Обухова, Галина Николаевна

Галина Николаевна Обухова
Шачмы кечӹ	6 март 1927(1927-03-06)
Шачмы вӓр	Ивакнур сола Пектубаевский район, Мары Эл
Колымы кечӹ	1 сентябрь 2014(2014-09-01) (87 и)
Колымы вӓр	Советский район (Мары Эл)
Сӓндӓлӹк	СССР[d]  Россий
Пӓшӓн типшӹ	ферма вуйлатышы
Награда дӓ премивлӓ

Галина Николаевна Обухова (6 март 1927, Ивакнур^[d], Мары автономный область — 1 сентябрь 2014, Вятское^[d], Мары Эл Республика) — совет сола хозяйствын передовикшӹ, Мары АССР Советский районыштышы «Валгалтмаш» колхозын ферма вуйлатышыжы, Социалистический Пӓшӓн Геройжы (1966).

Ӹлӹмӓш корныжы

1927 ин Ивакнур солашты, кӹзӹт Мары Эл, мары хресӓнь семняэш шачын.

1939 ин улы семня Советский районыштышы мар. Вечын солаш ванжен. Шӹм классым тымень пӹтӓрӹмӹкӹ, вӓрӹштӹшӹ «У корны» колхозын ныр пӓшӓм ӹштӹшӹ бригадыштыжы пӓшӓлӓш тӹнгӓлӹн. Варарак сӓмӹрӹк коммунистический бригадым вуйлатен.

1943 ин Йошкар-Олаш оборона заводыш пӓшӓш колтенӹт. 1944 ин фабрика-заводыштышы школым тымень пӹтӓрен.

1947 ин мар. Вечын селашкы пӧртӹлӹн. Марлан кеен дӓ саснам анжышыжын пӓшӓм ӹштӓш тӹнгӓлӹн. Ик иштӹ производствын передовикшӹ лин. 1950 ин тӹдӹлӓн сасна фермӹм вуйлаташ ӹняненӹт.

1963 и гӹц тӹдӹ Опанассолаштышы «Валгалтмаш» колхозын шӹшер товарым пушы фермӹжӹн вуйлатышыжы лиэш. Тӹдӹн вуйлатымыжы семӹнь пӓшӓ лӓктӹш кайынок когоэмӹн. Шӹшер лӓктӹш шукемӹн. Шӹмшӹ вӹциӓшӹн итогшы семӹнь колхоз вольыкым урдымы шотышты передовик ылын.

СССР Кӱшӹл Совет Президиумын 1966 ин 22 мартын лӓкшӹ Указшы доно сола хозяйствышты дӓ вольыкым урдымашты кӱкшӹ лӓктӹшӹш шомы гишӓн Галина Николаевна Обуховалан Социалистический Пӓшӓн Геройжы званим пумы, Ленин орденӹм дӓ «Сарла дон Молот» медальым кычыктымы.

Сола хозяйствышты пакыла пӓшӓлен. 1978 ин заслуженный кӓнӹмӓшкӹ кен.

Мары Элӹштӹшӹ Советский районышты ӹлен. 2014 ин 1 сентябрьын колен.

Наградывлӓ

Пӓшӓштӹ сӹнгӹмӓшлӓн пӓлемдӓлтӹн:

• «Сарла дон Молот» шӧртньӹ медаль (22.03.1966)
• Ленин орден (22.03.1966)
• молы медальвлӓ.

Литература

• Обухова Галина Николаевна // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 584. — 872 с. — 3505 экз. — ISBN 978-5-94950-049-1.
• Васильева А. Е., Виногоров Н. И. Обухова Галина Николаевна // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 314. — 606 с. — 1500 экз. — ISBN 978-5-905314-35-3.

Ссылкывлӓ

• Галина Николаевна Обухова (руш.). Сайт «Герои страны».