Быков, Владимир Фёдорович
| Владимир Фёдорович Быков | |
|---|---|
 | |
| Шачмы кечӹ | 14 апрель 1931 |
| Шачмы вӓр | Йошкар-Ола хала округ, Мары АССР, СССР |
| Колымы кечӹ | 2 февраль 2012 (80 и) |
| Колымы вӓр | |
| Сӓндӓлӹк | |
| Пӓшӓн йиш | комбайнёр, водитель |
| Награда дӓ премивлӓ |
    |
Владимир Фёдорович Быков (1931 и 14 апрель, Медведево район, СССР — 2012 и 2 февраль, Кузнецово, Мары Эл) — совет хозанлык деятель, Социалистический Пӓшӓн Геройжы.
Ӹлӹмӓш корныжы
1931 ин апрельӹн Мары АССР Медведево районын Княжна солаштыжы (кӹзӹт — Йошкар-Олаштышы Данилово сола) шочын. Ӹшке шачмы солаштыжы нӹл классан школым тымень пӹтӓрен, но пакыла пӓлӹмӓшӹм нӓлӓш ӹш вӓрешт. Владимир 12 иӓшок нырышты пӓшӓлен, имним яжон виктӓрен. Тӹдӹн икшӹ наградыжы, кыдым эче цӹлток сӓмӹрӹк Володя нӓлӹн — «1941–1945 ивлӓштӹшӹ Кого Ӓтямӱлӓндӹ вырсышты яжо пӓшӓ гишӓн» медаль.
1949 ин Владимир Быков У Торъял солашты сола хозанлыкым механизируйымы школыш тыменяш пырен. Ик иштӹ, комбайнёрын свидетельствым нӓлмӹкӹ, Кузнецово солашты вӓрлӓнӹшӹ Йошкар-Олаштышы МТС-ыш пӓшӓшкӹ толын. Арми анзыц ӹшкӹмжӹн икшӹ С-4 комбайнжы доно пӓшӓм ӹштен, тӹдӹн двигательжӹм вӹц парня гань пӓлен. 23 иӓш Владимир Фёдоровичым армиш нӓлӹнӹт. Туркменский республикӹштӹ, Ашхабадышты, разведбатальонышты артиллери мастер семӹнь служен.
1957 ин токы пӧртӹлмӹкӹжӹ, угӹц комбайнёрын пӓшӓм ӹштӓш тӹнгӓлӹн. 1960 ин пашкуды солавлӓн колхозвлӓ «Семёновский» кого совхозыш ушненӹт, тӹдӹм талантан вуйлатышы, андакшы тымдышы Сергей Степанович Жилин вуйлатен. Совхоз ныр шӓрлен, техника шукы лин, шурны лӓктӹш кушкын. Владимир Быковынат шимӹ пӓшӓн лӓктӹшӹжӹ когоэмӹн. Владимир Фёдорович С-4М, СК-3, СК-4 комбайнвлӓ доно пӓшӓлен, 1969 и гӹч «Сибиряк» комбайн доно цацен.
В. Ф. Быковын пӓшӓ сӹнгӹмӓшӹжӹ гишӓн Мары АССР-ын Кӱшӹл Совет Президиумын Почётан грамотыжы, ВДНХ-ан кым шӧртньӹ медальжы, «Россий Федерацин заслуженный механизаторжы» звани анжыктат.
1972 ин Быков Владимир Фёдорович Ленин орден доно награждайымы ылын, а 1975 ин Совет Союзын кӱшӹл наградыжым — Социалистический Пӓшӓ Геройын Шӧртньӹ Шӹдӹржӹм нӓлӹн. Ӹндекшӹмшӹ вӹциӓш годым тӹдӹ ӹшкӹмжӹн вӹциӓш планжым кым гӓнӓ эртӓрен темен.
Владимир Фёдорович Быков комбайн штурвал анзылны цилӓжӹ 40 и пӓшӓм ӹштен. Телӹм совхозышты автомобиль водительӹн пӓшӓм ӹштен ӓли газовый котельныйӹштӹ дежурствыш каштын.
Тӹдӹ 2002 ин, 72 иш шомыжы годым, заслуженный кӓнӹмӓшкӹ лӓктӹн. 2012 ин 2 февральын ӹлӹмӓш гӹц кен.
Литература
- А. Н. Кропотов. Возрождение (к 50-летию племзавода «Семеновский»). Йошкар-Ола, 2006.