Карпеев, Владимир Михайлович
| Владимир Михайлович Карпеев | |
|---|---|
.jpg) | |
| Шачмы кечӹ | 29 сентябрь 1938 (87 и) |
| Шачмы вӓр | Бородино, Гаврилово-Посадский районышты, Иваново область, РСФСР, СССР |
| Сӓндӓлӹк | |
| Жанр |
скульптор, медальер, портретист |
| Тыменьмӓш | Москваштышы кӱшӹл промышленно-художественный училище |
| Стиль | реализм, монументализм |
| Награда | СССР Художниквлӓн ушемӹн I степенян дипломжы |
| Звани | Мары Эл Республикӹн заслуженный художникшӹ (1999) |
Владимир Михайлович Карпеев (шач. 29 сентябрь 1938, Бородино[d], Иваново область[d]) — совет дӓ россий художник, скульптор, 1973 и гӹц СССР художниквлӓн ушемӹн член. РСФСР Художественный фондын Мары мастерскойвлӓжӹн пӓшӓзӹжӹ (1967-1988). Мары Эл Республикӹн заслуженный пӓшӓзӹжӹ (1999).
Ӹлӹмӓш корныжы
1938 ин 29 сентябрьын Иваново областьстьышты Гаврилово-Посад районыштышы Бородино солаэш шачын[1][2].
1959 ин Москваштышы М. Калинин лӹмӓн промышленно-художественный училищӹм тымень пӹтӓрен. Тӹдӹм пӹтӓрӹмӹкӹ, Краснодар крайышты гипс кӱ гӹц хӓдӹрвлӓм лыкшы комбинатышты пӓшӓлен. 1967 ин Москваштышы кӱшӹл художественно-промышленный училищӹм пӹтӓрен[1][2].
1967 ин Йошкар-Олаш ӹлӓш ванжен дӓ Мары АССР Художниквлӓн ушемӹн творческий пӓшӓшкӹжӹ ушнен, 1988 и якте — РСФСР Художественный фондын Мары мастерскойвлӓжӹн пӓшӓзӹжӹ[1][2].
Кӹзӹт Йошкар-Олашты ӹлӓ дӓ пӓшӓлӓ[2][3].
Художественный творчествыжы
1973 ин республикӹштӹшӹ, всесоюзный, мировой выставкывлӓштӹ участвуйышы дӓ кого наградывлӓм нӓлшӹ медальер искусствыштышы пӓшӓвлӓжӹ гишӓн СССР Художниквлӓн ушемӹш пыртенӹт[1][2][4].
Сек анзыц станковый дӓ монументальный скульптурывлӓн мастар семӹнь пӓлӹмӹ лин. Но тӹдӹ медальер искусствыштат пӓшӓлӓ, Мары республикӹштӹ ти искусствышты пӹтӓришӹвлӓ логӹц иктӹжӹ ылын, тенгеок портрет дӓ анималистика жанрышты. Российӹштӹшӹ дӓ международный выставкывлӓштӹ анжыкталтшы «Игорьын полкшы гишӓн шамак» (1969), «Джордано Бруно» (1968), «1961 и 12 апрель. Эдемӹн космосыш пӹтӓришӹ чонгештӹмӓшӹжӹ» (1974) пӓшӓвлӓжӹ доно пӓлӹмӹ ылеш. «Петров-Водкин» медаль (1971) дон «Кӹньӹл, кого сӓндӓлӹк!» диптих (1974) СССР художниквлӓн ушемӹн икшӹ степенян Дипломжым сӹнген нӓлӹнӹт[2][4].
Ӹдӹрӓмӓшвлӓн, эргӓшвлӓн, Кого Ӓтямӱлӓндӹ вырсы ветеранвлӓн, творческий интеллигенцин портретвлӓштӹн автор: сирӹзӹвлӓ А. С. Крупняковын (1973) дӓ С. Н. Николаевын (1976), архитектор П. А. Самсоновын (1972), академик В. П. Мосоловын, Совет Союз Герой М. А. Зарецкихӹн. Пӹтӓришӹ мары композитор И. С. Ключников-Палантайлан, мары ревкомын пӹтӓришӹ представительжӹ И. П. Петровлан (1980), хирург Г. Н. Качмашевлан (1982), Совет Союз Герой лётчик З. В. Семенюклан (2000) мемориал ангавлӓжӹ у пластический качествывлӓштӹ доно айыртемӓлтӹт[2][4].
«Тьыри» (1979), «Сола ӹрвезӓш» (1983), «Лыдшы» (1985), «Ӓнгӹр доны» жанровый композицивлӓжӹ скульпторын ӹлӹмӓш корныжы доно кӹлдӓлтӹнӹт[2][4].
Шукы скульптура пӓшӓжӹ Йошкар-Олашты вӓрлӓнӓт: «Ышкал дон презӹ» скульптурный композици, «Ӓвӓ ылмаш» скульптура, Мары Элӹн пӹтӓришӹ прокуроржы Н. М. Пискаевлӓн памятник дӓ молат[2][4][5].
Варшавышты дӓ Будапештӹштӹ, Москвашты дӓ Угарманышты, Йошкар-Олашты дӓ Российӹн вес халавлӓштӹшӹ выставкывлӓштӹ участвуен[2][6][7].
Художникӹн пӓшӓвлӓжӹ Мары Эл Республикӹн музейвлӓштӹжӹ перегӓлтӹт: Т. Евсеев лӹмӓн халык музейӹштӹ, Республикӹтӹшӹ изобразительный искусство музейӹштӹ дӓ сӓндӓлӹкӹн шукы вес музейвлӓштӹ, галерейвлӓштӹ дӓ частный коллекцивлӓштӹ[2].
1999 ин тӹдӹлӓн «Мары Эл Республикӹн заслуженный художникшӹ» лӹмӹм пумы. Мары АССР-ӹн Кӱшӹл Кӓнгӓш Президиумжы медаль дон Почётан грамотым кычыктен[1].
Ӓклӹмӓш
- Мары Эл Республикӹн заслуженный художникшӹ (1999)[1][4]
- Мары АССР Кӱшӹл Кӓнгӓш Президиумын Почётан грамотыжы (1989)[1]
Пӓлемдӹмӓш
- ↑ 1 2 3 4 5 6 7 Мочаев, 2017, с. 193.
- ↑ 1 2 3 4 5 6 7 8 9 10 11 Виртуальная выставка, посвященная творчеству Владимира Михайловича Карпеева | Республиканский музей изобразительных искусств. www.rmii.ru. Тергӹмӹ кечӹ: 26 августын 2025.
- ↑ Заслуженный художник Марий Эл Владимир Карпеев: "Скульптор — не профессия, это судьба". www.marpravda.ru. Тергӹмӹ кечӹ: 26 августын 2025.
- ↑ 1 2 3 4 5 6 Карпеев Владимир Михайлович (руш.). Марийская история в лицах. Тергӹмӹ кечӹ: 26 августын 2025.
- ↑ Творческие параллели (руш.). МариМедиа (31 декабрьын 2023). Тергӹмӹ кечӹ: 26 августын 2025.
- ↑ «Творение души и рук» | Республиканская детско-юношеская библиотека им. В.Х. Колумба(неопр.). Тергӹмӹ кечӹ: 26 августын 2025.
- ↑ В Йошкар-Оле открылась выставка автора известных в городе скульптур (руш.). МариМедиа. Тергӹмӹ кечӹ: 26 августын 2025.
Литература
- Прокушев Г. И. Карпеев Владимир Михайлович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 163. — 2032 экз. — ISBN 5-87898-357-0.
- Прокушев Г. И. Очерки о художниках Марий Эл // сост., отв. ред. Чеботкин В. А.. — Йошкар-Ола: Марийское книжное издательство, 2016. — 336 с.
- Прокушев Г. И., Мочаев В. А. Карпеев Владимир Михайлович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 193. — 606 с. — 1500 экз. — ISBN 978-5-905314-35-3.
Ссылкывлӓ
- Марийская история в лицах. Карпеев Владимир Михайлович (руш.). marihistory.ru.