Эрик Сапаев лӹмӓн Мары кугижӓншӹ академический опера дӓ балет театр

Ирӹкӓн энциклопеди Википеди гӹц материал
Эрик Сапаев лӹмӓн Мары кугижӓншӹ академический опера дӓ балет театр
2014 и гӹц театрын пӧртшӹ
2014 и гӹц театрын пӧртшӹ
Первишӹ лӹм Музыкально-драматический театр (1968—1994)
Негӹцлӹмӹ 1968
Жанр опера, балет
Наградывлӓ Россий Федерацин Правительствыжын премижӹ — 2016
Театрын пӧртшӹ
Вӓрлӓнӹмӓш Йошкар-Ола
Адрес Комсомольский ӧл., 130
56°37′59″ с. ш. 47°53′26″ в. д.GЯO
Чангымы пӓшӓ 2006 и—2014 и
Пачмы 2014 и 24 июнь
Шӹнгӹц 446
Вуйлатымаш
Ведомство Мары Эл Республикӹн Культура, печать дӓ халыквлӓн пӓшӓштӹ шотышты министерство
Художественный вуйлатышы Константин Иванов
Тӹнг режиссёр Сергей Шепелев
Тӹнг дирижёр Григорий Архипов
Тӹнг балетмейстер Владимир Шабалин
Тӹнг хормейстер Ольга Жилинская
Сайт operaballet.net

Эрик Сапаев лӹмӓн Мары кугижӓншӹ академический опера дӓ балет театр — Йошкар-Олашты вӓрлӓнӹшӹ опера дӓ балет театр, 1968 ин музыкально-драматический театр семӹнь негӹцлӓлтӹн, кӹзӹтшӹ статусым 1994 ин нӓлӹн[1].

Истори

Театр 1968 и гӹц 2014 и якте ти пӧртӹштӹ пӓшӓм ӹштен

1968 и 15 февральын Яков Майоров-Шкетан лӹмӓн Мары ушымы драма театрым музыкально-драматический театрыш сӓрӹмӹ гишӓн РСФСР Министр кӓнгӓшӹн постановленижӹ пецӓтлӓлтӹн.

И. Палантай лӹмӓн Мары республикӹштӹшӹ училище сага хор студим пачмы, театрыш пӓшӓм ӹштӓш опера дӓ балет артиствлӓм ӱжӹнӹт. Опера труппын негӹцшӹм Москва, Ленинград, Горький дӓ Казань халавлӓштӹшӹ консерваторим тымень лӓкшӹвлӓ ӹштенӹт. Балет труппышты Ленинград дӓ Пермьӹштӹшӹ хореографи училищым тымень пӹтӓрӹшӹвлӓ линӹт.

Театр официально 1969 и февральын композитор Эрик Сапаевӹн «Акпатыр» пӹтӓришӹ мары героико-романтический оперӹжӹн премьера доно пачылтын, опера мары литературым негӹцлӹшӹвлӓ логӹц иктӹжӹн — Сергей Чавайнын истори драмыжы семӹнь сирӓлтӹн. Спектакльын режиссёржы Р. А. Розенберг лин, а тӹнг партивлӓм А. Венидиктов, М. Аверченко, Г. Усенкова, Е. Седов дӓ Л. Ковалёва мыренӹт.

1972 ин Мары АССР-ӹн Музыкально-драматический театржым кок театреш шелмӹ — М. Шкетан лӹмӓн Мары драма театр дӓ Мары музыкальный театр.

1973 и 17 февральын мары композитор Анатолий Лупповын «Шӹргӹ легенда» пӹтӓришӹ национальный балетшӹн премьерӹжӹ лин. Спектакльым балетмейстер Энн Эрович Рая шӹнден, художник-постановщик — Раиса Чебатурина, дирижёр — В. Д. Куценко. Тӹнг партивлӓм Яков Глейзер, Алла Александрова, Владимир Кузьминых, Галина Михалёва, Галина Климанова куштенӹт.

1994 ин Мары Эл Республика Правительствын Постановленижӹ доно Мары музыкальный театрым Мары кугижӓншӹ опера дӓ балет театрыш вашталтен лӹмденӹт, тӹнӓмок тӹдӹлӓн кого мары композитор Эрик Сапаевӹн лӹмжӹм пуэнӹт.

Театрын дирижёржы Станислав Михайлович Элембаев ылын[2].

Кӹзӹтшӹ истори

Театрын ӹлӹмӓштӹжӹ у ежӹнг 1999 ин, балет труппым Константин Иванов вуйлаташ шагалмыкы, тӹнгӓлӹн. Тӹдӹ, Йошкар-Олашты шачшы, Кого театрын видӹшӹ солистшӹ, туан халашкыжы пӧртӹлӹн; техень кӱкшӹцӓн творческий эдемӹн кымдемӹшкӹ толмыжы кого событи ылын, тӹдӹ балет докы халыкын кымылжым веле агыл ӹлӹжтен, а Мары Эл Республикӹм вуйлатышывлӓлӓн цилӓ национальный дӓ классический музыка искусствылан кого вниманим айыраш вир лин.

Тӹ инок Константин Иванов тӓрвӓтӹмӹ доно 18-шӹ номерӓн Тымдымы центр негӹцеш (кӹзӹт «Бауман лицей» ГОУ) И. С. Палантай лӹмӓн Мары Эл республикӹштӹшӹ культура дӓ искусство колледжӹн «Хореографи искусство» отделенижӹм — Мары кугижӓншӹ опера дӓ балет театрлан кадрвлӓм йӓмдӹлӹшӹ пӹтӓришӹ профессиональный тыменьмӹ заведеним ӹштӹмӹ. Иванов тиштӹ пӹтӓртӹш классвлӓштӹ классика дӓ дуэт-классика куштымашым тымда[3], художественный руководитель дӓ отделени вуйлатышы ылеш[4].

2000 ин Константин Ивановым Эрик Сапаев лӹмӓн Мары кугижӓншӹ опера дӓ балет театрын художественный вуйлатышешӹжӹ шагалтенӹт, цилӓ творчество дӓ администраци пӓшӓм лач тӹдӹ пӓлемдӓ. К. Ивановын инициативӹжӹ доно опера дӓ балет спектакльвлӓм шӹндӓш режиссёр дон балетмейстервлӓм Москва, Санкт-Петербург дӓ вес сӓндӓлӹквлӓ гӹц ӱжӓш тӹнгӓлӹнӹт. Художественный вуйлатышы ӹшкежӓт кушташ цӓрнӹде, тенгеок театрын сценӹштӹжӹ классика наследиштӹшӹ балетвлӓн у редакциштӹм дӓ оригинальный балетвлӓм шӹнден, нӹнӹ республикӹн приз дӓ наградывлӓжӹ доно пӓлемдӓлтӹнӹт. Тӹдӹн вуйлатымыжы доно театрын труппыжы ик гӓнӓ агыл Россий мычкы, Европыштышы, Азиштӹшӹ дӓ Кечывӓлвел Америкӹштӹшӹ сӓндӓлӹквлӓ мычкы гастроль доно каштын.

Кымдемӹштӹшӹ культура ӹлӹмӓштӹ Константин Иванов вуйлатымы доно каждый и эртӓрӹмӹ фестивальвлӓ — «Тел вадывлӓ» опера дӓ балет искусство фестиваль дӓ «Галина Уланова лӹмеш» балет искусство фестиваль кого событиш сӓрнӓлтӹнӹт. Тӹшкӹ Мары опера дӓ балет театрын солиствлӓжӹ, тенгеок Кого театрын, Мариинский театрын, Кремльӹштӹшӹ балетӹн, Россий дӓ вес сӓндӓлӹк халавлӓштӹшӹ балет труппывлӓн шӹдӹрвлӓштӹ ушнат.

2006 и 10 октябрьын театрын сценӹштӹжӹ Монтсеррат Кабалье дон Николай Басковын иквӓреш шӹндӹмӹ концертӹштӹ эртен[5].

2014 и 24 июньын Эрик Сапаев лӹмӓн Мары кугижӓншӹ опера дӓ балет театрын у пӧртшӹм пачыныт. Сакой керӓл йӧнвлӓ ылмы доно тӹдӹ Йыл кымдемӹштӹ сек яжо театрвлӓ логӹц иктӹжӹ: тиштӹ Страсбургышты ӹштӹмӹ орган улы[6].

2011 ин виш пӹлгом лӹвӓлнӹшӹ спектакльвлӓн «Кӓнгӹж жеп» фестивальыштым негӹцлӹмӹ[7].

2018 и 12 ноябрьын Мары Эл Республика Правительствын Председательжӹ Александр Евстифеев театрлан «Академический» лӹмӹм пуэн[8][9].

Театрын репертуарыштыжы 50 утла произведени опера, балет дӓ оперетта классика гӹц, тетявлӓлӓн спектакльвлӓ ылыт. Театр пӹтӓришӹ ивлӓ гӹцок мары композиторвлӓ доно пӓшӓм яжон ӹштӓ. Кӹзӹт репертуарыштыжы кок национальный опера улы — тидӹ Эрик Сапаевӹн «Акпатыр» дӓ Элина Архипован «Алдиар» оперӹвлӓштӹ, тенгеок Анатолий Лупповын семешӹжӹ шӹндӹмӹ «Шӹргӹ легенда» балет[10].

Театр техень режиссёр дӓ балетмейстервлӓ доно иквӓреш пӓшӓм ӹштӓ: Акихико Озаки (Япони), Тамаз Вашакидзе (Грузи), Мурдмаа (Эстони), Ольга Маликова (Санкт-Петербург), Екатерина Парчинская (Москва), Владимир Соболев (Киров), Сергей Миндрин (Угарман) дӓ молы донат[10].

Театр «Кӓнгӹжӹмшӹ балет жеп» (руш) (мар.-ӹн — классика балет доно и йӹде лишӹ Российӹштӹшӹ кӓнгӹжӹмшӹ марафонын участникшӹ ылеш, тмарафон Москвашты Российӹштӹшӹ академический сӓмӹрӹк театрын (РАМТ) сценӹштӹжӹ эртӓрӓлтеш.

Театрын пӧртшӹ

РФ-ӹн премьер-министржӹ Дмитрий Медведев театрын у пӧртшым пачмы годым

Мары национальный театрын пӧртшӹм 1962 ин чангымы, тӹштӹ ик жепӹнок кок театр пӓшӓм ӹштен — М. Шкетан лӹмӓн Мары национальный драма театр дӓ Эрик Сапаев лӹмӓн Мары кугижӓншӹ опера дӓ балет театр.

Мары Эл Республикӹн Президентшӹ Л. И. Маркеловын решенижӹ доно 2006 ин опера дӓ балет театрлан у пӧртӹм строяш тӹнгӓлӹнӹт[11], тӹдӹм 2012 и шӹжӹм пачаш шаненӹт[12][13].

2014 и 24 июньын Эрик Сапаев лӹмӓн Мары кугижӓншӹ опера дӓ балет театрын у пӧртшӹм айо семӹнь пачмы[14].

Кӹзӹтшӹ репертуар (премьера кечӹ доно)

Балетвлӓ

  • 1997 — Людвиг Минкусын «Дон Кихот», Мариус Петипӹн дӓ Александр Горскийӹн хореографиштӹ, Константин Иванов дон Ольга Комлева шӹнденӹт
  • 2001 и 7 ноябрь — Петер Гертельӹн «Такеш анзыцок йыштылмаш», Александр Горскийӹн хореографижӹ, Константин Ивановын редакцижӹ
  • 2002 — Людвиг Минкусын семеш «Пахита» балет гӹц кого классический па, Мариус Петипӹн хореографижӹ, Ольга Комлева шӹнден
  • 2003 и 10 февраль — Пётр Чайковскийӹн «Йӱксӹ йӓр», Мариус Петип дон Лев Ивановын хореографиштӹ, Константин Сергеевӹн версижӹ, Константин Ивановын редакцижӹ
  • 2005 и 12 февраль — Феликс Мендельсонын «Кӓнгӹж йыдым омын», шӹндӹшӹ балетмейстервлӓ Одзаки Акихико дон Одзаки Митико
  • 2005 и 15 март — Анатолий Лупповын «Шӹргӹ легенда», шӹндӹшӹ балетмейстер Константин Иванов
  • 2005 и 14 ноябрь — Сергей Прокофьевӹн «Ромео дон Джульетта», шӹндӹшӹ балетмейстер Константин Иванов
  • 2006 и 8 ноябрь — Гоги Дзодзуашвилин «Шукы юк», шӹндӹшӹ балетмейстер Тамаз Вашакидзе
  • 2007 и 6 ноябрь — Арам Хачатурянын «Спартак — Римӹн триумфшӹ», шӹндӹшӹ балетмейстер Константин Иванов
  • 2008 и 9 апрель — Сергей Прокофьевӹн «Золушка», шӹндӹшӹ балетмейстер Константин Иванов
  • 2008 и 13 ноябрь — Морис Равельӹн «Болеро», шӹндӹшӹ балетмейстер Игорь Марков
  • 2008 и 13 ноябрь — Карл Орфын «Кармина Бурана», шӹндӹшӹ балетмейстер Май-Эстер Мурдмаа
  • 2009 и 6 июль — Людвиг Минкусын «Баядерка», Мариус Петипӹн хореографижӹ, Константин Ивановын редакцижӹ
  • 2009 и 14 ноябрь — Евгений Крылатовын «Йозы пеледӹш» («Цветик-семицветик»), шӹндӹшӹ балетмейстер Екатерина Парчинская
  • 2009 и 2 декабрь — Пётр Чайковскийӹн «Щелкунчик», шӹндӹшӹ балетмейстер Константин Иванов
  • 2010 и 12 июль — Пётр Чайковскийӹн «Амалышы цевер ӹдӹр», Мариус Петипӹн хореографижӹ, Константин Ивановын редакцижӹ
  • 2011 и 4 февраль — Ж. Бизен — Р. Щедринӹн «Кармен-сюита», шӹндӹшӹ балетмейстер Алла Александрова
  • 2011 и 8 апрель — Цезарь Пунин «Эсмеральда», Жюль Перрон дӓ Мариус Петипӹн хореографиштӹ, Константин Ивановын редакцижӹ
  • 2011 и 9 апрель — Владислав Агафонниковын «Тимур дӓ тӹдӹн командыжы, ӓль Мӓмнӓн жепӹн геройвлӓжӹ», шӹндӹшӹ балетмейстер Екатерина Парчинская
  • 2011 и 6 июль — Адольф Аданын «Жизель», Жан Кораллин, Жюль Перрон дӓ Мариус Петипӹн хореографиштӹ, Константин Ивановын редакцижӹ

Оперывлӓ

  • 1995 и 29 март — Джакомо Пуччинин «Мадам Баттерфляй», шӹндӹшӹ режиссёр Александр Николаев
  • 1995 и 31 декабрь — Джоаккино Россинин «Севильский цирюльник», шӹндӹшӹ режиссёр Александр Николаев
  • 1997 и 19 декабрь — Модест Мусоргскийӹн «Борис Годунов», шӹндӹшӹ режиссёр Михаил Бурцев
  • 2001 и 4 февраль — Эллина Архипован «Алдиар», шӹндӹшӹ режиссёр Олег Иркабаев-Этайн
  • 2002 и 5 апрель — Джузеппе Вердин «Риголетто», шӹндӹшӹ режиссёр Светлана Акчурина
  • 2006 и 12 февраль — Пётр Чайковскийӹн «Евгений Онегин», шӹндӹшӹ режиссёр Константин Иванов
  • 2006 и 12 ноябрь — Джузеппе Вердин «Травиата», шӹндӹшӹ режиссёр Константин Иванов
  • 2007 и 23 декабрь — Николай Римский-Корсаковын «Кугижӓн арвӓтӹжӹ», шӹндӹшӹ режиссёр Сергей Шепелёв
  • 2008 и 4 декабрь — Николай Римский-Корсаковын «Май йыд», шӹндӹшӹ режиссёр Ольга Маликова
  • 2009 и 5 май — Пётр Чайковскийӹн «Иоланта», шӹндӹшӹ режиссёр Георгий Барышев, уэш тӧрлӓтӹмӓшӹн режиссёржы Светлана Акчурина
  • 2010 и 6 ноябрь — Пётр Чайковскийӹн «Пиковый дама», шӹндӹшӹ режиссёр Сергей Миндрин
  • 2011 и 4 июль — Эрик Сапаевӹн «Акпатыр», шӹндӹшӹ режиссёр Сергей Шепелёв
  • 2020 и 29 декабрь — «Чумбылат патыр», шӹндӹшӹвлӓ Константин Иванов, Денис Фейзов

Оперетта дон мюзиклвлӓ

  • 1976 — Франц Легарын «Веселӓ тылык вӓтӹ», шӹндӹшӹ режиссёр Борис Бруштейн
  • 1991 и 27 февраль — Оскар Фельцманын «Чарлейӹн куакажы, ӓль Пуры, мӹнь тӓмдӓн куакада ылам!», шӹндӹшӹ режиссёр Михаил Бурцев
  • 1991 и 15 июнь — Франц Легарын «Граф Люксембург», шӹндӹшӹ режиссёр Михаил Бурцев
  • 1997 и 8 январь — Фредерик Лоун «Мӹньӹн цевер ледиэм», шӹндӹшӹ режиссёр Михаил Бурцев
  • 2001 и 3 декабрь — Имре Кальманын «Сильва», шӹндӹшӹ режиссёр Светлана Акчурина
  • 2003 и 14 ноябрь — Имре Кальманын «Мистер Икс», шӹндӹшӹ режиссёрвлӓ Константин Иванов дӓ Светлана Акчурина
  • 2005 и — Имре Кальманын «Марица», шӹндӹшӹ режиссёр Герард Васильев
  • 2008 и 4 июль — Иоганн Штраусын «Цӓрӓгаля», шӹндӹшӹ режиссёр Светлана Акчурина
  • 2009 и 12 декабрь — Евгений Птичкинӹн «Ӹдӹрӓмӓш пыдыранзык», шӹндӹшӹ режиссёр Светлана Акчурина
  • 2010 и 4 май — Пал Абрахамын «Савойыштышы бал», шӹндӹшӹ режиссёр Ольга Маликова
  • 2022 и 26 ноябрь — «Кым мушкетёр», шӹндӹшӹ режиссёр Сергей Шепелёв

Наградывлӓ

  • Россий Федерацин театр искусствыжым виӓнгдӹмӓшкӹ шукы вим пумы гишӓн Россий Федераци Правительствын Фёдор Волков лӹмӓн премижӹ (2016 и 19 июль)[15].

Библиографи

  • Махновец М. Спектакль яркий и самобытный // Марийская правда : газета. — Йошкар-Ола, 1973. — № 18 февраля.
  • Рая Э. Богатство национальной пластики // Марийская правда : газета. — Йошкар-Ола, 1973. — № 20 февраля.
  • Артищева Р. В. Анатолий Луппов и марийская музыка. — Йошкар-Ола: Марийское книжное издательство, 1986. — 61 с.
  • Федоренко Е. Будешь плохо учиться — поедешь в Йошкар-Олу // Культура : газета. — М., 2004. — № 5.
  • Пузанова Н. Начало положено. Гастроли Марийского театра оперы и балета // Удмуртская правда : газета. — Ижевск, 2009. — № 2 октября.(недоступная ссылка)
  • Макарова Н. А. Первый марийский национальный балет А. Луппова «Лесная легенда» // Молодой учёный : журнал. — Чита, 2011. — № 8.

Примечани

  1. ↑ История театра Архивный копи от 13 августын 2014 на Wayback Machine на сайте Марийского театра оперы и балета
  2. ↑ В. Г. Кузнецова, Л. И. Кульшетова, В. И. Чеснокова. Композиторы и музыковеды Республики Марий Эл. — Йошкар-Ола: Типография Правительства Республики Марий Эл, 2006. — С. 248—250. — 266 с. — 1000 экз. — ISBN 5-87898-318-4.
  3. ↑ Отделение «Хореографическое искусство» Архивный копи от 18 апрельӹн 2012 на Wayback Machine на сайте Марийского Республиканского колледжа культуры и искусств имени И. С. Палантая
  4. ↑ Отделение «Хореографическое искусство»(недоступная ссылка) на сайте Марийского театра оперы и балета
  5. ↑ Галина Кныш-Ковешникова. В Йошкар-Оле пела Монтсеррат Кабалье! (руш.). «Марийская правда» (11 октябрьын 2006). Тергӹмӹ кечӹ: 6 ноябрьын 2014. Архивируйымы 6 ноябрьын 2014 года.
  6. ↑ Марийский государственный театр оперы и балета им. Эрика Сапаева. Тергӹмӹ кечӹ: 22 декабрьын 2014. Архивировано из оригинала 22 декабрьын 2014 года.
  7. ↑ Ещё один фестивальный проект Марийского театра оперы и балета. Тергӹмӹ кечӹ: 22 декабрьын 2014. Архивировано из оригинала 22 декабрьын 2014 года.
  8. ↑ Марийский государственный театр оперы и балета удостоен звания «Академический» (руш.). Кидшер (Пульс). kidsher.ru. Тергӹмӹ кечӹ: 15 ноябрьын 2018. Архивируйымы 16 ноябрьын 2018 года.
  9. ↑ О присвоении государственному автономному учреждению культуры Республики Марий Эл «Марийский государственный театр оперы и балета имени Эрика Сапаева» звания «Академический» (руш.). Республика Марий Эл. Официальный интернет-портал (12 ноябрьын 2018). Тергӹмӹ кечӹ: 16 ноябрьын 2018. Архивируйымы 22 декабрьын 2018 года.
  10. ↑ 1 2 Марийский государственный театр оперы и балета им. Эрика Сапаева. Тергӹмӹ кечӹ: 22 декабрьын 2014. Архивируйымы 22 декабрьын 2014 года.
  11. ↑ Театр как произведение искусства Архивный копи от 14 августын 2014 на Wayback Machine на официальном интернет-портале Республики Марий Эл
  12. ↑ Балет на сцене и на площади Архивный копи от 22 октябрьын 2013 на Wayback Machine // Газета «Йошкар-Ола», 11 октября 2011 года
  13. ↑ Марийский государственный театр оперы и балета им Э. Сапаева (Йошкар-Ола). Тергӹмӹ кечӹ: 5 ноябрьын 2011. Архивируйымы 14 январьын 2022 года.
  14. ↑ Дмитрий Медведев: «Театр, как принято говорить, классный». Тергӹмӹ кечӹ: 13 августын 2014. Архивируйымы 13 августын 2014 года.
  15. ↑ Распоряжение Правительства Российской Федерации от 19 июля 2016 года № 1543-р

Литература

Ссылкывлӓ

«https://mrj.ruwiki.ru/w/index.php?title=Эрик_Сапаев_лӹмӓн_Мары_кугижӓншӹ_академический_опера_дӓ_балет_театр&oldid=314917» гӹц нӓлмӹ