Пурылыкын цилӓ сӓндӓлӹк лошты кечӹжӹ

Ирӹкӓн энциклопеди Википеди гӹц материал
Ежегодный неофициальный праздник: «Всемирный день доброты», отмечаемый 13 ноября и круглый год добрыми делами и волонтерством.

Пурылыкын цилӓ сӓндӓлӹк лошты кечӹжӹ (руш. Всемирный день доброты) — международный айо, 13 ноябрьын пӓлемдӓлтеш. Ти кечӹм 1998 ин Цилӓ сӓндӓлӹк лошты пурылык движени, нацивлӓн пурылык правительственный агыл организацивлӓн коалицивлӓ пыртенӹт. Тидӹ официальный айо агыл и йӹде кыды-тидӹ сӓндӓлӹкӹштӹ пӓлемдӓлтеш. Пуры пӓшӓм ӹштӹшӹ эдемвлӓ кӓп-кӹл шотыштат ӹшкӹмӹштӹм яжон шижӹт, виштӓт яжо, кӧргӹ шӱлӹшӹшӓт пӧрттӱ доно иктӧр (гармоништӹ) ылеш[1][2][3][4].

Айон историжӹ

1997 ин Япоништӹ политика дӓ религи доно кӹлдӓлтдӹмӹ «Пурылык верц цилӓ сӓндӓлӹк лоштышы движени» волонтерский движеним ӹштӹмӹ ылын. Волонтерский тӹшкӓш тихиокеанский регионын эдемвлӓжӹ ушненӹт. И эртӹмӹкӹ, 13 ноябрьын Токиошты волонтерский движенин икшӹ конференцижӹ эртен. Тӹдӹм пачмы кечӹ у айон — Пурылыкын цилӓ сӓндӓлӹк лошты кечӹн — айырымы датажы лин.

Сакой сӓндӓлӹк гӹц пурылык гишӓн ик шанымашан эдемвлӓ и гӹц иш цилӓ сӓндӓлӹк мычкы цӓрнӹде пӓшӓм ӹштӓт дӓ молымат техень ашкылым ӹштӓш кымылангдат. Движенин ӹшке официальный документшӹ улы — «Пурылыкын декларацижӹ», тӹдӹ тенге ынгылдара:

Мӓ эдемӹн проста пурылыкшым сек керӓлеш шотленӓ, тӹдӹ малын ӹлӹмӓш пуалтын ынгылаш, пуры шанымашым ӹлӹмӓшӹш шӓрӓш палша. Тидӹн доно мӓ Пурылыкын цилӓ сӓндӓлӹк лошты движенин шачмыжым ынгылдаренӓ. Мӓ каждый сӓндӓлӹкӹштӹшӹ организацивлӓ гач вӓш ушнаш тӹнгӓлӹнӓ, цилӓ сӓндӓлӹк лошты кӹлӹм ӹштен, сӓндӓлӹкӹм пурыракым ӹштенӓ.

Кок иштӹ икӓнӓ Пурылык верц цилӓ сӓндӓлӹкӹштӹшӹ движени советӹм айыра. Движеништӹшӹ эдемвлӓн тӹнг шайыштмашышты интернет гач эртӓ, тӹштӹ нӹнӹ ӹшке пӓшӓштӹ гишӓн иквӓреш попат дӓ кыце тӹдӹм ӹлӹмӓшӹштӹ пайдален кычылташ манын шанат.

Айон овуцажы

Айом цилӓ сӓндӓлӹкӹн шукы странашты пӓлемдӓт. И йӹде ушнышы странавлӓн чотышты когоэмеш. Пурылыкын цилӓ сӓндӓлӹк лошты кечӹн символжы йӓнг ылеш. 2009 ин Москвашты, Манежный площадьышты флешмоб эртен. Цилӓ сӓндӓлӹкӹн цӓш лӹман фонтан сага погынышывлӓ кого «ӹлӹшӹ крӱгӓм» ӹштенӹт[5].

Тидӹ кечӹм пӓлемдӹмӓштӹ раскыды правил дон традицивлӓ уке ылыт, седӹндон каждый эдем махань пуры пӓшӓм ӹштӓш, шкеок айыра. Вет пуры пӓшӓм ӹштен — тӹнь сӓндӓлӹкӹм яжоракым ӹштет! Шамак толшеш, незерӹн ӹлӹшӹ эдемвлӓлӓн пӓшӓ ӓли окса доно палшаш лиэш. Ӹлӓлшӹ пашкудылан палшаш, подъездӹм мышкаш ӓли субботникӹм эртӓрӓш лиэш. Томадымы вольыкым ӹшке докы нӓлӓш, приютышты ӹлшӹ пим тӱгӹ каштыкташ ӓли томадымы вольыклан качкышым нӓлӓш. Цилӓ тӓмдӓн кидӹштӹдӓ. Ӹшке пуры шанымашдам шукемдӹдӓ, пуры пӓшӓм айо годым веле агыл, а и мычкы ӹштӹдӓ. Йӹр ылшывлӓлӓн палшен, тӓ ӹшкӹлӓндӓӓт палшедӓ, ӹшкӹмдӓм ӹшке сусуэмдедӓ[6][7][8].

Примечани

  1. ↑ Quick, J. (2021). Celebrate World Kindness Day 13 November 2021. Journal of Perioperative Practice, 31(11), 404—404. PMID 34747252 doi:10.1177/17504589211054717
  2. ↑ Rowland, L., & Curry, O. S. (2019). A range of kindness activities boost happiness. The Journal of Social Psychology, 159(3), 340—343. PMID 29702043 doi:10.1080/00224545.2018.1469461
  3. ↑ Buchanan, K., & Sandstrom, G. M. (2023). Buffering the effects of bad news: Exposure to others’ kindness alleviates the aversive effects of viewing others’ acts of immorality. Plos one, 18(5), e0284438. PMID 37195988 PMC 10191316 doi:10.1371/journal.pone.0284438
  4. ↑ Curry, O. S., Rowland, L. A., Van Lissa, C. J., Zlotowitz, S., McAlaney, J., & Whitehouse, H. (2018). Happy to help? A systematic review and meta-analysis of the effects of performing acts of kindness on the well-being of the actor. Journal of Experimental Social Psychology, 76, 320—329. doi:10.1016/j.jesp.2018.02.014
  5. ↑ 13 ноября 2023 — Всемирный день доброты: История и традиции праздника. Общественная служба новостей
  6. ↑ Aknin, L. B., Barrington-Leigh, C. P., Dunn, E. W., Helliwell, J. F., Burns, J., Biswas-Diener, R., … & Norton, M. I. (2013). Prosocial spending and well-being: cross-cultural evidence for a psychological universal. Journal of personality and social psychology, 104(4), 635. PMID 23421360 doi:10.1037/a0031578
  7. ↑ Rhoads, S. A., & Marsh, A. A. (2023). Doing good and feeling good: Relationships between altruism and well-being for altruists, beneficiaries, and observers. World Happiness Report, 103—130.
  8. ↑ Myers, D. G. (2023). Teaching: The Unexpected Pleasure of Doing Good. APS Observer, 36.

Ссылкывлӓ

«https://mrj.ruwiki.ru/w/index.php?title=Пурылыкын_цилӓ_сӓндӓлӹк_лошты_кечӹжӹ&oldid=304399» гӹц нӓлмӹ