Кологривов, Михаил Михайлович

Ирӹкӓн энциклопеди Википеди гӹц материал
РУВИКИ-штӹ техень фамили доно вес эдемвлӓ гишӓн статьявлӓ ылыт Кологривов.
Михаил Михайлович Кологривов
Кологривов Михаил Михайлович.jpg
Шачмы кечӹ 1919 и 19 ноябрь(1919-11-19)
Шачмы вӓр Кокшайск сола, Царевококшайский уезд, Казанский губерни, РСФСР
Колымы кечӹ 1964 и 16 июль(1964-07-16) (44 и)
Колымы вӓр Одесса, Украин ССР, СССР
Пырымаш  СССР
Войскан йиш ВВС ВМФ СССР
Служымы жеп 1937—1957
Звани СССР ВВС подполковник
Часть ВВС-н Шим тангыж флот
Кредӓлмӓш/вырсы Кого Отечественный вырсы
Награда дӓ преми
Герой Советского Союза — 1944
Орден Ленина — 1944 Орден Красного Знамени Орден Красного Знамени Орден Красного Знамени
Орден Александра Невского Орден Красной Звезды Медаль «За боевые заслуги» SU Medal For the Defence of Sevastopol ribbon.svg
Медаль «За оборону Кавказа» Медаль «За победу над Германией в Великой Отечественной войне 1941—1945 гг.» SU Medal 30 Years of the Soviet Army and Navy ribbon.svg
Советская гвардия

Михаил Михайлович Кологривов (1919-1964) – СССР ВМФ-ын истребитель авиацин советский ас-лётчик, Совет Союзын Геройжы (5.11.1944). Подполковник (28.04.1949)[1].

Ӹлӹмӓш корныжы

1919 ин 19 ноябрьын Кокшайск солашты (кӹзӹт Мары Эл Республикӹн Звенигово кымдемжӹ) шачын. Школышты ӹндекш классым дӓ Ленинградыштышы точный механика дӓ оптика техникумын икшӹ курсым тымень пӹтӓрен.

1937 ин августын Пӓшӓзӹ-кресӓньӹк Якшар Флотыш служаш нӓлмӹ. 1939 ин Ейскышты И. В. Сталин лӹмӓн Сӓр-кредӓлмӓш авиаци учильищӹм тымень пӹтӓрен. 1939 и декабрь гӹц Шим Тангыж ВВС флотышты 8-шӹ истребитель авиаци полкышты изирӓк лётчик ылын[2].

Кого Отечественный вырсышты пӹтӓришӹ кечӹ гӹцок кредӓлмӓшвлӓштӹ ылын: тӹдӹн полкшы Евпаториштӹшӹ аэродромышты вӓрлӓнен (вӓшке Севастополь кымдемӹштӹшӹ Кача-3 аэродромыш ваштенӹт) дӓ Крымым немӹц авиацин керӹлтмӹжӹ гӹц перегӓш колтенӹт. 1941 ин июньынок Михаил Кологривов ти полкышток звенон командиржӹ лин. 1941 ин шӹжӹм Перекоп перешейкӹштӹ мӱлӓндӹ вӹлнӹшӹ немӹц войскавлӓм штурмуяш чонгештӹлӹнӹт. Пок составышты Севастопольым перегӹмӹ годым соок ӓрен нӓлмӹ хала кӧргӹштӹ ылын, тӹштӹшӹ лач ик аэродромжы гӹц Херсонесыш чонгештӹлӹн дӓ тышманын шукы пачаш виӓнрӓк атакыжым цӓктӓрен. 1941 ин 17 декабрьын Севастополь пӹлгомышты пӹтӓришӹ гӓнӓ ӹшке сӹнгӹмӹжӹм анжыктен: И-153 истребитель дон немӹц Ме-109 самолётым кенвацтен. Севастопольым перегӹмӓштӹ патыр ылмыжым анжыктымыжы гишӓн 8 полк СССР ВМФ-ын Халык комиссарын указшы доно гварди лӹмӹм нӓлӹн дӓ ВМФ ВВС-ын 6-шы гварди истребитель авиаци полкыш сӓрнӓлтӹн[3].

Севастопольым кодымыкы, кодшы полк доно иквӓреш Новороссийскыш ванжен, тӹштӹ тӹнӓмок Кавказ верц кредӓлмӓшкӹ ушнен. 1942 ин Як-1, а 1943 и мычашын Як-9 истребителеш чонгештӹлӓш тымень шон. 1943 и кыт мычкы Йыдпелвел Кавказышты кредӓлӹн, тӹнӓмок Кубань верц юж вӓшпижмӓшвлӓш лӓктӹн (тенге ӹшке сӹнгӹмӓшӹжӹм когоэмден: 2 самолётым ӹшкетшок, 2 самолётым тӹшкӓн шӓлӓтен), 1944 и январь гӹц Керч плацдармыштышы пӹлгомем переген (тӹштӹ 3 самолётым шӓлӓтен), а 1944 ин апрель-майын Крымым пӧртӹлтӹмӹ верц операциштӹ ылын. 1944 ин 8 майын Севастопольым штурмуйымы кечӹвлӓн остатка немӹц самолётытшым кенвацтен (пуйырымаш семӹнь, самолет тӹ вӓрӹшкок, манаш лиэш, кенвазын, кышкы 1941 ин тӹдӹн пӹтӓришӹ пыдештӓрӹмӹ немӹц самолётшы кенвазын, ти гӓнӓӓт тидӹ Ме-109 самолет ылын).

Вырсышты сӹнгӹмӓшвлӓжӹ доно иквӓреш Михаил Кологривовын салтак званижӓт, служымы ташкалтышыжат со кушкын миэн: 1943 ин майын эскадрили командирӹн вашталтышыжы ылын, тӹ инок июньын – эскадрили командир. Тенгеок 1943 ин ВКП(б)-ш пырен[1].

1944 и июнеш 6-шы гварди истребитель авиаполкын 11-шӹ штурмовой авиаци дивизин командиржӹ ВВС Шим тангыж флотын гварди капитан Кологривов 538 гӓнӓ сӓр вӓшпижмӓшкӹ чонгештӹлӹн: 336 – ӹшке сӓр-тангыж базым перегӹмӓшкӹ, 85 – пӹлгом гӹц тангыжыштышы корабльвлӓм перегӹмӓшкӹ, 67 – штурмовик дон бомбардировщиквлӓм видӹмӓшкӹ, 29 – тышманын мӱлӓндӹ вӹлнӹшӹ вижӹм штурмуйымашкы. Воздухышты 64 вӓшпижмӓштӹ ылын, кышты наградной документвлӓ семӹнь, тышманын 10 самолётшым ӹшкетшок шӓлӓтет, 1 – тӹшкӓштӹ[4], а варарак ӹштӹмӹ шӹмлӹмӓшвлӓ паштек – ӹшкетшӹ 8 самолётым кенвацтен дӓ тӹшкӓштӹ – 4[5].

СССР Верховный Советӹн Президиумын Указшы доно немӹц-фашист «захватчиквлӓ доно кредӓлмӹ фронтышты командованин сӓр задачым яжон ӹштӹмӹжӹ гишӓн дӓ тидӹн годым лӱддӹмӓшӹм дӓ патыр ылмыжым анжыктымыжы гишӓн» гварди капитан Михаил Михайлович Кологривовлан Совет Союзын Геройжы лӹмӹм пумы дӓ Ленин орден дон 3819 номерӓн «Шӧртньӹ шӹдӹр» медальым кычыктымы[2].

1944 ин августын ВМФ 6-шы гварди истребитель авиаци полк Ясско-Кишинёв операциштӹ ылын, сентябрьын Румыни дон Болгари вӹлнӹ вырсы пӓшӓм ӹштен. Болгарин вырсы гӹц лӓкмӹкӹжӹ, Шим тангыжышты вырсы пӹтен. 1945 и тӹнгӓлтӹшӹн полкым Крымыш ваштенӹт, тӹштӹ М. Кологривов ӹшке однополчанвлӓжӹ сага Як-2 у истребительвлӓ доно Ялтыштышы конференци годым пӹлгомым перегӹмӓштӹ ылыныт. Цилӓжӹ 600 нӓрӹ гӓнӓ вырсышты чонгештӹмӓшӹм ӹштен, но воздухышты у сӹнгӹмӓшвлӓжӹ больше ылделыт.

Вырсы пӹтӹмӹкӹ, Кологривов СССР ВМФ-ышты пакыла служен.1948 ин декабрьын тыменяш колтымы якте ВМФ-ын «туан» 6-шы гвардин истребитель авиаци полкыштыжы служен, кышты 1945 ин декабрьын полк командирӹн чонгештӹлӓш йӓмдӹлӓлтмӹ дӓ воздухышты вӓшпижмӓш шотышты палшышыжы ылын, 1947 ин октябрьын – пилотируйымы техника дӓ чонгештӹлмӹ теори шотышты командирӹн вашталтышыжы. 1955 ин майын тӹдӹ Военно-воздушный академим тымень пӹтӓрен. Тӹдӹм тӧрӧк ВМС авиацин чонгештӹлмӹ тактика Тӹнг курсышкыжы тӹ жепӹштӹшӹ реактивный истребительвлӓ доно чонгештӹлӓш тыменяш колтенӹт. 1955 и июль гӹц ВВС 4-шӹ ВМФ-ышты (Балтика тангыж) служен, тӹштӹ ВМФ 939-шӹ дӓ 211-шӹ истребитель авиаполквлӓ доно командуен. 1957 ин апрельӹн подполковник звани дон М.М.Кологривовым запасыш колтенӹт.

Одессышты ӹлен,1958 и гӹц Одесса ДОСААФ-ын Ленин райкомышты пӓшӓм ӹштен, 1960 и гӹц – Одессын тӹнг почтын радиоинспекци начальник. Общественный пӓшӓм яжон ӹштен. 1964 ин 16 июльын церлӓнен колен[2][6].

Наградывлӓ

  • Советский Союзын Геройжы (5.11.1944)
  • Ленин Орден (4.11.1944)
  • Кым Якшар Знамя орден (8.12.1941, 9.08.1942, 22.05.1943)
  • Александр Невскийӹн орден (29.04.1944)
  • Якшар Шӹдӹр орден (20.04.1953)
  • СССР медавльвлӓ[2]
  • Болгарин медальжы

Ӓшӹндӓрӹктӹмӓш

  • Кокшайскышты М.М.Кологривов лӹмӹм ӧлицӓлӓн пумы[2].
  • Геройын лӹмжӹ Севастопольыштышы мемориалышты Севастопольым перегӹшӹ Советский Союзын геройвлӓ тӹшкӓштӹ, Одессышты герой-лётчиквлӓм ӓшӹндӓрӹктӹшӹ знакешӓт курымеш сирӓлтӹн.
  • Геройын бюсттвлӓжӹм Кеча посёлкышты (Севастопольыштышы Нахимов кымдем) дӓ Кокшайск солашты шагалтымы.
  • Кологривовын барельефшӹ Мары Эл Республикӹн Звенигово халашты геройвлӓлӓн стеллышты вӓрӓнгдӹмӹ.
  • Кокшамар солаштышы кӹдӓлӓш дӓ Кокшайскыштышы тӹнгӓлтшӹш школвлӓн здаништӹ Герой лӹмеш мемориал ангам вӓрӓнгдӹмӹ.

Примечани

  1. ↑ 1 2 Полухина Т., Старикова О. Морские лётчики — Герои Советского Союза. Кологривов Михаил Михайлович. // «Морской сборник». — 2017. — № 2. — С.79.
  2. ↑ 1 2 3 4 5 Михаил Михайлович Кологривов (руш.). Сайт «Герои страны».
  3. ↑ Анохин В. А., Быков М. Ю. Все истребительные авиаполки Сталина. Первая полная энциклопедия. — Научно-популярное издание. — М.: Яуза-пресс, 2014. — С. 812—813. — 944 с. — 1500 экз. — ISBN 978-5-9955-0707-9.
  4. ↑ М. М. Кологривов на сайте «Советские асы» Архивный копи от 22 февральын 2019 на Wayback Machine.
  5. ↑ Быков М. Ю. Все асы Сталина. 1936—1953. — М.: Яуза, 2014. — С. 561—562. — (Элитная энциклопедия ВВС). — ISBN 978-5-9955-0712-3.
  6. ↑ В ряде публикаций указывается, что М. Кологривов скончался в 1962 году.

Литература

  • Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1987. — Т. 1 /Абаев — Любичев/. — 911 с. — 100 000 экз. — ISBN отс., Рег. № в РКП 87-95382.
  • Авдеев М. В. У самого Чёрного моря. Книга 2. — М.: ДОСААФ, 1970.
  • Авдеев М. В. У самого Чёрного моря. Книга 3. — М.: ДОСААФ, 1975.
  • Минаков В. И. Гневное небо Тавриды. — М., 1985.
  • Наши Герои. 2-е изд., перераб. и доп. — Йошкар-Ола, 1985.
  • Воронов В. И. Морские истребители. — М.: ДОСААФ, 1986.
  • Денисов К. Д. Под нами — Чёрное море. — М.: Воениздат, 1989.
  • Кологривов Михаил Михайлович // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 439. — 872 с. — 3505 экз. — ISBN 978-5-94950-049-1.
  • Кологривов Михаил Михайлович // История Марийского края в лицах. 1941—1945 гг. Великая Отечественная война. — Йошкар-Ола: МарНИИЯЛИ, 2015. — С. 108—111. — 374 с. — 500 экз. — ISBN 978-5-94950-070-5.
  • Мочаев В. А. Кологривов Михаил Михайлович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 210. — 606 с. — 1500 экз. — ISBN 978-5-905314-35-3.

Ссылкывлӓ

«https://mrj.ruwiki.ru/w/index.php?title=Кологривов,_Михаил_Михайлович&oldid=310699» гӹц нӓлмӹ