Маюк-Егоров, Алексей Иванович
| Алексей Иванович Маюк-Егоров | |
|---|---|
 | |
| Шачмы годшы лӹм | Алексей Иванович Егоров |
| Шачмы кечӹ | 19 февраль 1905 |
| Шачмы вӓр | Изи Шӹндӹр сола, Азан губерни, кӹзӹт Кырык мары район, Мары Эл |
| Колымы кечӹ | 31 октябрь 1938 (33 и) |
| Колымы вӓр | |
| Професси |
актёр, театральный режиссёр |
| Пыт пӓшӓлӹмӹ жеп | 1927-1938 |
| Театр | М. Шкетан лӹмӓн мары халык драма театр |
Алексей Иванович Маюк-Егоров (19 февраль 1905, Изи Шӹндӹр — 31 октябрь 1938, Йошкар-Ола) — советский дӓ мары театральный актёр дӓ режиссёр. Пӹтӓришӹ марын режиссёр-профессионаллан шотлалтеш.
Ӹлӹмӓш корныжы
Алексей Иванович Егоров кӹзӹт пӹтӹшӹ (Чебоксарыштышы ГЭС-ӹм ӹштӹмӓшеш вӹд кузымы велдӹк) Изи Шӹндӹр солашты церкӹштӹ служышын семняштӹжӹ шачын. Совет власть ылмы годым тӹдӹн ӓтяжӹм репрессируенӹт да кым иэш суенӹт. Алексей Егоров Изи Шӹндӹр школышты, вара Цикмӓштӹ тыменьӹн. 1919-шӹ и гӹц 1927-шӹ и якте сакой пӓшӓм ӹштен: шӹргӹм йӧрӹмӓштӹ пум пилӹшӹ ылын, кӹрпӹц оптышы ылын, кемӹм ырген, сола школышты тымден дӓ тӹлец молат.
1927-шӹ ин октябрь тӹлзӹн Краснокошайск халашты (кӹзӹт Йошкар-Ола) ылшы Музыкально-драматический искусствын мары студишкӹ пырен. Профессиональный мастарлыкан корнышкы шагалаш тӹнгӓлшӹ Мары кугижӓншӹ театрын (кӹзӹт М. Шкетан лӹмӓн Мары халык драма театр) актёржы лин, ӹшкӹлӓнжӹ Маюк мары псевдонимӹм нӓлӹн. 1930-шы ин труппыжы сага Москвашты лин, тӹштӹ Мары кугижӓншӹ театр СССР-ын халыквлӓн театрвлӓн дӓ искусствывлӓн I Союз кымдыкаш олимпиадышты тӓнгӓшен. Тӹ инок Маюк-Егоров А. В. Луначарский лӹмӓн театральный искусствывлӓн кугижӓншӹ институт сага ылшы Театральный искусствын тӹнг техникумын (ЦЕТЕТИС) драматический отделенишкӹжӹ пырен. Ик иштӹ ГИТИС-ӹн режиссёрский отделенишкӹжӹ, МХАТ-ын режиссёржы Илья Судаковын курсышкыжы ванжен. Курсышты Василий Качалов, Всеволод Мейерхольд, Иван Москвин тымденӹт.
Мары кугижӓншӹ театрын режиссёржы
ГИТИС-ӹм пӹтӓрӹмӹкӹ, 1936-шы ин Маюк-Егоров Мары кугижӓншӹ театрышкы церотан режиссёрлан нӓлмӹ лин, август тӹлзӹн тӹдӹм тӹнг режссёрлан шагалтенӹт. Маюк-Егоров театрын репертуаржым вашталтымы дӓ уэмдӹмӹ шотышты шукы кымда шанымашым намалын. Шукы йиш пьесӹм мары йӹлмӹшкӹ сӓрӹмӹ пӓшӓшкӹ кымдан пӓлӹмӹ мары сирӹзӹвлӓм ӱжмӹ — Сергей Чавайным, М. Шкетаным, Олык Ипайым, Прокопий Карпов-Пӱнчерскийӹм дӓ тӹ жепӹн мары культурышты пыт пӓшӓлӹшӹ молы мастарвлӓмӓт.
1936-шы ин Маюк-Егоров мары драматург Сергей Николаевӹн «Полатовын сӱӓнжӹ» («Свадьба Полатова») пьесӹжӹ доно пӓшӓм тӹнгӓлӹн. 1937-шӹ ин май тӹлзӹн спектакль «Салика» лӹм доно йӓмдӹ ылын, тенге гӹнят МАССР-ын СНК сагашы Искусствывлӓ шотышты управленин приёмочный комиссижӹ пьес ваштареш лин, тӹдӹм «националистическая» манын пӓлдӹртен, а тӹнг режиссёр искусство йӧн доно палшымы велдӹк националистический шанымашвлӓм шӓрӹшеш шотлалтын дӓ ӧпкӓлӹмы лин. 1937-шӹ ин июнь тӹлзӹн Маюк-Егоровым дӓ тӹдӹн вӓтӹжӹм, актриса Анастасия Филипповам театр гӹц лыктын колтенӹт.
1937-шӹ-1938-шӹ иӓш театральный сезон пачмашеш Маюк-Егоров Мары кугижӓншӹ театрышкы церотан режиссёр семӹнь пӧртӹл кердӹн. Тӹдӹ музыкальный комеди «Салика» доно пӓшӓжӹм пӹтӓрен, премьера 1938-шӹ 5 апрельӹн лин. Спектакль зрительвлӓлӓн пиш келшен, тенге гӹнят икманяр жепӹштӹ тӹдӹм репертуар гӹц карангденӹт.
Арестуйымаш, суд, казнен пуштмаш
1938-шӹ ин 11 июньын Маюк-Егоровым, тыдӹн вӓтӹжӹм, актриса Анастасия Филипповам дӓ Мары кугижӓншӹ театрын молы икманяр артистшӹм арестуенӹт. Нӹнӹм террористический организаци доно кӹлӹм кычымышты гишӓн ӧпкӓлен суенӹт. 1938-шӹ ин 29 октябрьын МАССР-ын НКВД-ын «пасна кымытанын» шотлымыжы велдӹк нӹнӹ цилӓн лӱэн пуштшашлыклан шотлалтыныт, 1938-шӹ ин 31 октябрьын нӹнӹм лӱэн пуштыныт.
1956-шы ин 20 августын МАССР-ын Верховный судын решӹмӹжӹ доно Алексей Иванович Маюк-Егоров преступлени уке лимӹ велдӹк колымы паштек реабилитируйымы лин.
Сценографи
режиссёр семӹнь:
- 1933 — «Шурны» / Урожай (М. Шкетан)
- 1936 — «Доходан вӓр» / Доходное место (А. Островский)
- 1937 — «Дубровский» (А. Пушкин)
- 1937 — «Шӹргӹ» / Лес (А. Островский)
- 1938 — «Ӹшкет парус» / Белеет парус одинокий (В. Катаев)
- 1938 — «Салика» (С. Николаев)
актёр семӹнь (айырымы):
- Микита (Лев Толстой «Пӹцкемӹш лошты» / Власть тьмы)
- комсомольский вожак Тимошка (спектакль по поэме А. Жарова «Гармонь»)
- объездчик Епсей (С. Чавайн «Мӱкш отар» / Пасека)
- Кугуяр (С. Чавайн «Кугуяр»)
- Немой (Апай) (Е. Яновский «Шыде» / Ярость)
Ӓштӹмӓш
- Йошкар-Олаштышы Звёздный микрорайонышты тӹдӹн лӹмеш ӧлицӓ (улица Егорова)
- Маюк-Егоровын шачмыжылан 110 и теммӹ лӹмеш Изи Шӹндӹр-Шӹндӹръйӓл тӹнг общеобразовательный школышты ӓштӹмӓш ханга[1].
Примечани
- ↑ К 110-летию А. Маюк-Егорова, М.Шкетан лӱмеш Марий кугыжаныш драме театр (13 февральын 2015). Дата обращения: 12 октябрьын 2025.
Литература
- Зайниев Г. З. Маюк-Егоров Алексей Иванович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 276. — 606 с. — 1500 экз. — ISBN 978-5-905314-35-3.
- Энциклопедия театров Республики Марий Эл: иллюстрированное научно-популярное издание / [Министерство культуры, печати и по делам национальностей Республики Марий Эл и др.; редкол.: К. А. Иванов (пред.) и др.; авт.-сост.: Белецкая Е. С. и др.]. — Йошкар-Ола, 2019. — 259 с.: ил., портр.