Костров, Станислав Иванович

РУВИКИ-штӹ техень фамили доно вес эдемвлӓ гишӓн статьявлӓ ылыт Костров.

Станислав Иванович Костров
Шачмы кечӹ	1923 и 10 март(1923-03-10)
Шачмы вӓр	Шепетовка хала, Хмельницкий область, УССР, СССР
Колымы кечӹ	2001 и 12 август(2001-08-12) (78 и)
Колымы вӓр	Йошкар-Ола Мары Эл Республика Россий Федераци
Пырымаш	СССР
Войскан йиш	пехота
Служымы жеп	1942—1946
Звани
Кредӓлмӓш/вырсы	Кого Отечественный вырсы
Награда дӓ преми

Станислав Иванович Костров (1923 и 10 март, Шепетовка, Волынский губерня — 12 август 2001 и, Йошкар-Ола) — Совет Армин когорак лейтенантшы, Кого Отечественный вырсын участникшӹ, Совет Союзын Геройжы (1945).

Ӹлӹмӓш корныжы

Станислав Костров 1923 ин 10 мартын Шепетовка халашты шачын (кӹзӹт — Украинӹн Хмельницкий кымдемжӹ). Изижӹ годымок семняжӹ доно иквӓреш Узбекский ССР-ын Самарканд кымдемӹштӹшӹ Зиадин посёлкыш ӹлӓш ванжен, тӹштӹ кӹдӓлӓш школым тымень пӹтӓрен дӓ библиотекарьын пӓшӓм ӹштен. 1942 ин Костровым Пӓшӓзӹ-кресӓньӹк Якшар Армиш служаш нӓлӹнӹт. Харьковыштышы пехотный училищӹм тымень пӹтӓрен. 1943 и август гӹц Кого Отечественный вырсын фронтвлӓштӹжӹ ылын. Брянск, Белорус дӓ 1-шӹ Белорус фронтвлӓштӹ кредӓлӹн, кым гӓнӓ шушырген. 1944 и августеш лейтенант Станислав Костров 1-шӹ Белорус фронтын 69-шӹ армижӹн 247-шӹ стрелковый дивизин 909-шӹ пулемётный взводшы доно командуен. Польшым ытарымы годым айыртемӓлтӹн.

1944 и 31 июль гӹц 1 август йыдым Костровын взводшы, тышманын лӱлӹлмӹ тыл лӹвец, Висла ӓнгӹр гач ванжен, вадывел сирӹштӹжӹ Пулавы хала донышы плацдармым роалтен нӓлӹн дӓ немӹцвлӓн кӓндӓкш контратакым цӓктӓрен, икманяр пулемётым, тенгеок тышманын шукы салтак дон офицержӹм йыксыр пӹтӓрен. Тӹ кредӓлмӓштӹ Костров нелӹн шушырген.

1945 и 24 март гӹц СССР Верховный Советӹн Президиумын Указшы доно «Вислым форсируйымы годым дӓ роалтен нӓлмӹ плацдармышты кредӓлмӓшвлӓштӹ лӱддӹмӓшӹм дӓ патыр ылмыжым анжыктымыжы гишӓн», лейтенант Станислав Костровлан Совет Союзын Геройжы лӹмӹм пумы дӓ Ленин орден дон «Шӧртньӹ шӹдӹр» медальым кычыктымы.

1946 ин когорак лейтенант звани дон Костровым запасыш колтенӹт. 1961 ин Азаныштышы совпартшколым тымень лӓктӹн. Йошкар-Олашты ӹлен, 1967–1987 ивлӓн Мары кугижӓншӹ педагогический институтын (кӹзӹт – Мары кугижӓншӹ университет) гражданский оборона кафедрӹштӹжӹ когорак тымдышы ылын. Общественный пӓшӓм шукы ӹштен.

2001 ин 12 августын колен, Йошкар-Олаштышы Туруново шӹгерлӓэш тайымы.

Тенгеок 1-шӹ степенян Отечественный вырсы орденжӹ дӓ кок Якшар Шӹдӹр орденжӹ, икманяр медальжы ылын.

Ӓшӹндӓрӹктӹмӓш

Узбекистанышты Зиадин посёлкышты Костров лӹмеш ӧлицӓм дӓ школым лӹмденӹт.

Примечани

Литература

• Наши Герои. — 2-е изд., перераб. и доп. — Йошкар-Ола, 1985.
• Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1987. — Т. 1 /Абаев — Любичев/. — 911 с. — 100 000 экз. — ISBN отс., Рег. № в РКП 87-95382.
• Воробьёв В. П., Ефимов Н. В. Герои Советского Союза. Справочник. — СПб., 2010.
• Костров Станислав Иванович // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 450—451. — 872 с. — 3505 экз. — ISBN 978-5-94950-049-1.
• Мочаев В. А. Колумб Валентин Христофорович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 219—220. — 606 с. — 1500 экз. — ISBN 978-5-905314-35-3.

Ссылкывлӓ

• Станислав Иванович Костров (руш.). Сайт «Герои страны».