Голубев, Михаил Михайлович
| Михаил Михайлович Голубев | |||||||||
|---|---|---|---|---|---|---|---|---|---|
 | |||||||||
| Шачын |
1938 и 12 сентябрь (88 и) Ковернин район, Угарман кымдем |
||||||||
| Парти | КПСС | ||||||||
| Награда |
|
||||||||
Михаил Михайлович Голубев — совет хозанлык, кугижӓншӹ дӓ политика деятель, Социалистический Пӓшӓн Геройжы (1991). РСФСР-ӹн заслуженный зоотехникшӹ (1986).
Ӹлӹмӓш корныжы
1938 ин Угарман кымдем Ковернин вел Волоколам солашты вырсеш колышы колхозникӹн семняэш шачын. КПСС член.
1963 и гӹц — хозанлык, общество дӓ политика пӓшӓштӹ. Угарманыштышы сола хозанлык институтым (1963) тымень лӓктӹн. 1963—1970 ивлӓн — Звениговыштышы колхоз-совхоз производство управленин зоотехникшӹ, Параньгаштышы производство управленин тӹнг зоотехникшӹ, 1970 и гӹц 2003 и якте — Мары АССР Медведево район «Азановский» госплемзаводын директоржы.
СССР Кӱшӹл Кӓнгӓш Президиумын 1991 и 17 октябряш Указшы доно Социалистический Пӓшӓн Геройжы лӹмӹм пумы, Ленин орден дӓ «Сарла дон Молот» шӧртньӹ медальым кычыктымы.
МАССР Кӱшӹл Кӓнгӓшӹн депутатшы (1980—1985, 1990—1993), Мары Эл Республика Кугижӓншӹ Погынымашын депутатшы (1996—2004, 4-шӹ созыв).
34 и нарӹ «Азановский» совхозын директоржы ылын, ти ивлӓн Голубев Михаил Михайлович хозанлыкым Российӹштӹ анзыл опытан школыш сӓрен. 1969 ин «Азановский» совхозышты СССР-ӹштӹ икшӹ гӓнӓ кеквлӓм седӹрӓ гӹц Йошкар-Ола заводвлӓштӹ йӓмдӹлӹмӹ ик ярусан батарейӹшкӹ ваштенӹт.
И йӹде мӱлӓндӹш компостым (олым дӓ цӹвӹ дон вольык намозым) лыкмы рокыштышы гумусым лӱктӓлӓш палшен, тидӹжӹ 2000 иэш шурны лӓктӹшӹм 7-9 ц/га гӹц 45 ц/га якте шукемден дӓ вольыклан кормы йӓмдӹлӹмӹ негӹцӹм пӱлӓэш яжоэмден.
Хозанлыкышты 700 га мӱлӓндӹ вӹд шӓвӹмӓн лин, тидӹ люцернӹм кӓнгӹж гач 4 гӓнӓ салаш дӓ гектар гӹц 100 тонн кормылык ушманым кушташ йӧнӹм пуэн.
Вольык вырлыкым уэмден толмы дӓ яжо кормы доно эче 1984 инок ик ышкал гӹц 6300 кг шӹшерӹм шыпшылаш тӹнгӓлӹнӹт, а хозанлыкышты 1000 ышкал ылын. Ти ивлӓн хозанлыкыш СССР-ӹн, Российӹн пӱлӓ кымдемжӹ гӹц, вес сӓндӓлӹквлӓ гӹцӓт шукы делегаци толын. СССР шӓлӓнӹмӹ паштек хозанлыкыш ФРГ, Венгри, США, африкан сӓндӓлӹквлӓ гӹц толаш тӹнгӓлӹнӹт. Хозанлык тӹдӹм «Семёновский» госплемзаводыш ушымы паштекӓт пӓшӓм яжон ӹшта.
Хозанлыкышты пайдам яжон нӓлӓш тӹнгӓлмӹ доно изин-олен пӓшӓзӹвлӓлӓн цилӓ шотыштат йӧнӓн пӧртвлӓм, солашты дӓ Яндуш, Петяк солавлӓшкӹ асфальт корным ӹштенӹт. Культура пӧртӹм, кок этажан типовой больницӹм, тетя сад-ясльым лӱктенӹт, солавлӓшкӹ газым пыртенӹт. Газ котельныйым шӹнденӹт.
1990-шы ивлӓ мычашты Азановышкы оптоволокноан кӹлӹм шыпшыныт, тенге каждый ганьок семняштӹ, школышты интернет доно пайдаланаш йӧн лин.
2003 и гӹц Михаил Михайлович Голубев пенсиштӹ ылеш[1]. 2025 ин октябрьын профессиональный айо — Сола хозяйство дон перерабатывайышы промышленностьыштышы пӓшӓзӹн кечӹжӹ — доно тӹдӹм Мары Эл Республикӹн сола хозяйство дон продовольствин министржӹ Павел Раевский кымылангден[2].
Звани дон наградывлӓ
- ВДНХ-н той медальжы (1971)
- «Пӓшӓштӹ айыртемӓлтмӹлӓн» медаль (1971)
- Якшар Знамя Пӓшӓ орден (1975)
- Октябрь революци орден (1979)
- Мары АССР-ӹн заслуженный зоотехникшӹ (1980)
- РСФСР-ӹн заслуженный зоотехникшӹ (1986)
- Мары АССР Кӱшӹл Кӓнгӓш Президиумын Почет грамотыжы (1988)
- Социалистический Пӓшӓн Геройжы (1991)
- «Ӓтямӱлӓндӹ анзылны кого пӓшӓлӓн» IV степенян орден (1998)
Примечани
- ↑ Голубев Михаил Михайлович (руш.). vk.com (13 сентябрьын 2024). Тергӹмӹ кечӹ: 19 ноябрьын 2025.
- ↑ Человек, посвятивший жизнь земле: поздравление ветерана отрасли (руш.). mari-el.gov.ru (21 октябрьын 2025). Тергӹмӹ кечӹ: 19 ноябрьын 2025.
Литература
- Голубев Михаил Михайлович // Кто есть кто в Марий Эл / Авт.-сост. В. А. Мочаев. — Йошкар-Ола: Марийский биографический центр, 2002. — С. 135. — 2000 экз. — ISBN 5-87898-197-1.
- Мочаев В. А. Голубев Михаил Михайлович // Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — С. 91. — 2032 экз. — ISBN 5-87898-357-0.
- Голубев Михаил Михайлович // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 308. — 872 с. — 3505 экз. — ISBN 978-5-94950-049-1.
- Рыбакова Т. Л., Мочаев В. А. Голубев Михаил Михайлович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 103. — 606 с. — 1500 экз. — ISBN 978-5-905314-35-3.