Курочкина, Антонина Павловна

Антонина Павловна Курочкина
Шачмы годшы лӹм	Антонина Павловна Демакова
Шачмы кечӹ	1922 и 25 июнь(1922-06-25)
Шачмы вӓр	Мары Эл
Колымы кечӹ	1984 и 16 апрель(1984-04-16) (61 и)
Колымы вӓр	Барда, Пермский область, РСФСР, СССР
Гражданство	СССР
Награда дӓ премивлӓ

Антонина Павловна Курочкина (25 июнь 1922, Мары Эл Республика — 1984, Пермский область^[d]) — советский медик, Пермский областьыштышы Бардымский район больницӹн тӹнг врачшы, Социалистический Пӓшӓн Геройжы (1969).

Ӹлӹмӓш корныжы

1922-шы ин 25-шӹ июньын Мары Эл Республикӹштӹшӹ Советский районын У Ургаш солаэшӹжӹ шачын. 1940-шӹ ин Мары фельдшер-акушерский школым тымень пӹтӓрен.

Кого Ӓтямӱлӓндӹ вырсы ивлӓн, 1941-шӹ и гӹц 1943-шы и якте, действующий армиштӹ ылын. Волховский дон Ленинградский фронтвлӓштӹ 286-шы стрелковый дивизин сапёрный ротыштыжы фельдшереш служен. 1942-шы и гӹц ВКП(б)-н членжӹ. 1943-шы и мычашын шачмы вӓрӹшкӹжӹ пӧртӹлӹн, акушерский пунктым вуйлатен.

1950-шӹ ин Молотовский медицинский институтым тымень пӹтӓрен дӓ Молотовский областьын Бардымский районышкыжы направленим нӓлӹн. Райздрав отделӹм вуйлатен, а 1952-шы и гӹц Бардымский район больницӹштӹ главный врач ылын. Шукы и лач ӹшкетшӹ врач ылын — терапевтӓт, хирургат, офтальмологат, вӓк патологоанатомат.

1950-шӹ ивлӓ кӹдӓлнӹ А. П. Курочкинан цацен пӓшӓлӹмӹжӹ доно районышты халыкын шулыкшым перегӹмӹ шотышты профилактический пӓшӓ кымдан шӓрлен. Тӹнӓм Бардымский районышты трахома хозаланен, шонгывлӓ слӧпӧй линӹт, икпоратка иӓшӓн эдемвлӓнӓт сӹнзӓштӹ карштен. Антонина Павловна улы коллективӹм пӓшӓ ӹштӓш виктӓрен: фельдшервлӓ, медсестравлӓ, врачвлӓ — цилӓн солавлӓ йӹде лӓктӹн каштыныт, каждый солашты вес пачаш обходым эртӓренӹт. Регулярно профилактический анжымашвлӓ паштек цер цӓкнен. Районышты врачын цацымыжы гишӓн лу доно лечебно-профилактический пунктвлӓ, тетя шулыкандымы лагерьвлӓ пӓшӓм ӹштӓш тӹнгӓлӹнӹт.

СССР-ӹн Кӱшӹл Кӓнгӓшӹжӹн Президиумжын указшы семӹнь 1969-шӹ ин февральын Антонина Павловна Курочкиналан советский эдемӹн шулыкшым перегӹмӹ пӓшӓштӹ кого анзылтымашкы шомы гишӓн Социалистический Пӓшӓн Геройжы лӹмӹм пумы, Ленин орден дон «Сарла дон Молот» шӧртньӹ медальым кычыктымы.

А. П. Курочкина кымлы и утла район больницӹм вуйлатен. Тӹдӹн палшымыжы доно районышты трахома, скарлатина дӓ вес ясымат пӹтӓрӹмӹ. Областной кӓнгӓшӹн депутатешӹжӹ, КПСС райкомын членешӹжӹ айыралтын. РСФСР-ӹн заслуженный врачшы.

Кок Ленин орден (1961, 1969), медальвлӓ доно пӓлемдӓлтӹн.

Ольга ӹдӹржӹ — врач.

Барда солашты ӹлен. 1984-шӹ ин 16-шы апрельӹн колен.

Тӹдӹн лӹмжӹм Бардымский тӹнг район больницӹлӓн дӓ Барда солан ӧлицӓжӹлӓн пумы.

Примечани

Литература

• Герои Прикамья. — Пермь: Пушка, 2006
• Кузьмин М. К. Учёные-медики — Герои Социалистического Труда. — М., 1988.
• Зайниев Г. З., Колесников А. Ю. Курочкина (Демакова) Антонина Павловна // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 242. — 606 с. — 1500 экз. — ISBN 978-5-905314-35-3.

Ссылкывлӓ

• Антонина Павловна Курочкина (руш.). Сайт «Герои страны». Тергӹмӹ кечӹ: 25 августын 2014.
• Светя другим …