Кочергина, Елена Еремеевна
| Елена Еремеевна Кочергина | |
|---|---|
 | |
| Шачмы кечӹ | 1928 и 3 февраль |
| Шачмы вӓр | Олор, Мары автономный область, РСФСР, СССР |
| Колымы кечӹ | 2002 и 18 январь (73 и) |
| Колымы вӓр | Олор, Параньга район, Мары Эл, Россий |
| Гражданство |
 СССР, Россий |
| Пӓшӓн типшӹ | Итӹнӹм шишӹ |
| Награда дӓ премивлӓ |
|
Елена Еремеевна Кочергина (1928-шӹ и 3-шы февраль, Олор сола, Мары автономный область, РСФСР, СССР — 2002-шы и 18-шӹ январь, Олор, Параньга район, Мары Эл, Россий) — итӹнӹм шишӹ, Мары АССР-ыштышы Параньга районын Палантай лӹмӓн колхозыштыжы Мари-Турек МТС-ӹн звеньевойжы. Социалистический Пӓшӓн Геройжы (07.03.1960).
Ӹлӹмӓш корныжы
Елена Еремеевна Кочергина 1928-шы ин 3-шы февральын Мары автономный областьын Олор солаштыжы шачын. 1935-шӹ ин Олор шӹмиӓш школыш тыменяш кен. Вырсы тӹнгӓлмӹ годым тӹдӹн ӓтяжӹ Кочергин Еремей ӹшке кымылын фронтыш кен, Польша цик сага кредӓлӹн. Фронтеш колен.
Пӓшӓм туан солаштыжы 13 иӓшӹн ӹштӓш тӹнгӓлӹн. Школышты яжон тыменьӹн дӓ педагогический училищӹш пырен. Но тымень пӹтӓрӹде, ӓвӓжӹ когон ясы лин дӓ тӹдӹ сага лиӓш келӹн. Туан солашкыжы пӧртӹлӹн дӓ пӓшӓм ӹштӓш тӹнгӓлӹн. Ӹшке ядмыжы семӹнь итӹнӹм шишӹвлӓ курсыш колтенӹт. Пӧртӹлмӹкӹжӹ, Мари-Турек МТС-ӹштӹ звеньевоеш пӓшӓм ӹштӓш тӹнгӓлӹн. Пӓшӓштӹ тӹнгӓлтӹш гӹцок кого лӓктӹшӹм анжыктен[1].
1958-шӹ ин Кочергинан пӓшӓм ӹштӹмӹ колхозышты 100 гектар итӹн кушкын. Цилӓ ти кымдыкым пӓшӓ мастар ӹдӹрӓмӓш, кечеш кым-нӹл нормым ӹштен, кӓндӓкш кечӹштӹ шин лӓктӹн. Вес иэш тӹдӹлӓн «Республикӹн сек яжо итӹн анжышыжы» лӹмӹм пуэнӹт[2].
Пиш кого сӹнгӹмӓшлӓн дӓ айыртемӹнок общественный пӓшӓжӹ гишӓн Социалистический Пӓшӓн Геройжы лӹмӹм пумы дӓ Ленин орден доно пӓлемдӹмӹ. Тӹдӹ Мары АССР-ӹштӹ ти кого лӹм доно пӓлемдӹмӹ пӹтӓришӹ ӹдӹрӓмӓш ылеш.
1962-шы ин колхозниквлӓ тӹдӹм СССР-ӹн Верховный Советшӹн 6-шы созывшын депутатешӹжӹ айыренӹт. Тӹ инок тӹдӹ партиш пырен.
Шавашар халаштышы Суасламары советско-партийный школыш тыменяш колтенӹт. 1966-шы ин тӹдӹм пӹтӓрӹмӹкӹ, партин Параньга райкомжын инструкторешӹжӹ шагалтенӹт. Но парти пӓшӓштӹ шукы ровотайыде, ӹшке солашкыжы нелӹ пӓшӓ вӓрӹш колташ ядын. Шӹшер-товарный ферма вуйлатышеш шагалтенӹт.
Художественный самодеятельностьышты активно участвуен: спектакльвлӓштӹ сакой рольым мадын, концертвлӓштӹ выступаен.
Ӹшкетшок Владислав эргӹм анжен куштен, тӹдӹ Мары кугижӓншӹ университетӹм тымень пӹтӓрен дӓ агроном лин[3].
2002-шы ин 18-шӹ январьын колен.
Наградывлӓ
- Социалистический Пӓшӓн Геройжы (07.03.1960)
- Ленин орден (1960)
- Октябрь Революци орден (14.02.1975)
- ВДНХ-н той медальжы (1954 )
- ВДНХ-н ши медальжы (1955)
- Мары АССР-ӹн Верховный Советшӹн Президиумжын почётный грамотыжы (1978)
Примечани
- ↑ Кочергина Елена Еремеевна (руш.). www.warheroes.ru. Тергӹмӹ кечӹ: 7 февральын 2019. Архивируйымы 9 февральын 2019 года.
- ↑ Героем Соцтруда стала 8 марта (руш.). www.marpravda.ru. Тергӹмӹ кечӹ: 7 февральын 2019. Архивируйымы 9 февральын 2019 года.
- ↑ Жизнь, посвящённая земле | МО "Параньгинский муниципальный район" (руш.). www.paranga.ru. Тергӹмӹ кечӹ: 7 февральын 2019. Архивировано из оригинала 9 февральын 2019 года.
Литература
- Кочергина Елена Еремеевна // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 451. — 872 с. — 3505 экз. — ISBN 978-5-94950-049-1.
- Опарина Т. Т. Кочергина Елена Еремеевна // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 221. — 606 с. — 1500 экз. — ISBN 978-5-905314-35-3.