Шаблий, Денис Сергеевич
| Денис Шаблий | |
|---|---|
 «КӸТӸК И» кинофестивальын якшар корныштыжы (2024) | |
| Шачмы кечӹ | 1 февраль 1990 (36 и) |
| Шачмы вӓр | |
| Сӓндӓлӹк | |
| Пӓшӓн типшӹ | актёр, кино ӓли телевидени режиссёр, монтажёр, сценарист, продюсер |
Денис Шаблий (тӹрӹс лӹмжӹ — Шаблий Денис Сергеевич; шач. 1 февраль 1990, Сернур[d], Мары АССР[d]) — российӹштӹшӹ актёр, режиссёр, продюсер дӓ монтажёр. «КӸТӸК И» лӹмӓн Йошкар-Олаштышы кинофестивальын генеральный продюсержӹ[1], «ШАБЛИЙ» киностудим пачшы. Национальный сӓмӹрӹквлӓн кинопремин, Мары Эл Республикӹн Олык Ипай лӹмеш кугижӓншӹ сӓмӹрӹквлӓн премин[2], «Мирлӓн пурын» премин лауреатшы.
Ӹлӹмӓш корныжы
1990-шы ин 1 февральын Мары АССР-шты Сернур посёлкышты ГИБДД-ын инспекторжын дӓ историм тымдышын семняштӹ шачын. Школышты тыменьмӹжӹ жепӹн поэтический, музыкальный, спортивный дӓ мастарлык конкурсвлӓштӹ ӹшкӹмжӹм анжыктен. Н. Заболоцкий лӹмӓн Сернурыштышы 2 номерӓн кӹдӓлӓш школым «Тыменьмӓшты айыртемӹн кӱкшӹцӹшкӹ шомылан» шӧртньӹ медӓль доно тымень пӹтӓрен. Кок гӓнӓ «Мастарлыкан тетявлӓ — Российӹн анзыкылашыжы» лӹмӓн Россий кымдыкаш энциклопедишкӹ пырталтын. «Гитара» класс доно И.Н. Молотов лӹмӓн Сернурыштышы искусствывлӓн тетявлӓн школым пӹтӓрен. Футбол дӓ волейбол доно II кого разрядым нӓлӹн. Школ паштек Мары кугижӓншӹ университетӹн юридический факультетӹшкӹжӹ тыменяш пырен. Студент жепӹн ӹшкӹмжӹм наукышты, спортышты, творческий дӓ общественный пӓшӓштӹ анжыктен. Вузын студентвлӓн дӓ аспирантвлӓн кӓнгӓшӹм вуйлатен, вузын Ученый советӹшкӹ пырен. Кугижӓншӹ управленин изирӓк академижӹм пӹтӓрен, Мары Эл Республикӹн Молодёжный парламентшӹн членжӹ ылын. Тыменьмӹ жепӹн Мары Эл Республикӹн культура, печать дӓ халыквлӓ лоштышы кӹл шотышты министерство сага ылшы «Астрея» правовой центрын юрисконсультлан пӓшӓлен, Мары кугижӓншӹ университетӹн воспитательный пӓшӓ шотышты отделым вуйлатен. 2012-шы ин Мары Эл Республикӹштӹ Интеллектуальный мадышвлӓн центрым пачын. Университетӹм якшар диплом доно пӹтӓрен, аспирантурышкы пырен. 2013-шы ин пӓшӓ гӹц карангын, аспирантурым коден дӓ Москвашкы ванжен[2], тӹштӹ ООО «Кинозавод»-шкы менеджерлан пырен, жеп эртӹмӹкӹ тӹдӹн генеральный директоржы лин. 2016-шы ин Первый каналын «Подмосковные вечера» шоушты сӹнгӹшеш лӓктӹн[3]. Тӹ инок «Останкино» лӹмӓн кино дӓ телевидени шотышты кӱкшӹ школын актёрский отделенишкӹжӹ пырен, Е.А. Германован мастерскойыштыжы тыменьӹн. Ти жеп гӹц отечественный сериалвлӓштӹ шукы снимаялтын. Денис Шаблий шайышт пуэн:
«Мӹлӓм ӹнде тенге чучын, вуйта анзылнем киностудивлӓн цилӓ амасавлӓштӹ пачылтыт. Тенге гӹнят, мӹньӹн сӹнем лач бандитвлӓлӓн, ӓль полицейскийвлӓлӓн, ӓль пашкуды масакла эдемвлӓм мадын анжыкташ веле яралеш лӓктӹн. Мӹлӓм угӹц торы ли»[2].
2018-шӹ ин Денис Шаблий тӓр тӱлӹдеок «Бармен» лӹмӓн ӹшкӹмжӹн пӹтӓришӹ мадмы кӹтӹк фильмӹм снимаен, тӹдӹ Национальный молодёжный кинопремин «Сек яжо режиссёр» лӹмӓн званилӓнжӹ номнацишкӹ пырталтын[4]. 2018-шӹ и гӹц Российӹштӹшӹ кинематографиствлӓн кӹлӹн Молодёжный центрышкыжы пӓшӓлӓш пырен, Дебютантвлӓн Россий кӱкшӹцӓш питчингӹн, Россий кӱкшӹцӓш молодёжный кинофорумын, Россий кӱкшӹцӓш «Короткометражный кинон кечӹжӹ» лӹмӓн акцин, «Ӹлӓш тӹнгӓлӹнӓ» Московский международный кинофестивальын продюсержӹ дӓ технический директоржы ылын, Российӹштӹ пӹтӓришӹ тӓр тӱлӹдеок ылшы «Дебют» лӹмӓн онлайн-киношколым пачын[5].
2019-шӹ ин Денис Шаблий Н.С. Михалков лӹмӓн кинематографический дӓ театральный искусствын академин режиссёрский отделенижӹн студентшӹ лиэш, В. Хотиненкон дӓ В. Фенченкон мастерскойыштышты тыменьӹн[4].
2021-шӹ ин Денис Йошкар-Олашкы пӧртӹлӹн[6], тӹштӹ «Не Иван, или как приручить Богатыря» (2021)[2], «У ЕҤ» (2022), «Ирга» (2023), «Чоткар» (2023)[7], «Плёвое дело» (2023) лӹмӓн фильмвлӓм снимаен. Фильмвлӓ 30 утла международный да Россий кӱкшӹцӓш кинофестивальвлӓн лауреатышты дӓ сӹнгӹшӹштӹ линӹт. 2021-шӹ ин SM-News изданин шотлымыжы доно «Регионын эдем»-жӹ лин. 2022-шы ин Мары Эл Республикӹн культура, печать дӓ халыквлӓ лоштышы кӹл шотышты министерство сага ылшы региональный кинематографим виӓнгдӹмӹ шотышты комиссишкӹ пырен. 2023-шы ин «Мары ямак» кинолабораторим пачын[2], тӹштӹ ПФО-штышы 695 тӹнгӓлшӹ кинематографиствлӓм кином снимаяш тымден лыктын. 2024-шӹ ин продюсер Ольга Филонова доно иквӓреш «КӸТӸК И» лӹмӓн Йошкар-Олаштышы кинофестивальым пачын. Тӹ инок ШЫП ЛИЙ псевдоним доно «Йошкар-Ола» лӹмӓн мары йӹлмӹ доно рэп-альбомым лыктын дӓ «Евразин юквлӓжӹ» лӹмӓн Россий кӱкшӹцӓн этномузыкальный конкурсын финалышкыжы пырен.
Семняжӹ
Денис Шаблийӹн Наталья лӹмӓн вӓтӹжӹ, Дионисий лӹмӓн эргӹжӹ[8] дӓ Дарья лӹмӓн ӹдӹржӹ улы. 2024-шӹ ин Шаблий семня «Тидӹ мӓмнӓн семняштӹшӹнӓ» лӹмӓн Россий кӱкшӹцӓн конкурс эртӓрӹмӹ велдӹк Российӹштӹшӹ сек яжо семнявлӓн топ-300-шкы пырен, тӹдӹлӓн Мары Эл Республикӹн Главажын Тау шамак пумы лин.
Мактымашвлӓ
- Национальный молодёжный кинопремин лауреатшы[9];
- Мары Эл Республикӹн Олык Ипай лӹмеш кугижӓншӹ молодёжный премин лауреатшы[2];
- «Мирлӹн пуры доно» премин лауреатшы[10];
- Мары Эл Республикӹн Главажын, Мары Эл Республикӹн тӹнг федеральный инспекторжын, Мары Эл Республикӹн Кугижӓншӹ Погынын, Мары Эл Республикӹн образовани дӓ наука шотышты министерствын Тау сирмӓш[11];
- Мары Эл Республикӹштӹшӹ эдемвлӓн прававлӓ верц шалгымаш шотышты уполномоченныйын, Мары Эл Республикӹн культура, печать дӓ халыквлӓ лоштышы кӹл шотышты министерствын, Чукотский автономный округын культура, спорт дӓ туризм шотышты министерствын, Камчатский кымдемӹн культура министерствыжын Тау шамак.
Фильмографижӹ
| И | Лӹм | Роль |
|---|---|---|
| 2013 | СашаТаня | Николай, пашкуды |
| 2017 | Динозавр | Санитар |
| 2017 | Ӓтян сирмӓшӹжӹ | Таксист |
| 2018-2021 | Фитнес | Катафалкыштышы водитель |
| 2018 | Кишӓ | Григорий Тунгусов |
| 2018 | #СеняФедя | Андрей, нӓлшӹ |
| 2018 | Бармен | Бармен |
| 2019 | Жуки | Оперативник |
| 2019-2020 | Кухня. Отель верц вырсы | Лӱдмӓш |
| 2019 | Горячая точка | Бубен |
| 2019 | Цӓш — тидӹ… (2 лаштык) | Автобусыштышы ӹрвезӹ |
| 2019-2021 | Короче | «Келеш ылын» |
| 2019 | Старец | Костян, наркодилер |
| 2020 | Миша цилӓ портя | Антонын тӓнгжӹ |
| 2020 | Макаров доно ӹдӹрвлӓ | Полици капитан |
| 2020 | Шӱмӹм пачын келесӹмӓш | Дмитрий Антипов, участковый |
| 2020 | Обсерватор | Участковый |
| 2021 | Кӹдӓлӓш пӹсмӓнӹн вампирвлӓ | Дежурный |
| 2021 | Понгыжалтмаш | Бармен |
| 2021 | Сёстры | ДПСник |
| 2021 | Саня, газуй! | Серега |
| 2021 | Не Иван, или Как приручить богатыря | Оролы |
| 2022 | Саня, газуй! Новый поворот | Серега |
| 2023 | Ирга | Юк режиссёр |
| 2023 | Чоткар | Пӱэргӹ[7] |
| 2024 | Пӹтӓртӹш интервью | Полицейский |
| 2024 | Маша + Чен = Война | сенатор Салливан |
| 2024 | Мары ямаквлӓ | Тымдышы |
| 2024 | Канский каникул | Димон |
Примечани
- ↑ Йошкар-Олинский кинофестиваль «И КРАТКАЯ». yofest.ru. Тергӹмӹ кечӹ: 25 сентябрьын 2025.
- ↑ 1 2 3 4 5 6 «Мый марий улам! Я – мариец!»(неопр.). МариМедиа. Тергӹмӹ кечӹ: 25 сентябрьын 2025.
- ↑ Марийская правда. Дата обращения: 25 сентябрьын 2025.
- ↑ 1 2 Шаблий Денис Сергеевич (руш.). Академия кинематографического и театрального искусства Н.С. Михалкова. Тергӹмӹ кечӹ: 25 сентябрьын 2025.
- ↑ Воплощай мечты: Бесплатная онлайн-киношкола «Дебют», MovieStart (25 майын 2020). Дата обращения: 25 сентябрьын 2025.
- ↑ Денис Шаблий. Россия — страна возможностей. Тергӹмӹ кечӹ: 25 сентябрьын 2025.
- ↑ 1 2 Денис Шаблий: фильмы, биография, семья, фильмография. Кинопоиск. Тергӹмӹ кечӹ: 25 сентябрьын 2025.
- ↑ Любящий отец – счастливый сын, Газета нашего города | новости, события, люди (26 февральын 2021). Дата обращения: 25 сентябрьын 2025.
- ↑ Денис Шаблий оказался в числе победителей Национальной молодёжной кинопремии(неопр.). МариМедиа. Тергӹмӹ кечӹ: 25 сентябрьын 2025.
- ↑ Режиссер и продюсер из Марий Эл Денис Шаблий завоевал премию "На благо мира". Дата обращения: 25 сентябрьын 2025.
- ↑ Объявлены победители III Всероссийского конкурса молодежных проектов (руш.). newsmariel.ru. Тергӹмӹ кечӹ: 25 сентябрьын 2025.