Атом промышленностьын пӓшӓзӹн кечӹжӹ
Атом промышленностьын пӓшӓзӹн кечӹжӹ — Россий Федерацин атом промышленностьышты труйышы цилӓ пӓшӓзӹн профессиональный айо. И йӹде 28 сентябрьын пӓлемдӓлтеш.
Айон историжӹ
«Атом промышленностьын пӓшӓзӹн кечӹжӹ» айом Россий Федерацин президентӹн В. В. Путинӹн 2005 ишӹ 3 июньыштышы 633-шы №-ӓн «Атом промышленностьын пӓшӓзӹн кечӹжӹ гишӓн» Указшы доно ӹштӹмӹ. Ти указышты попымы:
Профессиональный айом — Атом промышленностьын пӓшӓзӹн кечӹжӹм — увертӓрӓш дӓ тӹдӹм 28 сентябрьын эртӓрӓш[1].
Ти айом эртарӹмӹ кечӹм такеш агыл айырымы. Ти кечӹн 1942 ин 28 сентябрьын СССР-н Оборонын кугижаншӹ комитет «Уран шотышты пӓшӓм тӓрвӓтӹмӹ гишӓн» шӱдӹмӓшӹм лыктын. Тӹштӹ попымы:
СССР-н Наука академим атомный энергим уранын ядрожым шелӹштмӹ йӧн доно кычылтмы шотышты ланзылымы пӓшӓм угӹц тӹнгӓлӹктӓш дӓ 1943 и 1 апрель якте Оборонын кугижаншӹ комитетлӓн уран бомбым ӓли уран топливӹм ӹштен кердмӹ гишӓн докладым анжыктыкташ.
Ти шанымаш доно шӱдӹмӓштӹ сирӹмӹ:
а) Наука академи сага атомный ядрон пасна лабораторижӹм пачаш... в) 1943 и 1 апрель якте атомный ядрон лабораториштӹ 235-шӹ №-ӓн уранын ядрожым шелӹшт кердмӹжӹм ӹштен анжан... 1942 и 1 ноябрь якте СССР-н Наука академиш, нейтронвлӓн соок ылшы источникӹм йӓмдӹлӓш манын, ик грамм радим дӓ, центрифугым лабораторин условижӹ доно шӹндӓш манын, 30 грамм платинӹм пуаш[2].
Тенге, 28 сентябрь кечӹм СССР-н дӓ Российӹн атомный энергетикӹн кечӹжӹ семӹнь манаш лиэш.
Тенгеок анжы
Примечани
- ↑ Указ Президента РФ от 03.06.2005 г. № 633 «О Дне работника атомной промышленности» — ОАО Атомный страховой брокер. Тергӹмӹ кечӹ: 28 сентябрьын 2009. Архивируйымы 3 июльын 2007 года.
- ↑ «Атомный проект СССР. К 60-летию создания ядерного щита России». Выставки. Архивы России. Тергӹмӹ кечӹ: 28 сентябрьын 2009. Архивируйымы 17 январьын 2013 года.