Двинянинов, Альберт Валентинович
| Альберт Валентинович Двинянинов | |
|---|---|
 | |
| Шачмы кечӹ | 21 сентябрь 1929 (96 и) |
| Шачмы вӓр | |
| Сӓндӓлӹк | |
| Награда дӓ премивлӓ | |
Альберт Валентинович Двинянинов (1929 и, 21 сентябрь, Шура, Мары автономный область) — советский дӓ российский журналист. Мары АССР-ын культурыжын заслуженный пӓшӓзӹжӹ (1989). «1941-1945-шӹ ивлӓштӹшӹ Кого Ӓтямӱлӓндӹ вырсышты Сӹнгӹмӓшлӓн 80 и теммӹ лӹмеш» лӹмгечӹ медаль доно пӓлдӹртӓлтӹн (2025).
Ӹлӹмӓш корныжы
Альберт Двинянинов 1929 ин 21 сентябрьын Какшан мучаш (Пектубай) монгыр Шура солашты шачын. Кӹзӹт ти сола У Торъял районыштыжы ылеш. Семняштӹ нӹл тетя лин. Ӓвӓжӹ тӹнгӓлтӹш школышты тетявлӓм тымден. Ӓтяжӹ 1942 ин фронтыш кеен[1].
Альберт Валентинович Пектубайыштышы кӹдӓлӓш школышты 10 классым тымень пӹтӓрен дӓ Мары педагогический институтын истори факультетӹшкӹжӹ тыменяш пырен.
Институт гӹц вара Кожласолаштышы кӹдӓлӓш школышты (Провой кымдем) нӹл и немӹц йӹлмӹм дӓ историм тымден. Тенгеок вечерний школышты экономикӹм дӓ географим тымден, тӹ жепӹштӹ тымдышывлӓ ситӹделыт.
Вара Йошкар-Олаш ванжен дӓ «Марийская правда» газетӹштӹ литературный пӓшӓзӹн вӓрӹм йӓшнен, партийный ӹлӹмӓш отделӹм вуйлатен, тӹшток пенсишкӹ лӓкмешкӹжӹ пыт пӓшӓлен. Но Альберт Валентинович пӓшӓ гӹц пасна шӹнзен кердде, «Профсоюзный диалог» газетӹн редакторжы лин. Вара «Сельская жизнь» газетӹштӹ цацен пӓшӓлен.
2000-шӹ ивлӓштӹ мӓмнӓн республикӹштӹ «История сел и деревень Республики Марий Эл» сери доно книгӓвлӓ лӓктӹнӹт. Альберт Валентинович Медведевский район гишӓн «43-шы иштӹ шачшы» книгӓм йӓмдӹлӹмӓштӹ пыт цацен.
Тенгеок У Торъял дӓ Йӱрнӹ районвлӓштӹ халыкын вырсы жепӹн труйымыжы гишӓн сирӹмӹ книгӓлӓн анзыл шамакым очерк семӹнь сирен. Альберт Валентинович кӹзӹтӓт шукы лыдеш дӓ сӓмӹрӹквлӓлӓн ӹшке келгӹ пӓлӹмӓшвлӓжӹм куанен пуа. Тӹдӹ мӓмнӓн шачмы мӱлӓндӹ, республика гишӓн шукым пӓлӹшӹ шая мастар.
2025 ин 19 февральын Альберт Валентиновичӹм Кого Ӓтямӱлӓндӹ вырсышты Сӹнгӹмӓшлӓн 80 и теммӹ лӹмеш лӹмгечӹ медаль доно награждаенӹт[2].
Семняжӹ
- Шоляжы: Арнольд (1937—2021) — советский радионастройщик, Социалистический Пӓшӓн Геройжы (1974).
Мактымашвлӓ
- МАССР-ын Верховный Советӹн Президиумжын почётный грамота (1982)[1]
- Мары АССР-ын культурыжын заслуженный пӓшӓзӹжӹ (1989)[1]
- «1941-1945-шӹ ивлӓштӹшӹ Кого Ӓтямӱлӓндӹ вырсышты Сӹнгӹмӓшлӓн 80 и теммӹ лӹмеш» лӹмгечӹ медаль (2025)[3]
Примечани
- ↑ 1 2 3 Марийская биографическая энциклопедия-2, 2017, с. 120.
- ↑ Ветеранам из Йошкар-Олы вручили медали к 80-летию Великой Победы, AiF. Дата обращения: 19 ноябрьын 2025.
- ↑ Ветерану "Марийской правды" Альберту Двинянинову вручили медаль к 80-летию Победы в Великой Отечественной войне. Дата обращения: 19 ноябрьын 2025.
Литература
- Мочаев В. А. Двинянинов Альберт Валентинович // Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — С. 120. — 606 с. — 1500 экз. — ISBN 978-5-905314-35-3.