Григорьева, Людмила Яковлевна
| Людмила Яковлевна Григорьева | |
|---|---|
 | |
| Шачмы кечӹ | 1973 и 22 июль (53 и) |
| Шачмы вӓр | РСФСР, Мары АССР, Моркы кымдем, Шап Унчы сола |
| Сӓндӓлӹк |
 СССР Россий |
| Научный сфера | йӹлмӹзӹ |
| Пӓшӓ вӓр | ЙСИШМИ |
| Образовани | |
| Учёный степень | филологи наука кандидат |
| Учёный звани | доцент[d] |
| Наука вуйлатышы | Ю. В. Андуганов |
Людмила Яковлевна Григорьева (шач. 22 июль 1973, Шап Унчы[d], Мары АССР[d]) — Российӹштӹшӹ лингвист, педагог, Йӹлмӹм, литературым дӓ историм шӹмлӹшӹ В.М. Васильев лӹмӓн мары институтын директоржы (2023-шы и гӹц). Филологи наука кандидат, доцент.
Мары Эл Республикӹн кугижӓншӹ йӹлмӹвлӓ доно Правительствӹн комиссижӹн, Мары Эл Республикӹм вуйлатышы сагашы Мары Эл Республикӹн сӓмӹрӹквлӓлӓн Кугижӓншӹ премим пумы шотышты Комиссин членжӹ, Российский научный фондын проектвлӓ шотышы координаторжы[1].
Ӹлӹмӓш корныжы
1973-шы ин 22-шы июльын Мары АССР-ын Шап Унчы солаштыжы шачын. Школ паштек Мары кугижӓншӹ университетӹн историко-филологический факультетӹшкӹжӹ тыменяш пырен. Тӹдӹм 1996-шы ин «Филолог. Мары йӹлмӹ дон литературым, руш йӹлмӹ дон литературым тымдышы» специальность доно тымень пӹтӓрен. Вара Мары кугижӓншӹ университет сагашы «Европын, Азин, Африкӹн, Америка дон Австралин аборигенвлӓн (финно-угр дӓ самодийский йӹлмӹвлӓ) вескид сӓндӓлӹквлӓштӹшӹ халыквлӓн йӹлмӹвлӓштӹ» направлени доно аспирантурышты тыменьӹн[2]. 2003-шы ин филологи наука кандидатын учёный степеньжӹм нӓлӹн[1].
Студент ылмыжы годым пӓшӓлӓш тӹнгӓлӹн. 1995–1997-шӹ ивлӓн Мары Эл Республикӹн Политехнический лицейӹштӹжӹ мары йӹлмӹ дон литературым тымден. 2000-шӹ и гӹц Мары кугижӓншӹ университетӹштӹ труен: пӹтӓри финн-угр филологин вуйлатышыжы, вара когорак тымдышыжы ылын, а 2006-шы и гӹц — финн-угр йӹлмӹвлӓн кафедрӹжӹн (вара общий дӓ финн-угр языкознани кафедра) доцентшӹ[2].
2008-шӹ и гӹц Людмила Григорьева тымдымы пӓшӓ доно иктӧр научный пӓшӓш ушнен, МарНИИЯЛИ-н йӹлмӹ отделӹшкӹжӹ когорак научный пӓшӓзеш шагалын (кӹзӹт Йӹлмӹм, литературым дӓ историм шӹмлӹшӹ В.М. Васильев лӹмӓн мары институт). 2013-шы ин учёный секретареш шагалтенӹт, 2016-шы ин — директорын вашталтышеш. 2022-шы и 1-шӹ июль гӹц Йӹлмӹм, литературым дӓ историм шӹмлӹшӹ В.М. Васильев лӹмӓн мары институтын директоржын обязанностьвлӓм ӹштен[1], 2023-шы ин февральын директорын должностьышты пингӹдемденӹт[3].
Людмила Григорьева мары йӹлмӹн диалектологижӹ дӓ синтаксисшӹ доно, общий языкознани доно, финн-угр йӹлмӹвлӓн сравнительно-исторический грамматикӹжӹ доно, сӓрӹмӓшӹн теорижӹ дон практикӹжӹ дӓ когнитивный лингвистика доно 90 утла научный дӓ учебно-методический пӓшӓвлӓн авторжы дӓ редакторжы ылеш[2][3].
Техень комиссивлӓн дӓ кӓнгӓшвлӓн составышкышты пыра:
- Мары Эл Республикӹн кугижӓншӹ йӹлмӹвлӓ доно Правительствӹн комиссижӹн
- Мары Эл Республикӹн вуйлатышыжы сагашы литература, искусство, архитектура, наука дӓ техника шотышты Кугижӓншӹ премивлӓ шотышты Комиссин
- Мары Эл Республикӹм вуйлатышы сагашы Мары Эл Республикӹн сӓмӹрӹквлӓлӓн Кугижӓншӹ премим пумы шотышты Комиссижӹн
- Мары Эл Республикӹн вуйлатышы сагашы Геральдический кӓнгӓшӹн
- Мары Эл Республикӹн тымдышы организацивлӓн ректорвлӓштӹн кӓнгӓшӹн
- Мары Эл Республика мычкы кӧргӹ пӓшӓвлӓ доно министерство сагашы общественный кӓнгӓшӹн
- Россий Федерацин финн-угр халыквлӓжӹн ассоциацижӹн ревизионный комиссижӹн
- МарНИИЯЛИ-н учёный советшӹн (председатель)
- «Финно-угроведение» журналын редакционный кӓнгӓшӹжӹн (председатель)[2]
Примечани
- ↑ 1 2 3 Назначена временно исполняющая обязанности директора Марийского научно-исследовательского института. Министерство культуры, печати и по делам национальностей Республики Марий Эл (1 июльын 2022). Тергӹмӹ кечӹ: 11 сентябрьын 2025.
- ↑ 1 2 3 4 Григорьева Людмила Яковлевна. Марийский научно-исследовательский институт языка, литературы и истории им. В.М. Васильева. Тергӹмӹ кечӹ: 11 сентябрьын 2025.
- ↑ 1 2 Людмила Григорьева назначена директором Марийского научно-исследовательского института. Министерство культуры, печати и по делам национальностей Республики Марий Эл (20 февральын 2023). Тергӹмӹ кечӹ: 11 сентябрьын 2025.