Яков Эшпай лӹмӓн Мары кугижӓншӹ филармони
| Яков Эшпай лӹмӓн Мары кугижӓншӹ филармони | |
|---|---|
 | |
| Вӓрлӓнӹмӓш | Йошкар-Ола, Вознесенский ӧлицӓ, 75 пӧрт |
| Координатывлӓ | 56°38′18″ с. ш. 47°53′19″ в. д.GЯO |
| Негӹцӹм пиштӹмӹ | 31 август 1938 |
| Вуйлатышы | Паскичев Алексей Анатольевич |
| Сайт | filmariel.ru |
 |
|
Яков Эшпай лӹмӓн Мары кугижӓншӹ филармони (руш. Марийская государственная филармония имени Якова Эшпая) – Мары Эл Республикӹн концерт шотышты тӹнг профессиональный организацижӹ. Организационно-правовой формыжы – культурын кугижӓншӹ автономный учреждени. Мары композитор дӓ хормейстер Яков Андреевич Эшпай лӹмеш лӹмдӹмӹ.
Истори
Мары кугижӓншӹ филармоним Мары АССР-ӹн Халык комиссарвлӓн кӓнгӓшӹн 1938 и 31 августаш Постановленижӹ доно пачмы. Ик и лошты 114 концертӹм анжыктымы. МАССР правительствӹн пынзалтышыжы семӹнь 1939 ин 23 июльын филармони сага мырышы дӓ куштышы ансамбльым (вуйлатышы Искандаров А. И.), симфонический дӓ духовой оркестрвлӓм цымырымы. Ансамбльлан негӹцӹм хор ӹштен, хорын мырымыжылан халык колоритӹм коллективӹш 1940 ин пырышы П. С. Тойдемар вуйлатымы кӓрш мастарвлӓн ансамбль ӹштен[1].
Вуйлатышывлӓ
- Емельянов Михаил Александрович (1958-1965);
- Виногоров Иван Александрович (1965-1981);
- Яшметова Раисия Лукияновна (1991-1998);
- Егоров Иван Ильич (2007-2014, 2015-2017);
- Пуртов Андрей Петрович (2020-2025);
- Юзыкайн Эрик Алексеевич (2014-2015);
- Паскичев Алексей Анатольевич (2025-кӹзӹтшӹ жеп якте)[2].
Коллективвлӓ
- «Мары Эл» куштышы кугижӓншӹ ансамбль. Тӹнг балетмейстер – Мары Эл Республикӹн халык артистшӹ, Российӹн заслуженный артистшӹ Селиванов Александр Петрович[3]. Оркестр дирижёр – Пчёлкин Сергей Александрович.
- С. Элембаев лӹмӓн «Мары кымдем» халык инструментвлӓн кугижӓншӹ оркестр[4]. Художкственный вуйлатышы – Мары Эл Республикӹн халык артистшӹ Алексей Васильевич Волков[5].
- Алексей Искандаров лӹмӓн Мары кугижӓншӹ капелла.
- «Эренгер» халык мыры ансамбль. Тӹнг хормейстер – Мары Эл Республикӹн кульурын заслуженный пӓшӓзӹжӹ Чернова Светлана Васильевна.
- П. С. Тойдемар лӹмӓн мыры театр.
Филармонин ӹшкӹмжӹн концерт залжы 2021 и август якте ылде[6][7], лач тӹнӓм культура учрежденин ӹшкӹмжӹн у зданижӹм пачмы[8].
Здани
Филармони пачылтмыжы годшен кӓндӓкшлу и утла ӹшке просветительский пӓшӓжӹм вес театр учрежденивлӓн арендуйымы площадкывлӓштӹ виден. Йошар-Олан набережныйыйшты кым этажан зданим 2014 ин республикӹн бюджетеш чангаш тӹнгӓлмӹ, но финансировани ылдеӓт, 2017 ин шӹжӹм пӓшӓ шагалын. Объектӹм 2020 ин «Культура» нацпроектӹш пыртымы гишӓн тӹдӹм пакыла чангаш тӹнгӓлӹнӹт. 2021 ин 13 августын филармонин у зданижӹм пачыныт, тӹдӹм чангаш 650 млн утла тӓнгӓ кен. Зданим сӹлнештӓрӓш халык мотиввлӓм кычылтыныт. Анжымы залыш 356 эдем пыра: партер – 232 вӓр, эче 23 ложышты вӓрлӓнӓ, 101 – балконышты. Хынам вӓшлимӹ кымдыкым сӹлнештӓрӹмӹ тӹнг материал – гранит. Репетицивлӓлӓн кого кӹдежвлӓм ӹштӹмӹ, у оборудованим вӓрӓнгдӹмӹ[9][10].
Пӓлемдӹмӓш
- ↑ Цыкина Ю. Ю. Исполнительские коллективы Марийской АССР в 1930-е гг. как фактор формирования профессионального музыкального искусства // Исторические, философские, политические и юридические науки, культурология и искусствоведение. Вопросы теории и практики. — 2013. — Т. 31, № 5. — С. 195. — ISSN 1997-292X.
- ↑ Кидшер. Врио директора Маргосфилармонии назначили Алексея Паскичева, Кидшер (31 мартын 2025). Дата обращения: 26 августын 2025.
- ↑ Государственный ансамбль танца «Марий Эл», Кидшер (23 июльын 2024). Дата обращения: 26 августын 2025.
- ↑ Пой, живи и побеждай (руш.). MariMedia. Тергӹмӹ кечӹ: 26 августын 2025. Архивируйымы 4 августын 2022 года.
- ↑ Оркестр народных инструментов «Марий кундем». Марийская государственная филармония. Тергӹмӹ кечӹ: 26 августын 2025. Архивируйымы 22 мартын 2018 года.
- ↑ Кира Золотова. Будни и праздники марийской филармонии. Марийской государственной филармонии имени Я. Эшпая исполнилось 75 лет. МК.РУ Йошкар-Ола (13 ноябрьын 2013). Тергӹмӹ кечӹ: 26 августын 2025. Архивируйымы 30 мартын 2018 года.
- ↑ В Марий Эл активно строится здание филармонии. vnd12.ru (11 июньын 2015). Тергӹмӹ кечӹ: 26 августын 2025. Архивируйымы 30 мартын 2018 года.
- ↑ В Йошкар-Оле открыли здание Марийской государственной филармонии. ТАСС (13 августын 2021). Тергӹмӹ кечӹ: 26 августын 2025. Архивируйымы 19 августын 2021 года.
- ↑ В Йошкар-Оле открыто новое здание Марийской государственной филармонии имени Якова Эшпая. Официальный сайт Министерства культуры Российской Федерации (13 августын 2021). Тергӹмӹ кечӹ: 26 августын 2025. Архивируйымы 19 августын 2021 года.
- ↑ Маргосфилармония имени Якова Эшпая обрела свой дом. Интернет-издание«Марийская правда» (11 августын 2021). Тергӹмӹ кечӹ: 26 августын 2025. Архивируйымы 19 августын 2021 года.
Литература
- Марийская государственная филармония им. Я. Эшпая // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 506. — 872 с. — 3505 экз. — ISBN 978-5-94950-049-1.