Кутрухин, Константин Прокофьевич
| Константин Прокофьевич Кутрухин | |||||
|---|---|---|---|---|---|
 | |||||
| Шачмы кечӹ | 1916 и 1 февраль | ||||
| Шачмы вӓр | Удельный Шумец сола, Юринский волость, Васильсурский уезд, Нижегородский губерни, Российский импери | ||||
| Колымы кечӹ | 1944 и 27 июнь (28 и) | ||||
| Колымы вӓр | Ходаково сола, Ушачский район, Витебский область, Белорусский ССР, СССР | ||||
| Пырымаш |
 СССР |
||||
| Войскан йиш | пехота | ||||
| Звани |
гвардин  |
||||
| Часть |
51-шӹ гварди стрелковый дивизи 156-шы гварди стрелковый полк |
||||
| Командуен | отделенин командиржӹ | ||||
| Кредӓлмӓш/вырсы | Кого Отечественный вырсы | ||||
| Награда дӓ преми |
|
||||
Константин Прокопьевич Кутрухин (1.2.1916, Удельный Шумец сола, Юринский волость, Васильсурский уезд, Нижегородский губерни, Российский импери (кӹзӹт Удельный сола, Йӱрнӹ район, Мары Эл, Россий) — 27.6.1944, Ходаково сола, Ушачский район, Витебский область, Белорусский ССР, СССР (кӹзӹт Белорусси)) — Кого Отечественный вырсын участникшӹ, 156-шы гварди стрелковый полкын стрелковый отделенин командиржӹ (51-шӹ гварди стрелковый дивизи, 6-шы гварди арми, 1-шӹ Прибалтийский фронт), гвардин сержант. Ӹшке кӓпшӹ доно пулемётын амбразурыжым питӹрен. Совет Союзын Геройжы.
Ӹлӹмӓш корныжы
1916 ин 1 февральын хресӓнь семняэш шачын, школышты нӹл (вес данный семӹнь вӹц) классым пӹтӓрен, вара хресӓнь пӓшӓм шоктен, 1931 и гӹц колхозышты, телӹм шӹргӹм йӓмдӹлӹмӓштӹ пӓшӓлен, шошым да кӓнгӹжӹм Йылышты шалым валтышы ылын. 1937 ин шӹжӹм РККА-ш нӓлӹнӹт, 1940 и декабрь якте цикӹштӹ, 42-шы пограничный отрядышты Закавказье регионышты служен. 1941 ин июльын угӹц армиш кеен, 1942 и 15 апрель гӹц бойышты участвуен.
51-шӹ гварди стрелковый дивизин 207-шӹ гварди стрелковый полкын автоматчиквлӓн ротын писарь-каптенармус лимӹ годым Сталинград лишӓн кредӓлмӓштӹ айыртемӓлтӹн. Наступательный бой годым ротылан шокшы качкышым цӓрнӹде шыпшыктен, 1943 ин 29 январьын Сталинградышты тышманын 5 салтакшым пленӹш нӓлӹн. 1943 ин 2 февральын «Боевой заслуга гишӓн» медаль доно награждайымы ылын. Дивизи сага пакыла кредӓлӹн, кок гӓнӓ шушырген: 1943 ин 19 августын Богодухов районышты дӓ 1943 ин 18 декабрьын Невель районышты, угӹц стройыш пӧртӹлӹн.
Белорусский стратегический наступательный операци годым 51-шӹ гварди стрелковый дивизи Витебск дорц вадывелнӹрӓк наступаен. Тӹ жепеш гвардин сержантшы Кутрухин, 156-шы гварди полк доно командуен, 1944 ин 25 июньын пӹтӓришӹвлӓ лошты Вадывел Двинам форсируен дӓ плацдармышты ылмыжы годым вӹц контратакым цӓктӓрен. 1944 ин 27 июньын полк Ходаково дон Татарщино солавлӓ лишӓн кредӓлӹн. Войскавлӓлӓн анзык кейӓш кӱкшикӓштӹ вӓрӓнгдӹмӹ дзот гӹц лӓкшӹ пулемёт тыл мешӓен. Ӹшке отделенижӹ доно дзот докы тыл гӹц каштын сӓрнен, гвардин сержантшы Кутрухин амбразур вӹкӹ тӹргештен дӓ ӹшке кӓпшӹ доно питӹрен.
Поречье сола гӹц кечӹвӓлвел-вадывел монгырым дӓ Балбетча сола (кӹзӹт Бешенковичи район) гӹц иктӓк-пелӓк нӓрӹ кечӹвӓлвел-ирвел монгырым шӹргӹ тӹрӹштӹ тайымы. Вырсы паштек Ушачский раонын Дубровка сола покшалны ӹзӓк-шоляк шӹгерлӓш угӹц тайымы ылын[1].
СССР Кӱшӹл Совет Президиумын 1945 ишӹ 24 марташ указшы семӹнь немӹц-фашист захватчиквлӓ доно кредӓлмӹ фронтышты командованин заданижӹм яжон шоктымы гишӓн, тидӹн годым лӱддӹмӹм дӓ героизмӹм анжыктымы гишӓн гвардин сержантшы Кутрухин Константин Прокофьевичлан, колымыкыжы, Совет Союзын Геройжы званим пумы.
Йошкар-Олашты дӓ Йӱрнӹштӹ Геройын лӹмжӹ доно ӧлицӓвлӓм лӹмдӹмӹ. Тылец пасна, Йӱрнӹштӹ памятникӹм шагалтымы. Тенгеок Константин Кутрухинӹн ӹлӹмӹ пӧртеш мемориальный хангам вӓрӓнгдӹмӹ. Гвардин сержантшы Константин Кутрухинын лӹмжӹм Дубровка солан школжы намалеш; солашты ӹзӓк-шоляк шӹгер вӹлнӹ памятникӹм шагалтымы.
Наградывлӓ
- Совет Союзын Геройжы (24.03.1945).
- Ленин Орден (24.03.1945).
- «Боевой заслуга гишӓн» медаль (02.02.1943).
- «Сталинградым обороняйӹмӹ гишӓн» медаль.
Ӓшӹндӓрӹмӓш
- Константин Кутрухинӹн лӹмжӹм Ушачский районын Дубровка солан школжы намалеш.
- Подвигӹм ӹштӹмӹ вӓрӹштӹ обелискӹм шагалтымы[2].
- Бюстшӹм Мары Эл Республикӹн хала типӓн Йӱрнӹ посёлкышты вӓрӓнгдӹмӹ.
- Мемориальный хангавлӓ Мары Эл Республикӹн хала типӓн Йӱрнӹ посёлкышты дӓ Удельный солашты вӓрӓнгдӹмы ылыныт.
- Мары Эл Республикӹн тӹнг халаштыжы Йошкар-Олашты дӓ хала типӓн Йӱрнӹ посёлкышты Геройын лӹмжӹ доно ӧлицӓвлӓм лӹмдӹмӹ.
- Белоруссин Ушачский раонын Дубровка сола покшалны ӹзӓк-шоляк шӹгер вӹлнӹ 1964 ин памятникӹм шагалтымы[3].
- Российӹштӹшӹ военно-исторический общество Кутрухин лӹмеш мемориальный хангам тӹдӹн тыменьмӹ Йӱрнӹ районыштышы Горношумецкий школын стенӓэш вӓрӓнгден.
Примечани
- ↑ Помнікі гісторыі і архітэктуры Ушацкага раёна // Прыдзвінскі край: гісторыя і сучаснасць Архивный копи от 29 сентябрьын 2015 на Wayback Machine(белор.)
- ↑ День памяти героя К. П. Кутрухина в Дубровской школе. Архивный копи от 29 сентябрьын 2015 на Wayback Machine(белор.)
- ↑ Помнік у в. Дубраўка. Архивный копи от 29 сентябрьын 2015 на Wayback Machine(белор.)
Литература
- Белорусская ССР: Краткая энциклопедия. В 5-ти т. Т.5. Биографический справочник / Ред. колл.: П. У. Бровка и др. — Мн.: Гл. ред. Белорус. Сов. Энциклопедии, 1981. — Т. 5. — 740 с. — 50 000 экз.
- Кутрухин Константин Прокофьевич // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 205. — 2032 экз. — ISBN 5-87898-357-0.
- Кутрухин Константин Прокофьевич // История Марийского края в лицах. 1941—1945 гг. Великая Отечественная война. — Йошкар-Ола: МарНИИЯЛИ, 2015. — С. 129—130. — 374 с. — 500 экз. — ISBN 978-5-94950-070-5.
- Кутрухин Константин Прокофьевич // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 474. — 872 с. — 3505 экз. — ISBN 978-5-94950-049-1.