Айглова, Таисия Ямбатровна
| Таисия Ямбатровна Айглова | |||||
|---|---|---|---|---|---|
.jpg) | |||||
| Шачмы кечӹ | 13 август 1927 | ||||
| Шачмы вӓр | |||||
| Колымы кечӹ | 14 декабрь 1994 (67 и) | ||||
| Колымы вӓр | |||||
| Гражданство |
 СССР Россий |
||||
| Пӓшӓн йиш | вольык анжышы | ||||
| Награда дӓ премивлӓ |
|
||||
Таисия Ямбатровна Айглова (1927–1994) — Мары АССР-ышты Мари-Турекский районын вольык анжышы. 1966 ин вольык анжымашым виӓнгдӹмӹ гишӓн Социалистический Пӓшӓн Геройжы лӹмӹм дӓ Ленин орденӹм нӓлӹн.
Ӹлӹмӓш корныжы
Таисия Ямбатровна 1927 ин 13 августын Мары автономный областьын Мари-Турекский кантоныштышы Ӱл Турек солаэш шачын. 1942 ин 7 классым тымень пӹтӓрен, вара «Социализм» колхозышты саснам анжен, — цацен ӹштӹмӹ пӓшӓжӹ гишӓн «Кого Ӓтямӱлӓндӹ вырсышты яжон пӓшӓлӹмӹ гишӓн» медальым нӓлӹн. 1946 ин Таисия Ямбатровна сасна фермӹм вуйлатен, изиш варарак Мосолов лӹмӓн колхозышты сасна анжышы ылын — каждый ӓвӓ сасна гӹц 15–20 сасна игӹм нӓлӹн[1][2].
1956 ин Таисия Ямбатровна Казахстаныш кен дӓ кок и дӓ пелӹ «Донской» совхозышты дояркеш пӓшӓм ӹштен[2]. Икманяр жеп гӹц, ӓвӓжӹн ясы лимӹжӹ велдӹк, Таисия Ямбатровна шачмы вӓрӹшкӹжӹ пӧртӹлӹн дӓ шӹшерӓн-товарный фермӹштӹ дояркеш пӓшӓм ӹштӓш тӹнгӓлӹн[1][2]. 1960 ин тӹдӹлӓн каждый ышкал гӹц 3 100 килограмм шӹшерӹм шыпшылын, 1961 ин — 2898. Тидӹ кого сӹнгӹмӓш ылын, вет 1950 ивлӓ мычашын каждый ышкал гӹц икпоратка шот доно 2 500 килограмм шӹшерӹм шыпшылыныт. 1962 ин Таисия Ямбатровна угӹц сасна анжышеш пӓшӓм ӹштӓш келшен, вес иэш 272 сасна игӹм переген коден; 1964 — 516; 1965 ин — 474. Каждый ӓвӓ сасна гӹц 20 сасна игӹм нӓлӹн[2]. Таисия Ямбатровна 1961–1963 ивлӓн Мари-Турекский районыштышы труйышы депутатвлӓн Советшӹн депутатешӹжӹ айыралтын, 1969-шӹ ин колхозниквлӓн Всесоюзный съездшӹн делегатешӹжӹ. Тилец пасна тӹдӹ икманяр гӓнӓ Халык хозяйствын сӹнгӹмӓш выставкыжын (ВДНХ) участникшӹ ылын[1].
1966 иӓш 22 марташ СССР-ӹн Верховный Советшӹн Президиумжын указшы семӹнь Таисия Ямбатровна Социалистический Пӓшӓн Геройжы лӹмӹм дӓ вольык анжымашым виӓнгдӹмӓштӹ сӹнгӹмӓшӹш шомы гишӓн Ленин орденӹм нӓлӹн. 1968 ин тӹдӹ ВДНХ-ан шӧртньӹ медальжым нӓлӹн; 1971 ин 8 апрельӹн — «Пӓшӓштӹ патырлык верц» медальым. 1978 ин Таисия Ямбатровна пенсиш кен, колымыжы якте 1994 и 14 декабрья якте Мары Эл Республикӹштӹшӹ Мари-Турекский районын Мари-Турек посёлкыштыжы ӹлен[1][2].
Мактымашвлӓ
| И | Награда |
|---|---|
| 1966 | Социалистический Пӓшӓн Геройжы звани |
| 1966 | Ленин орден |
| 1968 | ВДНХ-ан шӧртньӹ медальжы |
| 1971 | «Пӓшӓштӹ патырлык верц» медаль |
Примечани
- ↑ 1 2 3 4 Кузоватов, Сергей Айглова Таисия Ямбатровна. Герои страны. Дата обращения: 20 февральын 2020. Архивировано 11 февральын 2018 года.
- ↑ 1 2 3 4 5 Айглова Таисия Ямбатровна. Марийская история в лицах (09-090-2017). Дата обращения: 20 февральын 2020. Архивировано 26 мартын 2019 года.
Литература
- Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 16. — 2032 экз. — ISBN 5-87898-357-0.
Ссылкывлӓ
- Кузоватов, Сергей. Айглова Таисия Ямбатровна. Сайт «Герои страны». Дата обращения: 20 февральын 2020.