Ирония судьбы, или С лёгким паром!
| Ирония судьбы, или С лёгким паром! | |
|---|---|
 | |
| Жанр |
мелодрама трагикомеди |
| Режиссёр | Эльдар Рязанов |
| Сценарин авторжы |
Эмиль Брагинский Эльдар Рязанов |
| Тӹнг рольышты |
Андрей Мягков Барбара Брыльска Юрий Яковлев Любовь Добржанская |
| Рольым юканым ӹштенӹт |
Сергей Яковлевич Никитин[d], Валентина Илларионовна Талызина[d] дӓ Пугачёва, Алла Борисовна[d] |
| Оператор |
Владимир Нахабцев (тӹнг) Вадим Алисов Сергей Арманд Борис Кочеров |
| Монтажёр | Валерия Белова |
| Композитор | Микаэл Таривердиев |
| Художник-постановщик | Александр Борисов |
| Оригинальный телеканал | ЦТ-ын икшӹ программыжы |
| Компани | «Мосфильм» киностуди. Телевизионный фильмвлӓн творческий ушем |
| Дистрибьютор | Гостелерадио |
| Кужыц | 184 мин |
| Сӓндӓлӹк |
 СССР |
| Йӹлмӹ | руш |
| Лыкмы жеп | 1976 |
| Маняр сери | 2 |
| Варашы фильм | Ирония судьбы. Пакыла[d] |
| IMDb | ID 0073179 |
«Ирония судьбы, или С лёгким паром!» — советский телевиденин 1975 ишӹ кок сериян киножы, режиссер Эльдар Рязанов снимаен. Пӹтӓришӹ гӓнӓ 1976 ин 1 январьын СССР-шты Тӹнг телевиденин икӹмшӹ программыштыжы анжыкталтын[1].
Кинон шачмыжы гишӓн
Кино Эмиль Брагинский дон Эльдар Рязановын «С лёгким паром! или Однажды в новогоднюю ночь…» лӹмӓн пьесӹштӹн экраныш лыкмы версижӹ ылеш. Пьеса 1969 ин сирӹмӹ ылын дӓ кином ӹштӹмӹ жепеш Советский Союзын икманяр театрыштыжы шӹндӹмӹ ылын. Варарак тӹдӹм сӓндӓлӹкӹн 110 театрыштыжы[2] дӓ тенгеок вес сӓндӓлӹквлӓштӓт анжыктенӹт.
Пьесӹн сюжетшӹ, кино семӹньок, ӹлӹмӓштӹ тӧр лишӹ событивлӓ негӹцеш шачын манын Рязанов. Лачокок техень эдем лин, кыды 31 декабрьын момоцаш кеен, а ирокеш вес халашты понгыжалтын. А тӹдӹн историжӹ ма доно пӹтен, Рязанов дон Брагинский пӓлӹделыт, седӹндон ӹшке шанен лыктыныт.
1975 ин шӹжӹм, СССР-шты лишӓшлык премьера анзыц, Телевизионный фильмвлӓн всесоюзный фестивальын программыжы семӹнь «Ирония судьбы» кином Грузиштӹ ӹлӹшӹ халык анжен. Тбилисиштӹ эртӹшӹ мероприятиштӹ картина икшӹ вӓрӹм нӓлӹн[3].
Сюжет
Сюжетӹштӹ тӹнг вӓрӹм брежнев жепӹштӹшӹ общественный архитектурын икань ылмын сылыкшы нӓлеш. Ти картин юмористический анимационный прологышты ынгылдаралтеш, кышты архитекторвлӓ политиквлӓ дон бюрократи доно кӹлдӓлтӹнӹт (режиссёр дӓ аниматор Виталий Песков). Тенгге икань кайшы, но тыгодым пиш керӓл шукы этажан томавлӓ каждый халашты, посёлкышты дӓ хала сага вӓрвлӓштӹ цилӓ Советский Союз мычкы строялтыныт[4].
Тӓнгвлӓ тӹшкӓ ӹшкӹмӹштӹн каждый ишӹ традициштӹ семӹнь У им аяш манын Москван общественный момоцашты вӓшлит. Нӹнӹ цилӓн, тӹнг геройын Женя Лукашинӹн Галя доно мыжырангаш сӧрӹмӹм пӓлемден, пиш когон лӧчкӓт (тӹдӹ У и йыдым Галялан кид дон шӱмжӹм пуаш шанен пиштен). Момоца паштек тӓнгвлӓ логӹц Павликлӓн Ленинград якте рейсӹш шокташ келеш, тӹштӹ тӹдӹм вӓтӹжӹ выча. Пӹтӹн тӹшкӓ аэропорт якте ыжаташ погына.
Тӓнгвлӓн аэропортыш миен шомышт годым Женя дон Павлик амаленӹт. А Саша дон Миша кӱ чонгештӓ манын ӓшӹндӓрен ак кердеп. Павлик вӓреш самолётыш Женям самынь шӹндӓт.
Женя чонгештӹмӹ мычкы шӹдешкӹшӹ пашкудын пулыш вӹлнӹжӹ амала, тӹдок остаткаэшӹжӹ Ленинградышты самолёт гӹц лӓктӓш палша. Сӓмӹрӹк эдем, Москвашты ылам машанен, ленинградыштышы аэропортеш понгыжалтеш. Тӹдӹ таксим кыча дӓ машинӓм виктӓрӹшӹлӓн ӹшке адресшӹм келесӓ.
Тенге лӓктӹн, Ленинградышты Женян москваштышы ганьок адрес доно, москваштышы ганьок стройымы тома улы ылмаш. Москвич «ӹшке» квартирӹшкӹжӹ лифт доно куза дӓ, цӱдӓокыш, квартир сыравачат келшен толеш (прологышты келесӹмӹ: «...стандартный квартирӹм стандартный замок доно строят»). Тома кӧргӹштӹ мебелят Женян квартира ганьок, но сӓмӹрӹк эдем иктӓ-махань айыртемӹм цаклаш манын пиш йӱкшӹ ылеш.
Ти кытлашты Надя Шевелёва токыжы пӧртӹлеш. Тӹдӹ У им Ипполит кавалержӹ доно вӓшлиӓш шана. Дӓ трӱк койкаштыжы амалышы пӓлӹдӹмӹ эдемӹм ужеш. Надя ӱждӹмӹ хынам амаса порогы гӹц лыктын колташ цаца, но тӹдӹжӹ шӹдешкӹшӹлӓ ак ынгылы, мам «тӹдӹн» квартирӹштӹжӹ ӧрдӹж ӹдӹрӓмӓш ӹштӓ дӓ малын тӹдӹ тиштӹ командуя. Иктӹ-весӹлӓн прописка доно паспортым анжыктен, кинон геройвлӓжӹ, остаткаэш ма лимӹм цилӓ раскыдемден кердӹнӹт. Женян кымыл вален: Москвашты тӹдӹм Галя выча. А Ипполит, Надя докы мимӹкӹжӹ, тӹдӹн дӓ Женя ынгылдарымашлан ак ӹнянӹ. Сӓмӹрӹк эдем Москваш кыдалаш погына, но оксажы сагажы уке манын ынгыла, седӹндон Надян квартирӹшкӹжӹ пӧртӹлеш. Ипполит ушыкален колта да лӓктӹн кеӓ. Надя пӹсӹнрӓк Евгени гӹц ытлынежӹ, но вес иргод якте Москва якте рейс уке. Женя Галялан ма лимӹм ынгылдараш манын ик гӓнӓ агыл Москваш звоняш цаца. Остаткаэшӹжӹ тӹдӹ ӹдӹржӹ доно кӹлдӓлтеш, но тӹдӹ, Ленинград гишӓн колын, трубкам шуа. Надя Москваштышы вокзалыш кеӓ дӓ у пӓлӹмӹжлӓн Москва якте поездеш билетӹм нӓлеш. Но Женя билетӹм кышкед шуа дӓ кыдалаш отказа.
Женя дон Надя У и йыдым неволя иквӓреш эртӓрӓт. Пӹтӓри нӹнӹ иктӹ-весӹм тышманла анжат, но изин-олен кымылышты пышкыдемеш дӓ нӹнӹ вӓшӓ-вӓш яраташ тӹнгӓлӹт. Иргодым нӹнӹ шижӹт, лоштышты ма лин, цилӓжӓт самынь ылеш. Ӹшкӹлӓнӹштӹ нелӹ решӹмӓшӹш шоыт — айырлаш. Сӓмӹрӹк эдем Москваш пӧртӹлеш. Корны дӓ амалыдымы йыд паштек янгылышы Женя амален колта. Понгыжалтмыкы Надям омынеш ужын машана, но тӹдӹ йӹгӹре шӹнзӓ. Надя тӹдӹн докы Москваш кыдал миэн дӓ тӹдӹлӓн яратымы эдемжӹм моаш нелӹ лиде, вет нӹнӹн адресӹштӹ икань, сыравачат замокеш келшен толеш.
Новеллӹш сӓрӓлмӓш
«Ирония судьбы» новеллӹш сӓрӓлмӓш (пачын пумы ремаркавлӓ доно драма) улы. Тӹдӹм Эльдар Рязановын киновлӓжӹм новеллизаци гӹц сакой сборниквлӓштӹ лыкмы[5]. Тӹдӹн содержанижӹ кино дӓ пьеса доно икань ылеш.
Рольышты
| Актёр | Роль |
|---|---|
| Андрей Мягков | хирург Евгений (Женя) Михайлович Лукашин (вокал — Сергей Никитин)[6] |
| Барбара Брыльска | руш йӹлмӹм дӓ литературым тымдышы Надежда (Надя) Васильевна Шевелёва (юканым ӹштен — Валентина Талызина, вокал — Алла Пугачёва) |
| Юрий Яковлев | Надян армарыжы Ипполит Георгиевич |
| Любовь Добржанская | Женян ӓвӓжӹ Марина Дмитриевна |
| Ольга Науменко | Женян арвӓтӹжӹ Галя |
| Лия Ахеджакова | Надян тӓнгшӹ, коллегӹжӹ Таня |
| Валентина Талызина | Надян тӓнгшӹ, коллегӹжӹ Валя |
| Александр Ширвиндт | Женян тӓнгшӹ Павел / кино тӹнгӓлтӹштӹ кадр шайылны юк |
| Георгий Бурков | Женян тӓнгшӹ Миша |
| Александр Белявский | Женян тӓнгшӹ Саша |
| Любовь Соколова | Надян ӓвӓжӹ[7] |
| Готлиб Ронинсон | самолётеш шӹндӹмӹм вычышы Красноярск гӹц пассажир |
| Эльдар Рязанов | самолётышты пассажир (титрӹштӹ уке) |
| Борис Руднев | таксист (титрӹштӹ уке) |
| Николай Погодин | вычыдымы хына баян доно (титрӹштӹ уке) |
| Александр Постников | корныгешӹ (титрӹштӹ уке) |
| Елена Наумкина | буфетчица аэропортышты (титрӹштӹ уке) |
| Николай Кузнецов | пашкуды (титрӹштӹ уке) |
| Михаил Бочаров | пи доно пашкуды (титрӹштӹ уке) |
Кино гӹц кадрвлӓ
Андрей Мягков Женян рольыштыжы дӓ Ольга Науменко Галян рольыштыжы
Александр Ширвиндт Павелӹн рольыштыжы
Барбара Брыльска Надян рольыштыжы
Юрий Яковлев Ипполитӹн рольыштыжы
Любовь Добржанская Женян ӓвӓжӹн рольышты
Андрей Мягков (Женя) дӓ Барбара Брыльска (Надя)
Снимайышы эдемвлӓ тӹшкӓ
- Сценарин авторвлӓ: Эмиль Брагинский, Эльдар Рязанов
- Режиссёр-постановщик: Эльдар Рязанов
- Тӹнг оператор: Владимир Нахабцев
- Тӹнг художник: Александр Борисов
- Кокшы режиссёр: Игорь Петров
- Йюк оператор: Юрий Рабинович
- Композитор: Микаэл Таривердиев
- Дирижёр: Георгий Гаранян
- Костюм шотышты художник: Ольга Кручинина
- Грим шотышты художник: Ольга Струнцова
- Кинооператорвлӓ: Вадим Алисов, Сергей Арманд, Борис Кочеров
- Комбинаци доно съёмка: Борис Травкин (оператор), Валентин Гласс (сӱретче)
- Монтаж: Валерия Белова
- Режиссерӹн ассистентвлӓжӹ: Нина Коренева, Григорий Торчинский
- Операторын ассистентвлӓжӹ: Владимир Горшков, Владимир Батузов, Александр Михалычев, * * Сергей Кочебуров, Николай Коробейник
- Монтажерӹн ассистентшӹ: Элеонора Праксина
- Художник-декоратор: И. Фёдоров
- Валгыды шотышты мастар: Марк Вайсман
- Редактор: И. Наумова
- Музыка шотышты редакторвлӓ: Раиса Лукина, В. Лаписов
- Кино тӹнгӓлтӹшӹштӹ мультипликаци заставка: Виталий Песков
- Картинӹн директоржы: Ефим Голынский
Примечани
- ↑ Фильм Ирония судьбы, или С лёгким паром!: смотреть онлайн в хорошем качестве, фото, видео - Вокруг ТВ. (англ.). Вокруг ТВ. Тергӹмӹ кечӹ: 26 ноябрьын 2019.
- ↑ Ирония судьбы - главный новогодний фильм СССР и России. Рассказываем историю его создания // Правила жизни : журнал. — 2021. — 31 декабрьын.
- ↑ 1 января исполняется 40 лет со дня премьеры комедии «Ирония судьбы, или С легким паром!» (руш.). ТАСС.
- ↑ Frederick Edwin Ian Hamilton, Kaliopa Dimitrovska Andrews, Nataša Pichler-Milanović. Transformation Of Cities In Central And Eastern Europe. — New York: UN University Press, 2005. — С. 159. — ISBN 9280811053 (pbk.).
- ↑ Рязанов Э. А. Старики-разбойники. — АСТ, Зебра Е, 2008. — С. 151—232. — 688 с. — ISBN 978-5-17-048780-6. — ISBN 978-5-94663-535-6.
- ↑ Александр Мельман. Преображения Жени Лукашина: оказался на обочине, но в глазах надежда. Маленький человек. Московский комсомолец (14 мартын 2023).
- ↑ В пьесе, по которой снят фильм, указано имя и отчество мамы Нади — Ольга Николаевна, — а в самом фильме — нет.
Литература
- Александра Маянцева; Николай Калашников.: История культового фильма «Ирония судьбы»: Рязанов снимал Москву и Санкт-Петербург в соседних столичных дворах. Комсомольская правда (26 декабрьын 2008).
- Лесскис Н. Фильм «Ирония судьбы…»: От ритуалов солидарности к поэтике изменённого сознания // Новое литературное обозрение. — 2005. — № 76. (Дата обращения: 3 июльын 2009)
- Рязанов, Э. А. Старики-разбойники. — АСТ; Зебра Е, 2008. — С. 151—232. — 688 с. — ISBN 978-5-17-048780-6. — ISBN 978-5-94663-535-6.
- Наталья Радулова: «Выключить Женю Лукашина».
Ссылкывлӓ
- «Ирония судьбы, или С лёгким паром!» на сайте «Мосфильма»
- 1 января исполняется 40 лет со дня премьеры комедии «Ирония судьбы, или С лёгким паром!» archive.is (31 декабрьын 2015).
Ти статьяш РУВИКИ-н вес статьявлӓжӹ ак колтеп. |
.svg){kind=link}