Шабалин, Борис Сергеевич

Ирӹкӓн энциклопеди Википеди гӹц материал
Борис Сергеевич Шабалин
Шабалин Борис Сергеевич.jpg
Шачмы кечӹ 20 декабрь 1915 (2 январь 1916 и)(1916-01-02)
Шачмы вӓр Елабуга, Вятский губерни (кӹзӹт Татарстан Республика)
Колымы кечӹ 1962 и 24 сентябрь(1962-09-24) (46 и)
Колымы вӓр Йошкар-Ола, Мары АССР, СССР
Пырымаш  СССР
Войскан йиш бронетанковый дӓ механизированный войска
Служымы жеп 1939—1946
Звани
Капитан
Часть 25-шӹ танк бригада
29-шӹ танк корпус
Командуен танк рота доно
Кредӓлмӓш/вырсы Кого Ӓтямӱлӓндӹ вырсы
Награда дӓ преми
Бюст (вургымла вецӹн кокшы) Елабуга халашты геройвлӓн аллейӹштӹ

Борис Сергеевич Шабалин (1915 и 20 декабрь [ 1916 и 2 январь], Елабуга — 1962 и 24 сентябрь, Йошкар-Ола, Мары АССР, СССР) — 25-шӹ танк бригадын танк рота командиржӹ (29-шӹ танк корпус, 5-шӹ гвардейский танк арми, 1-шӹ Прибалтийский фронт). Советский Союзын Геройжы.

Ӹлӹмӓш корны

1915 и 20 декабрьын (1916 и 2 январьын) Вятский губернин Елабуга халашты (кӹзӹт Татарстан Республика) служащий семняэш шачын. 1918 ин, ӓтяжӹн, почта пӓшӓзӹн, колымы паштек, семняжӹ Мары АССР-ыш ӹлӓш ванжен. Тетя жеп Сернур район Парсаево солашты эртен. Тӹнгӓлтӹш школым, вара Йошкар-Олаштышы кӹдӓлӓш школым пӹтӓрӹмӹкӹ[1], Ленинград кырык институтышты тыменьӹн. Нӹлӹмшӹ курс паштек Татар АССР Лаишево халаштышы кӹдӓлӓш школышты математика дон физикӹм тымден. 1937–1939 ивлӓн Казань халаштышы кырык техникумын тымдышыжы ылын.

1939 и сентябрьын Лаишево РВК тӹдӹм Пӓшӓзӹ-хресӓнь Якшар Арми рӓдӹш нӓлӹн. 1941 ин Чкаловыштышы танк училищӹм тымень лӓктӹн. 1941 и декабрь гӹц Кечӹвӓлвел, Кечӹвӓлвел-Вадывел, 2-шы Украина, 3-шы Белорусси, 1-шӹ Прибалтика фронтвлӓштӹ кредӓлӹн. Кок гӓнӓ шушырген. 1944 и гӹц ВКП(б) член.

Вильнюс, Каунас велнӹшӹ кредалмӓшвлӓштӹ ӹшкӹмӹм лӱддӹмӹн анжыктымылан 1944 и июльын танк рота командир лейтенант Шабалин Якшар Шӹдӹр орден доно пӓлемдӓлтӹн[2].

1-шӹ танк батальон танк ротын командиржӹ когорак лейтенант Шабалин 1944 и октябрьын Советский Прибалтикӹм ытарымы годым паснаок айыртемӓлтӹн. 7 октябрьын Жораны велнӹ разведкӹштӹ лимӹжӹ годым тышманын 2 пушкам, икманяр автомашинӓм дӓ 20 нӓрӹ салтакым пӹтӓрен, Плунгяны кымдемӹштӹшӹ кредӓлмӓшвлӓштӹ лин. 10 октябрьын Шабалинын 7 танкан ротыжы, анзыл отрядышты ылшыла дӓ шалахай флангышты разведкӹм эртӓрӹшӹлӓ, тангыж тӹрӹштӹшӹ Паланга халашкы сек анзыц керӹлт пырен, тышманын обороныжым (23 танк) шӓлӓтен дӓ тангыж якте шон, тидӹн доно вес частьвлӓн тӹнг виштӹлӓн Балтика тангыж сирӹш лӓктӓш яжо йӧнӹм ӹштен. Тенге тӹдӹ кого полководец А. Суворовын шамакшым пингӹдемден: «Манярын ылмы доно агыл, а моштымы доно». Ти кредӓлмӓшвлӓштӹ тышманын 60 техникӹжӹм, тӹ шотышток 15 танкым, вырсы хӓдӹрӓн 40 араваэшкӹм, 45 автомашинӓм дӓ 120 нӓрӹ салтак дон офицержӹм пӹтӓренӹт[3].

СССР Кӱшӹл Кӓнгӓш Президиумын 1945 и 24 марташ указшы доно немец-фашиствлӓ ваштареш кредӓлмӹ фронтышты командованин вырсы заданижӹм пиш яжон шоктымылан дӓ тидӹн годым лӱддӹмӹ дӓ патыр ылмым анжыктымылан когорак лейтенант Борис Сергеевич Шабалинлӓн Совет Союзын Геройжы лӹмӹм пумы дӓ Ленин орден дон «Шӧртньӹ Шӹдӹр» медальым кычыктымы[3].

1946 ин капитан Шабалин демобилизуялтын. Пӹтӓри Казаньыштышы офицер школын директоржы ылын. 1947 и гӹц Мары АССР-ышты ӹлен дӓ пӓшӓм ӹштен: Росвитаминпромын директоржы, «Союззаготтрансын» когорак инженержӹ, автотрестӹн механик-контролёржы ылын.

1962 и 24 сентябрьӹн колен. Йошкар-Олашты тайымы.

Мактымашвлӓ

  • «Шӧртньӹ Шӹдӹр» медаль (24.03.1945)[3][3];
  • Ленин орден (24.03.1945);
  • Якшар Знамя орден (18.02.1945)[4];
  • Якшар Шӹдӹр орден (25.07.1944)[2];
  • медальвлӓ.

Ӓшӹндӓрӹмӓш

  • Тӹдӹн лӹмжӹм Сернур посёлкыштышы ик ӧлицӓлӓн пумы.
  • Йошкар-Олашты 2000 ин ӓшӹндӓрӹмӓш хангам сӓкӹмӹ.

Примечани

  1. ↑ Национальная библиотека Республики Марий Эл. Герои земли марийской. Навстречу 70-летию Великой Победы. Шабалин Борис Сергеевич Архивный копи от 17 апрельӹн 2016 на Wayback Machine.
  2. ↑ 1 2 Наградные документы в электронном банке документов «Подвиг народа» (архивные материалы ЦАМО. Ф. 33. Оп. 690155. Д. 7346. Л. 1, 15, 16)..
  3. ↑ 1 2 3 Наградные документы в электронном банке документов «Подвиг народа» (архивные материалы ЦАМО. Ф. 33. Оп. 686046/793756. Д. 626/54. Л. 46/1, 2)..
  4. ↑ Наградные документы в электронном банке документов «Подвиг народа» (архивные материалы ЦАМО. Ф. 33. Оп. 686196. Д. 2510. Л. 1, 14, 15)..

Литература

  • Ханин Л. Герои Советского Союза — сыны Татарии. — Казань, 1963. — С. 600—602.
  • Кто есть кто в Республике Татарстан: Герои Советского Союза — наши земляки. — Казань: Татарское кн. изд-во, 1985. — С. 190—192.
  • Наши Герои. — Йошкар-Ола, 1985. — 365 с.
  • Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
  • Шабалин, Борис Сергеевич // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 819. — 872 с. — 3505 экз. — ISBN 978-5-94950-049-1.
  • Шабалин Борис Сергеевич // История Марийского края в лицах. 1941—1945 гг. Великая Отечественная война. — Йошкар-Ола: МарНИИЯЛИ, 2015. — С. 270—271. — 374 с. — 500 экз. — ISBN 978-5-94950-070-5.
  • Шабалин Борис Сергеевич // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 489. — 606 с. — 1500 экз. — ISBN 978-5-905314-35-3.

Ссылкывлӓ

«https://mrj.ruwiki.ru/w/index.php?title=Шабалин,_Борис_Сергеевич&oldid=310629» гӹц нӓлмӹ