Юшкина, Ирина Владимировна
| Ирина Юшкина | |
|---|---|
| Ирина Владимировна Юшкина | |
 | |
| Тӹнг увер | |
| Тӹрӹс лӹм | Ирина Владимировна Юшкина |
| Шачмы кечӹ | 1987 и 7 февраль (38 и) |
| Шачмы вӓр |
|
| Професси |
мырызы |
| Жанр | халык, поп |
Ирина Юшкина (тӹрӹс лӹмжӹ — Ирина Владимировна Юшкина; шач. 7 февраль 1987, Пӹнгельмычаш[d], Пайскырык вел солавлӓ) — мырызы, культура пӓшӓзӹ. «Изи шӹдӹрвлӓ» мырышы студим видӓ.
Ӹлӹмӓш корныжы
Ирина Юшкина Мары Эл Республикӹштӹшӹ Кырык мары районын Пӹнгельмычаш солаэш шачын. Вершиносумка кӓндӓкшиӓш школым, Пайскырык кӹдӓлӓш школым тымень пӹтӓрӹмӹкӹжӹ, Мары кугижӓншӹ университетӹш культура дӓ искусствывлӓн факультетӹш тыменяш пырен. Университетӹм тымень лӓкмӹкӹ, йӓнгжӹ эче пакыла тыменяш ӱжӹн. И. С. Палантай лӹмеш культура дӓ искусствывлӓн колледжӹш «Эстрадный вокал» отделениш пырен. Тӹдӹм заочно тымень пӹтӓрен, тӹ жепӹнок Макарсир дӓ Пайскырык культура томавлӓштӹ пӓшӓлен.
Изижӹ годым Ирина ямаквлӓм лыдаш пиш яратен, тымдышы лиӓш шанен, мырен мыштымыжы гишӓн тумайыдеӓт. Папажы Зинаида Ивановна Юшкина (Гайдова) халык мырывлӓм мырен, пиш кушташ яратен. А тьотяжы, Евтихий Павлович Юшкин гармоньым пиш яжон шактен мыштен. Седӹндон векӓт нӹнӹн тетявлӓштӹ дӓ ыныкавлӓштӓт тенгеок мыры докы шӱмӓн ылыт [1]. Иринан ӓтяжӹ Владимир Евтихиевич — самодеятельный композитор, лӹмлӹ мырызы. Дӓ Иринаат ти корнымок ташка.
Пӹтӓриш гӓнӓ сценӹш Ирина 23 и перви лӓктӹн. Тӹнӓм Кырык мары районышты эртӓрӓлтшӹ тетявлӓн смотрышты тӹдӹ «Со вазат ӓшеш» мырым йонгалтарен. 2003 ин ӓтяжӹ «Кырык марла шиэш йӓнг» мырым сирен, ти мыры доно Ирина «Мыры-2003» конкурсышкы лӓктӹн, дӓ тӹнӓм «Дебют года» номинациштӹ сӹнгӹшӹ лин[1].
Варажы шукы всероссийский, межрегиональный, республиканский дӓ районный конкурсвлӓштӹ ӹшке мастарлыкшым анжыктен. 2014 ин «Мыры — 2014» конкурсын гран-прим сӹнген нӓлӹн, 2015 ин финно-угр халыквлӓн сӓмӹрӹк мырызывлӓн «Ший памаш» IV-шӹ Межрегиональный фестиваль-конкурсышты тенгеок гран-прим сӹнген нӓлӹн[2]. 2017 ин июнь тӹлзӹн Сасово халашты Рязанский областьышты А. Аверкин лӹмеш халык мырывлӓн 20-шы Всероссийский фестиваль-конкурсышты 1 вӓрӹм пуэнӹт. Шӹжӹм Россий Федерацин дӓ Мары Эл Республикӹн культурын заслуженный пӓшӓзӹжӹ Арсений Арсеньевич Яйцов доно «Музыка Земли» всероссийский конкурсыш Москваш каштын толыныт[3]. «Радио России» гач Иринан мырывлӓжӹ тӹнӓм пӹтӓриш гӓнӓ йонгалтыныт.
Кӹзӹтшӹ жепӹн Ирина Кырык мары централизованный клубный системӹн методист пӓшӓм ӹштӓ. «Аяр» группышты солист семӹнь мыра, тенгеок Пайскырык церкӹн хорышкы мыраш каштеш.
Ирина «Изи шӹдӹрвлӓ» студижӹм пачын, тӹштӹ тетявлӓ кырык мары мырывлӓм мыраш тыменьӹт[4].
Семняжӹ
Иринан пелӓшӹжӹ — Александр Ильинов, Ксения ӹдӹрӹм куштат.
Примечани
- ↑ 1 2 Сердце бьётся по-горномарийски (руш.). Национальный акцент. Тергӹмӹ кечӹ: 30 октябрьын 2025.
- ↑ В Йошкар-Оле выбрали лучших исполнителей национальной эстрадной песни, Кидшер (26 ноябрьын 2015). Дата обращения: 30 октябрьын 2025.
- ↑ Представители Марий Эл приняли участие в фестивале-конкурсе «Музыка Земли», potokmedia.ru (7 ноябрьын 2017). Дата обращения: 30 октябрьын 2025.
- ↑ «Изи шӹдӹрвлӓ» - «Маленькие звездочки». kultgormari-eshpai.tilda.ws. Тергӹмӹ кечӹ: 30 октябрьын 2025.
