Россий МВД-н кӧргӹ войскавлӓн специальный назначениӓн подразделенивлӓн кечӹ

Спецназ ВВ МВД
Сӓндӓлӹк	Россий
Ӹштӓлтӹн	29.08.1977

Россий МВД-н кӧргӹ войскавлӓн специальный назначениӓн подразделенивлӓн кечӹ — Россий МВД-н кӧргӹ войскавлӓн специальный назначениӓн подразделенивлӓн боецвлӓн дӓ нӹнӹн родня дон лишӹлвлӓштӹштӹн пӓлемдӹмӹ ведомственный айо.

29 августын пӓлемдӓлтеш.

Айо 2006 ин Россий Федерацин президентӹн «РФ-н Вооруженный силашты профессиональный айовлӓм дӓ ӓштӹмӹ кечӹвлӓм эртӓрӹмӹ гишӓн» указшы семӹнь официально утверждӓйӹмӹ ылын.

Истори

Официально айо 29 августын пӓлемдӓлтеш. Кыды-тидӹжӹ айо датеш 29 декабрьым шотлат. Ти кечӹн 1977 ин специальный назначениӓн тыменьмӹ рота (УРСН) ӹштӹмӹ ылын. Вара ти базышты кымдан пӓлӹмӹ «Витязь» спецназ отряд шачын.

Ротын икӹмшӹ командиржӹ капитан В. А. Мальцев лин. Взводын пӹтӓриш командиржӹ лейтенант Сергей Лысюк лин. Виӓн эртӓрӹмӹ занятивлӓ ротым, шагалтымы задачывлӓм кӱкшӹ качество доно шокташ манын, Олимпиадеш йӓмдӹленӹт. Тӹ кытлашты рота СССР («Альфа») КГБ «А» группа сага шӹрен тренируялтын. УРСН боецвлӓ физический йӓмдӹлӓлтмӓш доно «Альфа» отрядым эртенӹт. «Альфовецвлӓ» огневой йӓмдӹлӓлтмӓш доно яжорак ылыныт. «Альфа» отрядышты офицервлӓ, а УРСН-тӹ «срочниквлӓ» служенӹт.

Сергей Лысюк: «Яжо салтаклан мӹнь соок «тӹнь» манын попенӓм». Салтак вуйнамат гӹнь, кӧргӹ вижӹ, пӓшӓм яратымыжы дӓ цацымыжы доно мӹлӓнем лишӹл агыл гӹнь, мӹнь тӹдӹм устав семӹнь «тӓ» манынам. Хоть-махань эдем командирӹн отношеним токыжы цакла, ороды агыл гӹнь, тӧр иктешлӹмӓшӹм ӹштӓ. Тидӹ панибратство лиде, малын манаш гӹнь, мӓ тӹнӓм ик тӹшкӓ лин ылна, цилӓн ик цель докы кеннӓ. Шукы салтакшы тидӹм ынгылен, мам ӹштӓш лимӹ цикӹм ванжыде. А кӱ ти цикӹм ванжа ылын, тӹдӹм салтак доно сержантвлӓ ӹшке вӓрӹш шагалтенӹт» ӓштӓ.

Пӹтӓришӹ этапышты, Олимпийский мадмашты сакой штатдымы ситуацивлӓм решӓш манын, программа ӹштӹмӹ ылын: мӱлӓндӹ вӹлнӹшӹ транспортышты ӓли самолётышты заложниквлӓм ытарымы годым. Программын материалвлӓжӹ КГБ-н спецподразделенивлӓн, Воздушно-десантный войскавлӓн, вескид сӓндӓлӹквлӓн антитеррористический подразделенивлӓн наработкывлӓ негӹцеш ӹштӓлтӹнӹт.

У подразделенин символжы тӹдӹ молы гӹц айырышы краповый берет лин. Тӹшток, краповый беретӹм намал кердӓш манын, экзаменӹм шанен лыкмы.

90 ивлӓн тӹнгӓлтӹшӹштӹ эче кым отряд «Росич», «Русь» дӓ «Скиф» ӹштӹмӹ ылыныт. Тенгеок оперативный назначениӓн чӓстьвлӓн составышты (мотострелковый частьвлӓн) специальный назначениӓн группывлӓ (ГСН) ылыныт. Тенге 22-шы бригадышты (Калач-на-Дону) «Аллигатор» ГСН , 34-шӹ бригадышты (Шумилово) «Оборотень» ГСН ылыныт. Каждый ротышты 3 взвод ылын. 1-шӹ дӓ 2-шы взводлӓм штурмовой задачывлӓм решӓш йӓмдӹленӹт, а 3-шы взводым разведывательный задачым решӓш манын йӓмдӹлӹмӹ ылын.

1995 ин июньын «Русь» специальный назначениӓн отряд Буденновскышты заложниквлӓм ытарымы операциштӹ участвуен. Пел иштӹ 1996 ин январьын «Русь» дон «Витязь» специальный назначениӓн отрядвлӓ 1-шӹ пасна назначениӓн полкын специальный назначениӓн группыжы доно иквӓреш Перовомайск солам штурмуенӹт. Ти солам Салман Радуевӹн боевиквлӓ тӹшкӓ роалтен нӓлӹн ылын.

Икӹмшӹ чеченский кампани пӹтӹмӹкӹ, спецназын у отрядвлӓм ӹштӓш тӹнгӓлмӹ. Нӹнӹ полк дон бригадывлӓштӹ карангдымы специальный назначениӓн отрядвлӓн шотеш ӹштӹмӹ ылыныт. Тенге спецназын 15-шӹ «Вятич» отряд 3 специальный назначениӓн группа негӹцеш ӹштӹмӹ ылын. Спецназын 20-шы отряд (Саратов) «Оборотень» специальный назначениӓн группа негӹцеш ӹштӹмӹ ылын. Анзыцрак «Оборотень» 34-шӹ бригадын состав гӹц лыкмы ылын.

2014 ин 24 октябрьын Симферопыльышты Россий МВД-н кӧргӹ войскан Йыдпелвел-Кавказ кымдемӹштӹшӹ 35-шӹ разведывательный отрядлан «Русь» лӹмӹм пумы церемони эртен.

Примечани