӹн у продукт дон услугывлӓжӹ доно пӓлдӓрӹмӹ. Мероприятиштӹ «Мӹнь тиштӹ ылам: Мары Эл» мобильный приложени дон «Мары мӱлӓндӹ — Российӹн цевержӹ» презентаци альбомым анжыктымы[9].

2020 ин музейӹн тӹнг здаништӹ уэмдӹмӹ пӓшӓ кеен[10], тӹдӹм торжественно 16 декабрьын пачыныт[11].

2023 ин июльын музей Мары Эл Республикӹштӹшӹ культура учрежденивлӓн «Мары Элӹн культурыжы» порталым ӹштӹшӹ оператор лин[12].

2023—2024 ивлӓн музей Москва халашты «Россий» Международный выставка-форумышты Мары Эл Республика доно пӓлдӓрӹшӹ оператор лин.

Директорвлӓ

Музейӹн цымыр эртӹмӹ корныштыжы директорвлӓн спискӹ[13]:

  • Егоров Фёдор Егорович (1921-1924)
  • Евсеев (Евсевьев) Тимофей Евсеевич (1924-1931, 1937)
  • Кочетов Петр Трофимович (1931-1935)
  • Фридрих Александра Христиановна (1937-1947)
  • Артемьев А.В. (1946-1947)
  • Исаков Исаак Кириллович (1948-1953)
  • Кузнецова Евдокия Ивановна (1953-1961)
  • Калугин Семён Михайлович (1961-1963)[14]
  • Антоненко Зинаида Михайловна (1964-1966)
  • Кашков Антонин Алексеевич (1967-1974)
  • Степанов аркадий Фёдорович (1975-1977)
  • Пакеев Леонид Яковлевич (1977-1990)
  • Матукова Мария Байрамовна (1990-2006)
  • Хват Александр Иванович (2007-2008)
  • Чёрный Никита Валерьевич (2008-2009)
  • Муравьёв Анатолий Васильевич (2009-2014)
  • Смирнова Лидия Никаноровна (2014-2018)
  • Зверева Светлана Владимировна (2018-2025)[15]
  • Якаева Ирина Геннадьевна (2025 и 1 апрель гӹц)[16][17]

Здани

Музей здани региональный значениӓн архитектура памятник ылеш[18][19].

Зданим арестный пӧрт семӹнь 1903 ин чангымы[18]. Варарак тӹштӹ рабфак вӓрлӓнен, а Кого Отечественный вырсы жепӹн — Ленинград гӹц Кугижӓншӹ оптический институт, тӹштӹ академик Сергей Иванови Вавилов пӓшӓлен. Музей ти здаништӹ 1946 и годшен ылеш. 1960 ин республикӹн юбилееш зданин реконструкцим ӹштенӹт, 3-шы этажым чангенӹт, вургымла крылом ӹштенӹт.

Здани Советский ӧлицӓн ирвел монгырыштыжы чангымы фронтым ӹштӹмӓштӹ участвуя. Ирвел монгыр гӹц ризалитӓн кым этажан виӓш лыкан кӹрпӹц здани ылеш. 1903 иӓш чангымын объёмышты коридоран планировкыжы улы дӓ 1960 иӓш ушымы объёмыштыжы залан планировкыжы улы. Фасадым сӹлнештӓрӹмӹ рустовкым, профилируйымы карнизвлӓм, 2-шы дон 3-шы этаж окнявлӓ лоштышы стенӓвлӓштӹ каннелюр корнывлӓм, мары тӹр сӹнӓн сӹлнештӓрӹмӓшӹм кычылтмы[18].

Фондыштышы коллекцивлӓ

Музей коллекциштӹ 233 тӹжем утла перегӹмӹ единица шотлалтеш, нӹнӹм Халык музйӹштӓт, тенгеок тӹдӹн структурный подразделенивлӓштӹжӓт экспозици дон выставкывлӓшкӹ лыктыт: Халык-прикладной искусство музейӹштӹ, И.С. Ключников-Палантайын музей-пӧртӹштӹ, Православи истори музейӹштӹ, Истори дӓ археологи музейӹштӹ, Тетя музейный центрӹштӹ, «Благовешӹн башня» культурно-выставочный центрӹштӹ.

2019 иэш национальный музейӹштӹ техень экспозици дон выставкывлӓ ылыныт:

  • Ӹлӹмаш циклын овуцавлӓ: мары халыкын XIX-XX курымвлӓштӹшӹ традици культурыжы.
  • Йӓнвлӓн ӧрӹктӓрӹшӹ мир. Мары Эл Республикӹн осовын перегӹмӹ пӧрттӱ территоривлӓ.

Музейӹштӹ Т.Евсеевӹн фондым пайдараш ӱжмӹ, кымдемӹн ӹлӹмӓшӹжӹ доно пӓлӹмӹ ылшы художниквлӓн (К. Ф. Егоров, Е. Д. Атлашкина, П. Т. Горбунцов), тенгеок Азан гӹц художниквлӓн (Г. А. Медведев, П. А. Радимов, В. К. Тимофеев) XX курымын 20-30-шы ивлӓн художественно-этнографический зарисовка дон живопись пӓшӓвлӓн коллекцивлӓштӹ улы (260 нӓрӹ единица). Нӹнӹн 1920-шы ивлӓн кокшы пелӹштӹжӹ — 1930-шы ивлӓн икшӹ пелӹштӹжӹ пӓшӓлӹмӹштӹ гишӓн марынвлӓн кечӹ йӹде ылшы ӹлӹмӓшӹштӹ дӓ этнокультура айыртемӹштӹ гишӓн коллекцим погымы[20]. Тӹшкӹ 1928-1929 ивлӓн Т. Евсеев организуйымы Мары автономи областьын Морки дӓ Звенигово кантонвлӓштӹшӹ экспедицивлӓштӹ[3] дӓ экспедици паштек ӹштӹмӹ этюдвлӓ, рисункывлӓ, этнографи зарисовкывлӓ дӓ документальный характерӓн наброскывлӓ пырат[20].

Музейӹн документальный фондыштыжы Мары Элӹн шукы пӓлӹмӹ здравоохранени, тыменьмӓш дӓ наука, культура дӓ искусство деятельвлӓн коллекцивлӓштӹ перегӓлтӹт (фотовлӓ, документвлӓ, пецӓтлӹмӹ изданивлӓ дӓ т.м.), нӹнӹ лошты: Мары кымдемӹн пӹтӓришӹ тетя врач Ф. М. Контский, пӹтӓришӹ мары композиторвлӓ И. С. Ключников-Палантай дӓ А. Я. Эшпай, композитор, РСФСР искусствын заслуженный деятельжӹ Н. А. Сидушкин, пӹтӓришӹ мары музыкант-кӓрш мастарвлӓ П. С. Тойдемар дӓ А. Р. Сидушкина, мары халык гӹц пӹтӓришӹ профессионал театр актёрвлӓ А. Г. Страусова дӓ М. Т. Якаев, пӹтӓришӹ мары сирӹзӹ дӓ поэт С. Г. Чавайн, пӹтӓришӹ мары драматург М. Шкетан, мары халык гӹц пӹтӓришӹ заслуженный искусство деятель Н. Арбан, мары халык гӹц пӹтӓришӹ халык поэт М. Казаков, халык поэт дон писательвлӓ Н. Лекайн, С. Николаев, М. Майн, Й. Осмин, С. Вишневский, В. Юксерн, А. Крупняков, Г. Матюковский, К. Васин, З. Каткова, А. Юзыкайн, В. Регеж-Горохов дӓ шукы молат. Документвлӓн пасна пласт Мары мӱлӓндӹн историш ӹшке лӹмӹштӹм сирен кодышы политика пӓшӓзӹвлӓн ылеш: мары правительствын пӹтӓришӹ вуйлатышыжы И. П. Петров, Мары АССР-ӹн Кӱшӹл Кӓнгӓш Президиум председательвлӓ Т. И. Кавалеров, П. В. Щербаков, П. А, Алмакаев, В. И. Романов, Мары АССР-ӹн Кӱшӹл Кӓнгӓш председательвлӓ П. Е. Коротков, В. П. Ишалёв, Н. Ф. Рыбаков, Г. А. Посибеев, Мары Элӹн пӹтӓришӹ президентшӹ В. М. Зотин, юриствлӓ В. И. Товашов, А. Т. Товашов, Н. М. Пиксаев дӓ молат.

Филиалвлӓ

  1. И. С. Ключников-Палантайын музей-пӧртшӹ (Йошкар-Ола)[21].
  2. Халык-прикладной искусство музей (Йошкар-Ола)[22].
  3. Истори дӓ археологи музей (Йошкар-Ола)[23].
  4. Православи истори музей (Йошкар-Ола)[24].
  5. «Благовешӹн башня» культурно-выставочный центр (2021 и 30 апрель гӹц — «Башня» культурно-выставочный центр[25]) (Йошкар-Ола)[26].
  6. «Отечествын геройвлӓ» музейно-патриотический центр (Йошкар-Ола)[27].
  7. Креативный индустривлӓм виӓнгдӹшӹ ресурсный центр (Йошкар-Ола)[28].

Примечани

  1. ↑ kidsher.ru
  2. ↑ Государственное бюджетное учреждение культуры "Национальный музей Республики Марий Эл имени Тимофея Евсеева". Госкаталог. Тергӹмӹ кечӹ: 4 мартын 2025.
  3. ↑ 1 2 3 Энциклопедия Республики Марий Эл, 2009, с. 572—573.
  4. ↑ Национальный музей РМЭ им. Евсеева (руш.). Национальный музей РМЭ им. Евсеева. Тергӹмӹ кечӹ: 6 мартын 2021. Архивируйымы 10 апрельӹн 2021 года.
  5. ↑ Новый музей — Музей детства (руш.). mari-el.er.ru. Тергӹмӹ кечӹ: 21 сентябрьын 2021. Архивируйымы 21 сентябрьын 2021 года.
  6. ↑ Музей детства в Йошкар-Оле(неопр.). ИА МедиаПоток (MediaPotok) (21 августын 2018). Тергӹмӹ кечӹ: 21 сентябрьын 2021. Архивируйымы 21 сентябрьын 2021 года.
  7. ↑ Посещение Национального музея Республики Марий Эл (руш.). Президент России (20 июльын 2017). Тергӹмӹ кечӹ: 17 майын 2020. Архивируйымы 6 июньын 2020 года.
  8. ↑ Страницы - Новая-выставка-Музея-истории-и-археологии.aspx... mari-el.gov.ru. Тергӹмӹ кечӹ: 21 сентябрьын 2021. Архивируйымы 21 сентябрьын 2021 года.
  9. ↑ 4 марта музей приглашает на презентацию «Музею — 100!» (руш.). Официальный сайт Национального музея РМЭ им. Т. Евсеева. Тергӹмӹ кечӹ: 18 майын 2020. Архивируйымы 14 январьын 2022 года.
  10. ↑ Национальный музей РМЭ им. Евсеева (руш.). Национальный музей РМЭ им. Евсеева. Тергӹмӹ кечӹ: 21 сентябрьын 2021. Архивируйымы 21 сентябрьын 2021 года.
  11. ↑ Национальный музей РМЭ им. Евсеева (руш.). Национальный музей РМЭ им. Евсеева. Тергӹмӹ кечӹ: 21 сентябрьын 2021. Архивируйымы 21 сентябрьын 2021 года.
  12. ↑ Кидшер. Минкультуры запустило портал «Культура Марий Эл», Кидшер (15 июльын 2023). Дата обращения: 3 декабрьын 2024.
  13. ↑ История Национального музея Республики Марий Эл им. Т. Евсеева (руш.). Официальный сайт Национального музея РМЭ им. Т. Евсеева. Тергӹмӹ кечӹ: 17 майын 2020. Архивируйымы 10 майын 2020 года.
  14. ↑ Мочаев В. А. Калугин Семён Михайлович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 175. — 606 с. — 1500 экз. — ISBN 978-5-905314-35-3.
  15. ↑ Национальный музей Республики Марий Эл им. Т. Евсеева (руш.). Национальный музей Республики Марий Эл имени Тимофея Евсеева. Тергӹмӹ кечӹ: 17 майын 2020. Архивируйымы 12 майын 2020 года.
  16. ↑ marpravda.ru
  17. ↑ Кугарня (газет)
  18. ↑ 1 2 3 Здание краеведческого музея (регистрационный номер: 121510226580005) (руш.). Минкультуры России. Тергӹмӹ кечӹ: 17 майын 2020. Архивируйымы 1 мартын 2017 года.
  19. ↑ Постановление Правительства Республики Марий Эл от 3 сентября 1992 г. № 382 «О мерах по дальнейшему обеспечению сохранности историко-архитектурных памятников Республики Марий Эл»
  20. ↑ 1 2 Э. М. Колчева, Н. А. Большова. Структура этнокультурного пространства в художественно-этнографических работах 20-30-х гг. XX в. Из фондов Национального музея Республики Марий Эл им. Т. Евсеева // Этнографическое обозрение. — 2013. — № 4. — С. 174—187.
  21. ↑ Дом-музей И.С. Ключникова-Палантая (руш.). Национальный музей Республики Марий Эл имени Тимофея Евсеева (22 июльын 2011). Тергӹмӹ кечӹ: 17 августын 2019. Архивировано из оригинала 6 мартын 2017 года.
  22. ↑ Музей народно-прикладного искусства (руш.). Национальный музей Республики Марий Эл имени Тимофея Евсеева (22 июльын 2011). Тергӹмӹ кечӹ: 17 майын 2020. Архивировано из оригинала 5 майын 2018 года.
  23. ↑ Музей истории и археологии. Министерство культуры, печати и по делам национальностей Республики Марий Эл. Тергӹмӹ кечӹ: 29 ноябрьын 2018. Архивируйымы 30 ноябрьын 2018 года.
  24. ↑ Открыт Музей истории православия (руш.). Национальный музей Республики Марий Эл имени Тимофея Евсеева (7 ноябрьын 2016). Тергӹмӹ кечӹ: 20 майын 2019. Архивировано из оригинала 12 январьын 2018 года.
  25. ↑ В Йошкар-Оле открылся обновлённый культурно-выставочный центр — Министерство культуры, печати и по делам национальностей Республики Марий Эл(неопр.). Тергӹмӹ кечӹ: 7 июньын 2021. Архивируйымы 7 июньын 2021 года.
  26. ↑ Открытие Благовещенской башни (руш.). Официальный сайт Национального музея РМЭ им. Т. Евсеева (12 июньын 2018). Тергӹмӹ кечӹ: 17 майын 2020. Архивируйымы 14 январьын 2022 года.
  27. ↑ Музейно-патриотический центр «Герои Отечества» открылся в Йошкар-Оле — Министерство культуры, печати и по делам национальностей Республики Марий Эл(неопр.). mincult12.ru. Тергӹмӹ кечӹ: 3 декабрьын 2024.
  28. ↑ В Марий Эл установлены меры поддержки, направленные на развитие и популяризацию креативных индустрий — Министерство культуры, печати и по делам национальностей Республики Марий Эл(неопр.). mincult12.ru. Тергӹмӹ кечӹ: 3 декабрьын 2024.

Литература

  • Национальный музей им. Т. Евсеева. Страницы истории / Сост. Ан. В. Муравьёв. — Йошкар-Ола: ГБУК РМЭ «Национальный музей Республики Марий Эл им. Т. Евсеева», 2011. — 104 с. — ISBN 978-5-904558-10-9.
  • Национальный музей им. Т. Е. Евсеева // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 572—573. — 872 с. — 3505 экз. — ISBN 978-5-94950-049-1.

Ссылкывлӓ

«https://mrj.ruwiki.ru/w/index.php?title=Мары_Эл_Республикӹштӹшӹ_Т._Евсеев_лӹмӓн_халык_музей&oldid=315043» гӹц нӓлмӹ