Коллоэцӹн кечӹ
| 14.07.24 |
| 13.07.25 |
| 12.07.26 |
| 11.07.27 |
| 09.07.28 |
Коллоэцӹн кечӹ — колым кычышывлӓн профессиональный айошты. Овуца семӹнь июльын кокшы рушӓрняжӹн пӓлемдӓлтеш.
Верховный Совет Президиумын «И йӹде эртӓрӹмӹ „Коллоэцӹн кечӹ“-м ӹштӹмӹ гишӓн» 3519-VI №-ӓн Указшы семӹнь 1965 ин 3 майын пингӹдемдӹмӹ ылын[1]. Российӹштӹ дӓ Украинӹштӹ 1965 и 30 июль гӹц официально пӓлемдӓлтеш[2]; первишӹ СССР-ын молы сӓндӓлӹкӹштӹ официально агыл эртӓрӓлтеш.
Истори
Ти профессиональный айо советский жепӹштӹ кол кычымашын яжон виӓнгӹмӹжӹ гӹц тӹнгӓлӹн: первишӹ Советский Союзын юж регионышты кол кычымаш видӹшӹ отрасльвлӓ гӹц иктӹжӹ ылын.
Айом икшӹ гӓнӓ 1964 ин Мурманск халашты пӓлемденӹт. Вес ин 3 майын Верховный Совет Президиумын «И йӹде эртӓрӹмӹ „Коллоэцӹн кечӹ“-м ӹштӹмӹ гишӓн» 3519-VI №-ӓн Указ лӓктӹн. 1980 ин Верховный Совет Президиумын айо дӓ ӓшӹндӓрӓлтшӹ кечӹвлӓ гишӓн эче ик указшым подписӓйӹмӹ ылын. Тӹдӹ кӹзӹтӓт Российӹштӹ лаштыкын-лаштыкын действуя. Тӹштӹ тенгеок Коллоэцӹн кечӹжӹ ӓшӹндӓрӓлтеш[1].
Описани
Тидӹ кечӹн коллоэцвлӓ, колым кычымы доно сусу лиӓш манын, вӹд тӹрӹштӹ цымыргат; шӹренок коллоэц тӹшкӓвлӓ ӹшке лоштышты тӓнгӓшӓт. Тӓнгӓшӹмӓш колым яратен кычымаш негӹцеш эртӓрӓлтеш. Сӹнгӹшӹвлӓм сакой лӓктӹш гишӓн награждаят: сек шукы колым кычымы гишӓн, сек кого ӓли сек изи кычымы коллан дӓ молыланат. Коллоэцӹн кечӹ эдемвлӓм игот, пӱэргӹ ӓли ӹдӹрӓмӓш ылмы дӓ молы параметр доно кол кычымы гӹц ак цӓрӹ.
СССР-шты тангыж сага халавлӓштӹ коллоэцӹн кечӹ кого профессиональный айо семӹнь веле агыл, йишӹн айожы семӹнят пӓлемдӓлтӹн. Празднуйымы кечӹн площадьышты, стадионышты мырен каштмаш, костюмым чиэн каштмаш эртен, советский эстрадын артиствлӓ толыныт. Тенге Мурманск халашты, кыды колым кычышы флот гишӓн ӹштӹмӹ ылын, кӹзӹтӓт Коллоэцӹн кечӹ Халан кечӹжӹ доно иктӧр пӓлемдӓлтеш. Молы халашты халан кечӹжӹ лӹмеш сакой фестиваль эртӓрӓлтеш[3].
Коллоэцӹн кечӹ, Петропавловск-Камчатский, 2024 и 13 июль
2024 ишӹ Коллоэцӹн кечӹ, Петропавловск-Камчатский
Коллоэцӹн кечӹн тӱнӹ лосось гӹц шолтымы кол лем, Петропавловск-Камчатский
Коллоэцӹн кечӹ, Петропавловск-Камчатский, 2024 и 13 июль
Примечани
- ↑ 1 2 Праздник «День рыбака» утвержден Указом Президиума Верховного Совета СССР от 1 октября 1980 г. № 3018‑Х «О праздничных и памятных днях» (в редакции Указа Президиума Верховного Совета СССР от 1 ноября 1988 г. № 9724‑XI «О внесении изменений в законодательство СССР о праздничных и памятных днях»)
- ↑ Указ Президента Украины № 464/95 от 22.06.1995
- ↑ День рыбака в 2024 году: история и традиции праздника. Комсомольская правда. Тергӹмӹ кечӹ: 26 июньын 2024.