Башкир йӹлмӹн кечӹ
| Башкир йӹлмӹн кечӹ | |
|---|---|
 | |
| Тип | Культурный |
| Вес семӹнь | башк. Башҡорт теле көнө |
| Ӹштӓлтӹн | Башкортостан Республикӹн вуйлатышыжы Радий Фаритович Хабировын указшы семӹнь |
| Пӓлемдӓт | 2015 и гӹц |
| Кечӹ | 14 декабрь |
| Кӹлдӓлтӹн | башкир поэт дӓ сотемдӓрӹшӹ Мифтахетдин Акмуллан шачмы кечӹжӹ доно |
Башкир йӹлмӹн кечӹ — башкир йӹлмӹм перегӹмӹ дӓ виӓнгдӹмӹ лӹмеш эртӓрӹмӹ айо. Башкир йӹлмӹ Башкортостан Республикӹн кугижӓншӹ йӹлмывлӓ логӹц, руш йӹлмӹ доно иктӧр, иктӹжӹ ылеш. Тӹдӹ алтай йӹлмӹ семнян тюрк тӹшкӓш пыра дӓ паян истори дон культуран ылеш. Башкортостан Республикӹн вуйлатышыжы Радий Фаритович Хабировын указшы семӹнь Башкир йӹлмӹн кечӹжӹ, 2019 и гӹц тӹнгӓлӹн, 14 декабрьын пӓлемдӓлтеш[1][2].
Истори
Башкир йӹлмӹн кечӹм ӹштӹмӹ гишӓн шанымаш башкир йӹлмӹм перегӹмӓш дӓ виӓнгдӹмӓш, тӹдӹ докы сӓмӹрӹквлӓм лишемдӹмӓшӹн керӓл ылмы гӹц лӓктӹн. Башкирвлӓ — Башкортостанын тӹнг халыкшы, да нӹнӹн йӹлмӹштӹ халык шотышты ӹшкӹмӹм ынгылымашым перегӹмӓштӹ сек кого вӓрӹм нӓлеш. 14 декабрьым айо кечӹ семынь такеш агыл айырымы: ти кечӹн лӹмлӹ башкир поэт дӓ сотемдӓрӹшӹ Мифтахетдин Акмулла шачын.
Ти кечӹм 2015 и гӹц Башкирвлӓн цилӓ сӓндӓлӹкӹштӹшӹ курултайын (конгресс) инициативӹжӹ семӹнь Башкортостан Республикӹн Халыквлӓ ассамблейӹн дӓ Башкортостан Республикӹн образовани министерствын палшымы доно пӓлемдӓш тӹнгӓлӹнӹт. 2019 и гӹц айо официальный статусан ылеш. Каждый цивилизованный эдем ӹшке туян йӹлмӹм дӓ ӹшке йыхым ланзылышашлык дӓ тенгеок ӓтя-ӓвӓ дон тошты когораквлӓм шотеш пиштӹшӓшлык. Пӹтӓришеш, тидӹ эдемӹн коргӹ сӓндӓлӹкшӹм пайдара, а кокшеш, вес йӹлмӹвлӓм тыменяш куштылта[3].
Пӓлемдӹмӹ годым традицивлӓ
Башкир йӹлмӹ кечӹн йӹлмӹм шӓрӹкӓлӹмӹ дӓ виӓнгдӹмы шотышты сакой мероприятивлӓ эртӓрӓлтӹт. Школ дон вузвлӓштӹ башкир йӹлмӹ дӓ литература лӹмеш уроквлӓ кеӓт, лыдшывлӓн конкурс, викторина дӓ олимпиадывлӓ эртӓт. Тенгеок концертвлӓ, выставка дӓ молы культурный событивлӓ эртӓрӓлтӹт, тӹштӹ башкирлӓ мырым мырат дӓ лыдышым лыдыт. Ти кечӹн Башкортостанышты дӓ тӹдӹ велнӹ онлайн дӓ офлайн форматан сакой мероприятивлӓ эртӓрӓлтӹт. Башкир писатель дон поэтвлӓн наследим перегӹмӓш дӓ виӓнгмӓш докы пасна внимани айыралтеш. Ти кечӹн литературышты лӹмлӹ эдемвлӓм: Мифтахетдин Акмулла, Шайхзада Бабич, Мажит Гафури дӓ молывлӓмӓт шӹрен ӓштӓт. Ти кечӹн идӓлыкым иктешлӓт, анзыцрак эртӓрӹмӹ конкурсвлӓштӹ сӹнгӹшӹвлӓм пӓлдӓрӓт. Цилӓ мероприятиш республикӹн культура дӓ образовани учрежденивлӓ ушнат[4][2].
Примечани
- ↑ День башкирского языка. Башкирский институт социальных технологий (филиал) Образовательного учреждения профсоюзов высшего образования «Академия труда и социальных отношений». 14 декабр 2022.
- ↑ 1 2 Как в республике отметят День башкирского языка. Башинформ. 7.12.2022.
- ↑ «Мелодичный башкирский язык». Culture.ru.
- ↑ Сегодня в Башкортостане отмечается День башкирского языка. Министерство культуры Республики Башкортостан. 14 декабря 2022 года.