Сӓмӹрӹквлӓн мары театр
| Сӓмӹрӹквлӓн мары театр | |
|---|---|
 Театрын пӧртшӹ 2017 ин | |
| Первишӹ лӹм | Мары Эл Республикӹштӹшӹ тетявлӓлӓн дӓ сӓмӹрӹквлӓлӓн театр-центр (2015—2017) |
| Театрын типшӹ | сӓмӹрӹквлӓн театр |
| Негӹцлӹмӹ | 1991 |
| Негӹцлӹшӹ | Олег Иркабаев-Этайн |
| Театрын пӧртшӹ | |
| Вӓрлӓнӹмӓш | Йошкар-Ола |
| Адрес | Вознесенский ӧл., 87-шӹ пӧрт |
| 56°37′50″ с. ш. 47°53′55″ в. д.GЯO | |
| Пачмы | 1989 и |
| Расширено | 2015—2017 |
| Вуйлатымаш | |
| Директор | Пуртов, Андрей Петрович |
| Художественный вуйлатышы | Олег Иркабаев-Этайн |
| Тӹнг художник | Алексей Голубцев |
| Сайт | mari-tuz.ru |
 |
|
Сӓмӹрӹквлӓн мары театр (руш. Марийский театр юного зрителя) — Йошкар-Олашты вӓрлӓнӹшӹ театр, тӹдӹ коговлӓлӓн, тетявлӓлӓн дӓ сӓмӹрӹквлӓлӓн мары дӓ руш сӹлнӹшаян классиквлӓжӹн, вескид сӓндӓлӹквлӓштӹшӹ авторвлӓн пьесӹвлӓштӹ семӹнь спектакльвлӓм марла дӓ рушла шӹндӓ.
Эртӹмӹ корны
1991 ин 12 апрельӹн художественный вуйлатышы Олег Иркабаев-Этайнын тӹнгӓлмӹжӹ доно Сӓмӹрӹквлӓн мары театр семӹнь пачылтын. Творчествын пӹтӓришӹ ивлӓнжӹ Мары ТЮЗ Георгий Константинов лӹмеш руш академический драма театрын сценӹштӹжӹ, варажы — Республикӹштӹшӹ поханя театрын сценӹштӹжӹ постановкывлӓм шӹндӹлӹн. Пӹтӓришӹ постановкывлӓ лошты Сергей Николаевын «Айвика» сем драмыжы, Михаил Рыбаковын «Яндар дон Шӹмӓви» ямакшы дӓ М. Шкетанын «Эх, тӹнь, ӹлӹмӓшнӓжӓт!..» комедижӹ ылыныт.
2002 гӹц 2015 и якте М. Шкетан лӹмӓн Мары халык драма театрын филиалжы ылын. 2014 ин шӹжӹм поханя театр у зданиш ванжен, тенге Мары ТЮЗ пӹтӓришӹ гӓнӓ ӹшке сценӹжӹм мон.
2015 ин Мары ТЮЗ «Мары республикӹштӹшӹ тетявлӓлӓн дӓ сӓмӹрӹквлӓлӓн театр-центр» (руш. Марийский республиканский театр-центр для детей и молодёжи) Мары Эл Республикӹштӹшӹ ӹшке вуя Кугижӓншӹ автономный культура учреждениш сӓрнӓлтӹн. 2017 ин театрлан молнамшы лӹмжӹм пӧртӹлтӹмӹ — «Сӓмӹрӹквлӓн мары театр».
2023—2024 ивлӓн зданим уэмден чангымы пӓшӓ эртӓрӓлтӹн. 2024 ин 19 декабрьын театр реконструкци паштек пачылтын[1].
Репертуар
1990-шы ивлӓ покшал гӹц театр спектакльвлӓм кок йӹлмӹ доно шӹндӓ: марла дӓ рушла. Нӹнӹ шукынжок тӹшкӓ анжышывлӓлӓн ылыт, тидӹн гӹц пасна театрын репертуарыштыжы изирӓк анжышывлӓлӓн дӓ когорак классвлӓштӹ тыменьшӹвлӓлӓн шукы спектакль улы. Тидӹ мары дӓ руш сӹлнӹшая классиквлӓн, вескид сӓндӓлӹкӹштӹшӹ авторвлӓн пьесӹвлӓштӹ семӹнь шӹндӹмӹ спектакльвлӓ. Театр пӹтӓришӹ кечӹвлӓжӹ гӹцок кӹзӹтшӹ халык драматургвлӓ доно цаткыдын кӹлӹм кыча.
Театрын репертуарыштыжы коговлӓлӓн, тетявлӓлӓн дӓ сӓмӹрӹквлӓлӓн 35 постановка нӓрӹ улы. Театрым пачмы кечӹ гӹц сценӹштӹжӹ цилӓжӹ 80 нӓрӹ премьера ылын.
Актёрвлӓ
Труппышты кӱшӹл дӓ кӹдӓлӓш специальный образованиӓн лӹмӹн йӓмдӹлӹмӹ 28 актёр пӓшӓм ӹштӓ, нӹнӹ логӹц 15-шӹ сакой ивлӓн Луначарский лӹмӓн ГИТИС-ӹм тымень пӹтӓрен.
Гастроль дон фестивальвлӓ
Труппа пӹтӓришӹ гӓнӓ вескид сӓндӓлӹкӹш 1994 дӓ 1996 ивлӓн Эстониш «Фенно-угория» ушемӹн ӱжмӹжӹ доно Халык патырын кечӹжӹм айымашкы Г. Гордеевӹн «Ӧртӧмӧ князь», «Болтуш» дӓ «Мӹнь ам сукалты соикток» истори трилогижӹ доно каштын.
2002 ин театр гастрольвлӓм эртӓрӓш РФ Президент Владимир Путинӹн грантшым сӹнген нӓлӹн. Гастроль корны Мары Эл Республика мычкы веле агыл, тенгеок марынвлӓн тӹшкӓн ӹлӹмӹ вӓрвлӓштӹ Татарстанышты, Башкириштӹ, Удмуртиштӹ, Кировышты, Угарманышты, Свердловск областьышты, Пермь крайышты дӓ Российӹн вес вӓрвлӓштӹжӹ эртӓ.
Сӓмӹрӹквлӓн мары театр тӹрлӹ фестивальвлӓштӹ участвуен: «Бомба» (Нурмес, Финлянди, 1999), тетя дон сӓмӹрӹквлӓлӓн спектакльвлӓн «Божественная искорка» международный фестиваль (Сыктывкар, 2000), «Ламбушка» камерный спектакльвлӓн международный фестиваль (Петрозаводск, 2002), «Золотой конёк» международный фестиваль (Тюмень, 2006), «Коляда-Plays» (Екатеринбург, 2014). 1997 и гӹц Мары ТЮЗ седок финн-угр халык театрвлӓн «Майатул» международный фестивальышты, 2009 и гӹц и каждый ин руш театрвлӓн «Келшӹмӓш кӹвер» фестивальышты (Йошкар-Ола) дӓ 1990-шы ивлӓ гӹц «Йошкар-Ола театральная» фестивальышты ӹшке пӓшӓжӹм анжыкта[2].
2006 ин ноябрьын театрышты «Сӓмӹрӹквлӓн мары театр сценӹштӹ халык драматурги» фестиваль эртен, тӹштӹ театрын 15 и жепӹштӹ шӹндӹмӹ 15 сек яжо спектакльым анжыктымы. 2007 ин ноябрьын «Сӓмӹрӹквлӓн театр сценӹштӹ руш классика дӓ кӹзӹтшӹ драматурги» фестиваль эртен.
2020 и гӹц театр Российӹштӹшӹ сӓмӹрӹквлӓн театрвлӓн «Тетявлӓлӓн дӓ сӓмӹрӹквлӓлӓн кӹзӹтшӹ пьеса» фестивальым эртӓрӓ, тӹдӹ кок иэш ик гӓнӓ эртӓрӓлтеш[3][4].
Примечани
- ↑ Марийский театр юного зрителя открыли после реконструкции в Йошкар-Оле, TACC (19 декабрьын 2024). Дата обращения: 14 августын 2025.
- ↑ Марийский театр юного зрителя — Министерство культуры, печати и по делам национальностей Республики Марий Эл (руш.). mincult12.ru. Тергӹмӹ кечӹ: 14 августын 2025.
- ↑ В Йошкар-Оле проходит первый фестиваль ТЮЗов — Министерство культуры, печати и по делам национальностей Республики Марий Эл (руш.). mincult12.ru. Тергӹмӹ кечӹ: 14 августын 2025.
- ↑ Фестиваль театров юного зрителя стартовал в Йошкар-Оле — Министерство культуры, печати и по делам национальностей Республики Марий Эл (руш.). mincult12.ru. Тергӹмӹ кечӹ: 14 августын 2025.
Литература
- Театр юного зрителя // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 746—747. — 872 с. — 3505 экз. — ISBN 978-5-94950-049-1.
Ссылкывлӓ
- Марийский театр юного зрителя (руш.). www.mari-tuz.ru. Тергӹмӹ кечӹ: 14 августын 2025.
- История театра - Марийский республиканский театр-центр для детей и молодёжи (руш.). web.archive.org. Тергӹмӹ кечӹ: 14 августын 2025.
